Lumbanyeni Yehova Cila Bushiku
1 Lesa wesu, Yehova, ni Kabumba wa kupapusha, uwakwato kutemwa, Akamfukumfuku ka mweo ne nsansa. Mu cilolwa ca bukulu bwakwe, mu cine cine aliwaminwa ukuti ububumbo bwakwe bonse bulemulumbanya. Ngo muntu umo umo, tufwaya ukusosa nge fyasosele kemba wa malumbo uwatile: “[Ndefushapo] pe pa kumutasha; akanwa kandi kalelondololo bulungami bwenu, ukupususha kwenu, akasuba konse.” (Ilu. 71:14, 15) Pa kucite ci, tufwile ukufwayako inshila sha kulumbilamo Yehova akasuba na kasuba no kukuntwa ukulanda ifisuma pa lwa wene, ubulungami bwakwe, no kupayanya kwakwe ukwe pusukilo.
2 Abena Kristu ba mu kubangilila baimike ica kumwenako cishaiwamina mu kulumbanya Yehova. Ukukuma ku bantu 3,000 ababatishiwe pa Pentekoste, tubelenga pa Imilimo 2:46, 47 ukuti: “Ubushiku no bushiku balekoosho kulongana umutima umo mwi tempele, . . . baletonda Lesa no kukwato bubile ku bantu bonse. Awe Shikulu alalundako ubushiku no bushiku abalepusuka.” Baalesambilila icine cishaiwamina pa lwa kwa Yehova na Mesia wakwe. Ubuseko bwabo bwaleambukila, ukukoselesha fye na bambi ukukutika no kusambilila no kulumbanya Yehova.
3 Cila Bushiku Kulabako Amashuko ya mu Nshita: Ilelo abengi basange fyo kuti balumbanya Yehova cila bushiku ukupitila mu bunte bwa mu lyashi. Ukupekanishisha libela kulabaafwa ukucilapo kuba aba kusandulula. Nkashi uwali napingulapo ukwakana mu bunte bwa mu lyashi asangile ukuti umuntu umo alitobele amawindo yabili aya kuli motoka wakwe no kwibamo fimo. Aitile uwa kulungisha kabili lyene aliipekenye ukucitilo bunte kuli uyu mwaume walelungisha. Mu kupekanya kwakwe mwasanshiwe no kupepela ubutungulushi bwa kwa Yehova. Icaishilefumamo cali ca kuti, alicitile ubunte kuli uyu mwaume alelungisha motoka ukufika kwi awala no kumushalikila icitabo ca Ikala Kuli Pe na pe.
4 Nkashi na umbi lyonse alekumanya umwina mupalamano wakwe ilintu baleya baleololako amolu ne mbwa shabo. Inshita imo lintu bakumene, balandile ilyashi lyakakala pa lwa mpika sha mu bumi, kabili ico catungulwile ku kulanshanya kwalundwapo. Mu kupita kwa nshita, isambililo lya Baibolo lyalitampilwe. Ku ca kulengo buseko, umwina mupalamano pa numa asosele ukuti taali na kukutika ku Nte sha kwa Yehova nga ca kuti balimutandalile ku ŋanda ku mwakwe, apantu tasumiine muli Lesa nelyo Baibolo.
5 Bamo balacisanga ukuba icayanguka ukucitilo bunte lintu abasulwishi nelyo abantu bambi batandalila amayanda yabo. Nkashi mu Ireland atandalilwe no mwaume uwalesombola abalefwaya ukulembesha inshuwalansi wa bumi bwabo. Nkashi alondolwele ukuti alelolela ukuipakisha umweo wa muyayaya. Ici cali icipya nga nshi kuli uyu mwaume, uwakushiwe nga Roma Katolika. Apokelele icitabo ca Ikala Kuli Pe na pe, asangilwe ku kulongana umulungu wakonkelepo, kabili asumine ukusambilila Baibolo. Pali nomba uyu musulwishi ni munyina wabatishiwa.
6 Ifwe bonse tulingile ukuba abaibukila ulwa mashuko ya mu nshita aya kulumbanya Yehova cila bushiku. Cilaafwa ukusungako bamagazini banono nelyo amatrakiti pa ncende apo fingamonwa no kutambikwa bwangu ku batandashi. Mu fifulo fimo ukwikala fye inshita inono pe benci lya mu parka kuti kwakuletela amashuko yafulilako aya kucitilo bunte kuli bambi abaleisa ku kukokolokako pa kashita kanono. Inte shacaice shimo ishiya ku sukulu shilabika impapulo sha Baibolo pa desiki lyabo nge nshila ya kubalamwinamo ukulanshanya no muntu umo uwamona shene no kwipushako ifipusho. Sungila mu muntontonkanya Ilembo limo nelyo yabili ayo wingabomfya. Lomba Yehova ukukwaafwa. Ukapaalwa pa kucite ci.—1 Yoh. 5:14.