Bakabilisha ba Bufumu Bacita Lipoti

Ukucitilo Bunte bwa mu Lyashi Kuleta Ifisabo

YESU atendeke ukulanshanya uko ukwatungulwile ku bunte bwa mu lyashi ubwa kufumamo cimo lintu asosele ku mwanakashi umwina Samaria pa cishima ukuti: “Mpeelako, nwe.” (Yohane 4:7) Ifwe ilelo kuti mu kupalako twaba abacilapo ukufumamo cimo nga ca kuti tuli abaibukila ku mashuko yonse aya mu nshita ku kucitilo bunte bwa mu lyashi. Munyina umo mu Australia abalamwine ukulanshanya kwa mu lyashi pa kubelenga ilembo lya cila bushiku pe benci lya mu parka. Umwaume uufwaisha ukwishiba alimwene ulupapulo no kusosa ukuti aali uwa buseko na o wine mu Malembo. Taali Katolika wacincila uwasambilishiwe ukusanguka mwi sukulu lya ciKatolika kabili nomba taishibe ica kusumina. Munyina atantike ukumushitile citabo Life—How Did It Get Here? By Evolution or by Creation?a Inshiku shibili pa numa alitwele icitabo pa cifulo ca ncito ica uyu mwaume, ukusanga fye ukuti talipo. Kalemba wakwe aali mupepi no kusompole citabo, ukusosa ukuti: “Twalelolela ici citabo.”

Amaawala yabili pa numa munyina apokelele lamya ukufuma ku mwaume ukwipusha amakope yabili ayalundwako aya citabo ca Creation no kwipusha Inte ukumutandalila kwi ofesi lyakwe. Lintu munyina aile kuli lilye ofesi, asangile ulya mwaume na bambi babili abalipo. Isambililo lya Baibolo lyatendekwe na bene, ukusanshako na kalemba, kabili catantikwe ukuti munyina aleyako imiku ibili mu mulungu. Mu milungu yali ku ntanshi, cibusa mwanakashi uwa uyu mwaume, ‘Umwina Kristu wa kufyalwa libili,’ atwalilile ukutuma amakalata ya kwipusha ifipusho fya mu Baibolo. Mu kupelako, aliilundile kwi sambililo, nge fyacitile umunankwe wa mu bukwebo uwa mwaume na cibusa wakwe, uwali uwasumina mu kusanguka.

Batwalilile amasambililo yabo aya Baibolo aya lyonse pa myeshi isano, mu kuba no kusambilila kwa bubili cila mulungu ukutungululwa mu parka. Lyene kalume cibusa wa kwa kalemba ailundile kwi bumba lye sambililo. Mu kwangufyanya pa numa, umunankwe wa mu bukwebo uwa ulya mwaume uwa kubalilapo na cibusa wakwe baselele ku Idaho mu United States, uko batwalilile ukusambilila. Imilungu inono pa numa, umwaume wa kubalilapo alitununwikwe ku mweni icine cine, uwamwipwishe icacitike ku kulanshanya kwa Baibolo ukwaleba mu parka. Mu kumoneka, alekutika pa kusambilila kwabo. Ukutantika kwalicitilwe kuli wene ukusambilila na o wine.

Cinshi cali ica kufumamo ica conse ici? Imyeshi ikumi limo na cinekonsekonse ukufuma pa kukumana kwa kubalilapo mu parka, umwaume wa kubalilapo na cibusa wakwe umwanakashi, uwali kale ‘Umwina Kristu wa kufyalwa libili,’ balyupene no kubatishiwa. Kalemba na cibusa wakwe kalume na bo balyupene no kubatishiwa. Umunankwe wa mu bukwebo uwa ulya mwaume na cibusa wakwe abaile ku United States balibatishiwe, kabili umo uwa bene nomba abomba lyonse nga painiya wa kwafwilisha. Umo uwakutike ku kulanshanya kwa Baibolo mu parka alitwalilila ukusambilila kwakwe. Lyene aselele ku Ireland, kabili alelolesha ku ntanshi ku kubatishiwa mu kwangufyanya!

Conse ci cacitike pa mulandu wa kuti munyina ashukile ukutusha kwakwe ukwa pa ca kulya ca kasuba ku kucitilo bunte bwa mu lyashi, kabili Yehova alipaalile ukubombesha kwakwe. Shi na ifwe mu kupalako natushukile ishuko lya mu nshita ilili lyonse ku kwananya imbila nsuma kuli abo abali ne nsala ku bukombe bwa Bufumu bwa kwa Yehova!

[Futunoti]