Iciputulwa Ca Lulumbi Ica Myaka Ikana Limo Cilepalamina

“Kabili namwene ifipuna fya bufumu, na baikelepo, kuli abo kwapeelwe no bupingushi: namwene ne mitima ya baputwilwe imitwe pa mulandu wa kushimika Yesu ubunte, na pa mulandu wa cebo ca kwa Lesa, abashapepele iciswango nangu cimpashanya ca ciko, kabili abashapokelele ululembo lwa ciko pa mpumi shabo na pa fisansa fyabo; kabili bali no mweo, batekele pamo na Kristu imyaka ikana limo.” “Kabili [Lesa] akafuute filamba fyonse ku menso [ya mutundu wa muntu], ne mfwa tayakabeko kabili iyo; takwakabe kabili ukuloosha nangu kukuuta nangu kucululuka; pa kuti ifya ntanshi nafiya.”—Ukusokolola 20:4; 21:4.

MULI ifyo Baibolo ilasobela iciputulwa ca lulumbi ica myaka ikana limo icilepalamina—Ukuteka kwa Myaka Ikana Limo ukwa kwa Yesu Kristu ne bumba lya kubishanya ilya shamfumu sha ku mulu. Nakalimo wakongamina ku kufumyapo ubu busesemo nge cikope ca bufi, iciloto ca kukopeka. Nangu ni fyo, kuliko umulandu wakumanina kuli iwe ukumona ici Ciputulwa ca Myaka Ikana Limo nge cituntulu icileisa!

Ku cintu cimo, ukusambilila kwa Baibolo kukasokolola kuli iwe ukuti yalibomba ne fiputulwa mutanda ifyapita ifya myaka ikana limo ifya lyashi lya kale ilya buntunse mu nshila ya cishinka iyamonekesha. Ukulundapo, Baibolo libuku lya busesemo, kabili impendwa ikalamba iya kusobela kwa iko, nelyo amasesemo, kale kale yalifikilishiwa mu kulonsha konse.a Ico pa kube fyo, mulandu nshi Baibolo tailingile ukube iyashintililwapo mu kusobela Iciputulwa ca Myaka Ikana Limo icilepalamina ica kuteka kwa kwa Kristu? Kuti pambi wapapa, nangu ni fyo, cintu Baibolo itweba pa lwa cilya ciputulwa ca nshita. Mifwaile nshi cikabomba? Kabili ica buseko bwaibela kuli iwe, ni shani fintu cikambukila ubumi bobe?

Ubupyani Bwalufiwa

Baibolo ilango kuti Ukuteka kwa Myaka Ikana Limo ukwa kwa Kristu ni nshila yakwe iya kupeelelamo ubupyani bwaumo mutengo ku “bana” bakwe. Lelo ubupyani cinshi? Kabili “bana” nshi? Ubupyani kuti pambi bwalondololwa nge cintu cimo icipeelwa ku bufyashi bwa umo pa mfwa ya umo. Lintu icikolwe cesu Adamu ashininkishe ukuba uwabulwe cumfwila kuli Lesa, ailufishishe umwine no bufyashi bwakwe bonse—umutundu wa buntunse onse—insambu sha ku bumi bwa muyayaya muli paradise wa pe sonde. Adamu muli ifyo apeele ubupyani bwa lubembu, imfwa, no bulanda ku ntuntuko shakwe.—Ukutendeka 3:1-19; Abena Roma 5:12.

Yesu aishile kwi sonde mu mubili ku kunonka cipya cipya ku mutundu wa muntu ubupyani buntu Adamu alufishe. Ici alicitile pa kushininkisha uwa busumino kuli Yehova Lesa, mu kuitemenwa ukutuula umubili wakwe pa mulandu wa mutundu wa muntu. (Yohane 3:16) Pa kwikala ubumi bwapwililika, ubwabulo lubembu, Yesu anonkele insambu sha ku bumi bwapwililika ubwa muyayaya muli Paradise pe sonde—icintu cine cintu Adamu alufishe. Nangu cibe fyo, Yesu tabalile abelesha shilya nsambu; kabili tashilufishe lintu afwile kabili abuushiwe ku bumi mu mulu. E ico kuti aba na maka ya kushibomfya ngo bupyani bwaumo mutengo ukupeela ku “bana” bakwe.—Abena Roma 5:18, 19.

Abakupyana—“Abana” ba kwa Kristu

Pali Esaya 9:6 Yesu mu busesemo etwa “Wishi wa nshita pe.” Alaba Wishi wa Nshita Pe uwa calo calubulwa ica mutundu wa muntu, mu cifulo ca kupeela ubupyani kuli aba abalubulwa, nelyo abana bapokelelwa. (Mateo 20:28; moneni na kabili Ilumbo 37:18, 29.) Ici calimonwa mu kulengama mu cilayo cakwe ica kuti: “Iseni, mwe bapaalwa ba kwa Tata, [pyaneni, NW] ubufumu ubwateyanishiwe imwe ukufuma pa kulengwa kwa pano isonde.” Mu kulundako atile: “Balishuka abafuuka; pantu [bakapyane sonde, NW].”—Mateo 5:5; 25:34.

Pa kuti isonde libe ilyalinga ubupyani, nangu cibe fyo, imibele ifwile ukwaluka apakalamba—ukuletwa ku kupwililika! Lifwile ukuba icalo uko umutende wapwililika no kwikatana fyalyanana pa kati ka fibumbwa fya kwa Lesa. (Esaya 11:6-9) Ukulonsha ukuli konse ukwa kukanapwililila kwa buntunse kufwile ukufuutwa, ukusanshako ne mfwa. (1 Abena Korinti 15:25, 26) Ici cilepilibula ukuti abafwa, abali ulubali lwa mutundu wa muntu uwalubulwa, bafwile ukubuushiwa. Ni muli iyi nshila fye yeka e muntu bengakwatila ishuko lya mu nshita ku kuba impyani sha kwa Kristu.—Yonane 5:28, 29.

