Elenganya Icalo Icabulamo Ukufunuka

BUSHE kuti wacite cikope icalo uko abantu babombela pamo ukucila ukucimfyanya? Uko abantunse basunga bambi nge fyo na bo bengafwaya ukusungwa? Iyi mibele ya calo icabulamo ukufunuka. We calo ico cingaba! Bushe cikabala acisa? Ee, cikesa. Lelo ni shani fintu ukufunuka—ukwalimbwa mu mutundu wa muntu—kwingafumishiwapo?

Pa kusange casuko, tufwile pa kubalilapo ukumfwikisha intendekelo ya kufunuka. Baibolo ilangilila ukuti tayali lyonse mibele ya mushobo wa muntunse. Kasesema Mose atwibukisha ukuti takwali bulema ukupala ukufunuka ubwasangilwe mu kutendekelako mu muntu wa kubalilapo, icibumbwa capwililika ica kwa Kabumba walubuka ku kufunuka: “Cilibwe icasansuka, ya mpomfu imicitile yakwe; pantu imibele yakwe yonse [bulungi, NW].” E co, lyene, ni kwi kwafumine ukufunuka? Abantunse ba kubalilapo basuminishe kwene ukutendeka mu bene beka—Efa mu kwenekela kwabamo ukufunuka ku cintu aali no kusanga ukufuma ku kulya icisabo ico Lesa abindile, Adamu mu kufunuka tafwaile ukulufya umukashi wakwe uwayemba. Mose alundilepo, mu mashiwi ayo ayali na yo yene aya cine pa lwa kwa Adamu na Efa ukuti: “Bayonaula—tabali bana bakwe, e kalema kabo.”—Amalango 32:4, 5; 1 Timote 2:14.

Ukufika pa nshita ya Lyeshi lya mu cibulungwa ilya kasuba ka kwa Noa, ukufunuka no lunkumbwa fyalitendeke ukufika ku cipimo ca kuti “bwafulo bubi bwa bantu pano isonde, no kuti ukulinga konse kwa matontonkanyo ya mitima yabo kwabipa fye inshiku shonse.”—Ukutendeka 6:5.

Iyi mibele yapulamo iya kufunuka mu muntu yalitwalilila ukufika na nomba, mu kumonekesha ukufika pa kalume ka buko muli sosaite wa lelo uwabulo kutasha kabili uwafunuka.

Ukufumyapo Ukufunuka Ukupitila mu Kusambilila

Pamo fye nga fintu ukufunuka pa kati ka buntunse kwalikula, e co icapusanako kuti cacitika. Ukufunuka kuti kwacimfiwa. Nalyo line, pa kuti ici cicitike, ukusambilila kwalinga no kukansha filakabilwa, mu kuba ne fya kutungulula fyakosa nelyo amafunde ya myendele ukukonkwa. Ici kuti caumfwika nge cabamo amano, lelo ni ani engapayanya uyo musango wa kusambilila no kushininkisha ukuti icilesambililwa cabikwa mu kubomba—nelyo fye ukukoshiwa nga cakabilwa?

Ukusambilila kwa musango yo kufwile ukufuma ku ntulo iyabe yalubuka ku kufunuka kwine. Takufwile ukubako inkuntu sha ku nse nelyo ukwenekela kwa cintu cimbi mu kukonkapo pa kukansha kwa musango yo. Mu kulundapo, ukukatama ne mibombele ya kubula akaso fifwile ukusambilishiwa no kulangililwa. Umo uulesambilila akabila ukushininwa te mu kuti fye inshila ya musango yo iya bumi kuti yacitika lelo ukuti e nshila yasobolwapo, mu kuba no kumwenamo ku mwine na kuli abo abamushingulwike.

Ni Lesa fye wa mu mulu eka e wingapayanya uyu musango wa kusambilila, pantu muntu nshi nelyo ukuteyanya pano isonde ukwingakwata ukufikapo ne cikulilo? Abantu bonse tabafikapo pa mulandu wa ici cine ca mu Baibolo: “Pantu bonse nababembuka, kabili bapelebela ku bukata bwa kwa Lesa.”—Abena Roma 3:23.

Mu nsansa, Yehova, Lesa uwa mu mulu, alapayanya ukusambilila kwa musango yo mu citabo cakwe ica kusambililamo icalembwa, nelyo icitabo ca mafunde ya kutungulula, Baibolo wa Mushilo. Umwana wakwe, Yesu Kristu, atwele pa ntanshi uyu musango wa kusambilisha lintu aali umuntu pe sonde. Ukufika pa kati ka Lyashi lya pa Lupili ilya kwa Yesu ilyalumbuka, alandile pa lwa musango wa bumi uyo uwaumfwikilwe uwaibela ku bengi aba abo balekutika, apantu lyasanshishemo ukubulwa kaso nelyo fye kulola ku mulwani wa umo nelyo bakakaanya. Yesu asosele ukuti: “Temweni abalwani benu, pepeleni abamulamata; ukuti mube abana ba kwa Shinwe uuli mu mulu: pantu alenga akasuba kakwe ukutulila ababifi na basuma, no kuleke mfula ilokele abalungama na bashalungama. Pantu nga mwatemwa abamutemwa, muli ne cilambu nshi? bushe abasangushi tabacite fyo fine?”—Mateo 5:44-46.

Ulubali lwa mulimo wa kwa Yesu pe sonde lwali kukansha bakafundisha babula akaso pa kuti na bo mu kukonkapo kuti basambilisha bambi muli iyi nshila ya bumi iyalubukako ku kufunuka. Inshita imo pa numa ya mfwa ya kwa Yesu no kubuuka, umutumwa Paulo abele umo uwa bakafundisha ba musango yo. Mu mpendwa ya makalata yakwe ayapuutwamo, Paulo acincishe ukupwisha kwa kufunuka. Ku ca kumwenako, alembele Abena Efese ukuti: “Lelo ubulalelale no kukowela konse, nangu lunkumbwa, mwileka filumbulwe muli imwe, ifyo kwayana ku bashila.”—Abena Efese 5:3.