Muli ifyo, Ukuteka kwa Myaka Ikana Limo ukwa kwa Kristu kukaba ciputulwa ca nshita ica nsansa umo umutundu wa muntu panono panono “[ulubulwa] ku busha bwa kubola” no kufika ku kupwililika. (Abena Roma 8:21) Mu ca kusekesha, nelyo fye fitabo fya ku calo fyalishiba ici nge mifwaile ya ciputulwa ca myaka ikana limo. Webster’s Ninth New Collegiate Dictionary (ukulembwa kwa 1985) ilondolola “millennium” (iciputulwa ca myaka ikana limo) nge “ciputulwa ca nshita ica nsansa shikalamba nelyo ukupwililika kwa buntunse.”

Ukucila Ukuteka kwa kwa Solomone

Ici Ciputulwa ca bukata ica Myaka Ikana Limo kuti capashanishiwa ku kuteka kwa Mfumu Solomone ukwa mutende kabili ukwa lubanda ukwa myaka 40 pali Israele wa pa kale. (1 Ishamfumu 4:24, 25, 29) Lintu namfumu wa ku Sheba atandalile Mfumu Solomone, atile: “Cali ica cine icebo ico naumfwile mu calo candi ulwa fyebo fyobe no lwa mano yobe. Lelo nshatetekele ifyebo fyabo, nasuka naisa na menso yandi yamona. Kabili, mona, nangu hafu tabanongweleleko: amano no kuwama fyalicisha pa lulumbi ulo naumfwile. Balishuka abakashi bobe! Balishuka ababomfi bobe abeminina pe ku cinso cobe, abomfwa amano yobe!”—1 Ishamfumu 10:6-8.

Nga ca kuti umutende, ulubanda, na mano ifya kuteka kwa myaka 40 ukwa Mfumu ya pe sonde Solomone kwacilile, ee, ukucila imiku ibili, ukwenekela kukalamba ukwa kwa namfumu wa ku Sheba, lyene Ukuteka kwa Myaka Ikana Limo ukwa Mfumu Solomone iya ku mulu, iyacilapo bukulu, Yesu Kristu, mu kushininkisha kukacila ukwelenganya kwa buntunse! Mu mashiwi ya kwa Yesu umwine wine, wene ali “uwacila Solomone.” (Mateo 12:42) Esha ukubika mu cikope imibele yakwatisho butuntulu bwa bumi, ulubanda, umutende, ubulungami, ne nsansa pe sonde intu wingelenganya, kabili tawakabe na maka ya kwikata nelyo fye kaputulwa kanono aka cintu Iciputulwa ca Myaka Ikana Limo ica kwa Kristu cakwata.

Ukucitikila Pamo Ne Ciputulwa Ca Myaka Ikana Limo Icalenga Butatu?

Ifya kuponako fya calo ukutula 1914 filanga ukuti tuleikala mu “kusondwelela kwa micitile ya fintu.” (NW) Yesu mu kulundako asosele ukuti inkulo iyaampene ne fi fya kuponako fyasobelwe “tayakapite, fikasuke ifi fyonse afiisa.” Bushe ici cilepilibula, lyene, ukuti Ukuteka kwa Ciputulwa ca Myaka Ikana Limo ukwa kwa Kristu kukacitikila pamo ne ciputulwa ca myaka ikana limo icalenga butatu?—Mateo 24:3-21, 34.

Yesu asokele abasambi bakwe ukukanatunganya. Asosele ukuti: “Te cenu ukwishibe nshita nangu myaka ifyo Tata abikile mu maka yakwe.” (Imilimo 1:7) Kabili ukulosha ku “bushiku bulya na kashita” lintu ifi fya kuponako fyali no kucitika, Yesu asosele ukuti Wishi eka, Yehova Lesa, e waishibe. (Mateo 24:36) Muli ifyo, Baibolo taili ni kafwilisha wa ili yonse iya mpendwa shilekulilako isha bakasesema ba bushiku bwa bupingushi no tubungwe utusonta ku kupumikisha kwa bulya bushiku pa kati pa Bushiku bwa pa ntanshi ya Mwaka Upya, 1999, nge mpela ya calo.

Nangu cibe fyo, ifya kuponako fya calo ifilipo mu kulengama filango kuti inshita ya mpela ya iyi micitile ya mfiifi, iibifi iya fintu ‘nailunduluka’ kabili ukuti Iciputulwa ca Myaka Ikana Limo ica kwa Kristu ‘nacipalama.’ (Abena Roma 13:12) Mu cifulo ca kulatunganya ubushiku bwa cine cine ne nshita kuli ici ukwisa, nomba e nshita ya kupokelela ukwishiba kwa fifwaikwa fya kwa Lesa ku kupusunsuka. (Yohane 17:3) Muli iyi nshila kuti wasambilila ifya kuba pa kati ka abo bantu Yesu akasosako kuti: “Iseni, mwe bapaalwa ba kwa Tata, [pyaneni, NW] ubufumu ubwateyanishiwe imwe ukufuma pa kulengwa kwa pano isonde.” (Mateo 25:34) Inte sha kwa Yehova bali abaitemenwa kabili bali na maka ya kukwaafwa ukuba pa kati ka abo abakaipakisha amapaalo ya Ciputulwa ca lulumbi ica Myaka Ikana Limo icileisa.b

[Amafutunoti]

[Amashiwi pe bula 6]

“Iseni, mwe bapaalwa ba kwa Tata, [pyaneni] ubufumu ubwateyanishiwe imwe ukufuma pa kulengwa kwa pano isonde”