Mu kupalako ilelo, Inte sha kwa Yehova balesambilisha abaume na banakashi ukushimaisha ukukongama kwa kufunuka. Mu nshita aba na bo basanguka abafikapo ku kuya ku ntanshi no kusambilisha bambi inshila sha bukapepa isha musango yo.

Icine ca Baibolo mu Kubomba

Lelo kuti pambi waipusha ukuti: ‘Bushe abantu bashapwililika, abalimbwamo no kufunuka, mu cine cine kuti bakunukula ukufuma mu buntu bwabo?’ Ee, kuti bacita. Te mu kupwililika, kwena, lelo ku cipimo cimo ico icingamonekesha. Natulanguluke ica kumwenako ca ici.

Umupupu waishibikwa aikele mu Spain. Iŋanda yakwe yaiswilemo ifipe fya kwiba. Lyene atendeke isambililo lya Baibolo ne Nte sha kwa Yehova. Nge ca kufumamo, kampingu yakwe yatendeke ukumucusha, e co apingwilepo ukubwekeshamo ifintu aibile ku bene. Atununwike uwa mwingishe incito kale no kusumina ukuti e waibile mashini ya kucapilako iipya ukufuma kuli wene. Uwa mwingishe incito, pa kuba uwaebekeshiwa ne mibele yakwe iyaaluka, apingwilepo ukukanaishibisha bakapokola lelo aipwishe fye uwali umupupu ukulipila umutengo wa mashini ya kucapilako.

Mu kukonkapo, umupupu waalulwa apampamine pa kutandalila uuli onse uo aibukishe ukwibila no kubweseshamo ifipe fyaibilwe. Uuli onse untu atandalile alumbulwile ukupapa pa kuti pa mulandu wa kubomfya kwakwe ifishinte fya Baibolo, akwete uku kwaluka kukalamba ukwa mibele.

Nomba ubwafya bwa cine cine bwalolenkene nankwe. Taishibe abene ba fipe ifingi ifyo aali acili nakwata. E co, pa numa ya kupepa kuli Yehova, aile ku cishinte cikalamba ica bakapokola no kutwala amaradio ya stereo mutanda yantu aibile mu myotoka. Bakapokola balipapile, apantu akwete icalembwa cisuma na bene. Bapingwilepo ukuti alingile fye ukulipila indalama sha mulandu no kubomba mu cifungo inshita iipi.

Uyu uwali kale umupupu nomba akwata kampingu wasanguluka, pa kusha ubumi bwakwe ubwa lukakala no kufunuka no kuba ulubali lwa cilonganino ca Nte sha kwa Yehova ica mu kusalala kwa calo.

Amakana ya fya kumwenako fyapalako mu kwangufyanya kuti yapeelwa. Nangula abo abacito kwaluka kwa musango yo mu bumi bwabo bapanga ulubali lwa banono aba bekashi be sonde, icishinka ca kuti abengi balicite co cilangilila amaka ya busuma ayesako ukufuma ku kwishiba no kubomfya ifishinte fya Baibolo.

Ilyo umwaka umo na umo uleya, abantu bafulilako balepokelela iyi nshila ya bumi. Ukufunda kwa Baibolo kulepeelwa mu filonganino ukucila 60,000 ifya Nte sha kwa Yehova ukupulinkane sonde. Inte pali ino nshita tabenekela ukwalule calo conse, ukupwisha ukufunuka ukwaba pa kati ka makana ya mamilioni abali aba mweo nomba. Nangu ni fyo, ubusesemo bwa Baibolo bulangilila ukuti mu kwangufyanya nomba, ubumi bwalubuka ku kufunuka bukanana mu kusalala kwe sonde!

Icalo Cipya Icalubuka ku Kufunuka

Takwakabe icifulo ca kufunuka na kaso mu calo cipya icileisa. Umutumwa Petro atwebekesha ukuti ubulungami bukaba e cishibilo te ca “myulu ipya” fye lelo ne “calo cipya.” (2 Petro 3:13) Ukufunuka kukaba pa kati ka “ifya ntanshi” ifyo ifikaba nafiya, capamo no kulwala, ubulanda, nelyo fye ni mfwa.—Ukusokolola 21:4.

E ico, nga ca kuti walipopomenwa ku kufunuka kulenina ne nshila ya kaso iya bumi iimoneka ukutushinguluka ilelo, shipikisha! Tendeka nomba ukwikalila icalo cipya icileisa ico icikaba ica cine cine mu kwangufyanya. Mu kuba no kwaafwa kwa kwa Lesa, bombesha ku kupwisha ukufunuka mu bumi bobe bwine. Ilunde ku kwaafwa bambi ukumona ukumwenamo uko ukwingapakishiwa nelyo fye ni nomba ku bumi bwa Bwina Kristu. Bika icitetekelo cobe no kucetekela mu bulayo bwa kwa Yehova Lesa ubwa kuti ukufunuka mu kwipipa nga nshi kukaba pa kati ka mulalo wa fintu fishisekesha ifyo ‘ifishakebukishiwe, nelyo ukubukuluka mu mitima yesu.’—Esaya 65:17.

[Icikope pe bula 5]

Yesu alandile ulwa nshila ya bumi iyo iisumbula ukubulwa akaso, te kufunuka

[Icikope pe bula 7]

Mu kwangufyanya—icalo icabulamo ukufunuka