Bakabilisha ba Bufumu Bacita Lipoti

“Ilembo Lyonse Ilyo Abelengele Lyakuntile Umutima Wandi”

“ICEBO ca kwa Lesa ca mweo, kabili caliluma,” e fyasosele umutumwa Paulo. (AbaHebere 4:12) Ici cashininkishe ukuba ica cine mu bumi bwa mwanakashi ukufuma ku Vietnam uwakushiwe ngo muBuddha. Ili e lyashi lyakwe.

“Abafyashi bandi, abo bacili mu Vietnam, baBuddha ba mwi shina, e co nakushiwe ngo muBuddha ukufikila icupo candi pa mushinku wa myaka 22. Ulupwa lwa mulume wandi lwaeseshe ukumpatikisha ukubatishiwa mwi Calici lya ciKatolika. Basosele ukuti mayo-fyala uwafwa acilikilwe ukuya ku mulu pa mulandu wa kuti nali umuBuddha! Pa kubalilapo nalikeene ukucita ifyo, lelo pa numa nalibatishiwe pa kubasekesha. Nangu cibe fyo, mu mutima, nayumfwile uwabulo kupelulula nga nshi pa mulandu wa kuti napatile ubumbimunda mwi Calici lya ciKatolika. Tabwali ubwapusanako ukufuma ku butotelo bwa ciBuddha. Bwali fye ubwabimbwamo mu kupalako nga nshi mu nkondo na mapolitiki, kabili amabutotelo yonse yabili yakoseleshe ukupepa ifikolwe.

“Nga ca kuti naikele mu Vietnam, nga nali no kukwata ishuko ilinono nga nshi ilya kusambilila icine. Nakulile pa nshita lintu ukwaluka kukalamba ukwa bupolitiki kwapyangile South Vietnam, kabili naikele mwi tauni intamfu ikalamba ukufuma ku Saigon. E co cali lipaalo ukuba na maka ya kufyukila ku Australia.

“Nali umo uwa bantu bashuka abali mu bwato. Mu kuba na kanya kandi aka myeshi ibili iya bukulu mu minwe yandi, naali no kubutuka mu mfifi ukufyuka bakapokola no kunina mu bwato bunono ubwa bulondo. Pa numa ya nshiku cinelubali pali bemba, twafikile mu Malaysia, umo twaikele imyeshi inono mu nkambi sha mbutushi pa ntanshi ya kwisa ku Australia.

“Pa numa ya myaka ibili na citika mu Australia, nalitandalilwe ne Nte sha kwa Yehova mu butumikishi bwabo ubwa ku ŋanda ne ŋanda. Pa kutandala kwa kubalilapo, napokelele isambililo lya lyonse ilya Baibolo pa mulandu wa kuti namwene ici nga ishuko lya mu nshita ilisuma ku kusambilila iciNgeleshi. Lelo imyendele ya kwa Nte wansangile ne cine cintu ansambilishe fyalinjebekeshe apakalamba. Ilembo lyonse ilyo abelengele lyakuntile umutima wandi, kabili nshali na kumona ubumbimunda mu kuteyanya kwa kwa Yehova. Pa numa ya kusambilila Baibolo pa mwaka umo na citika, napeele ubumi bwandi kuli Yehova kabili nalibatishiwe.

“Mfwile ukusoso kuti icine calyalula imimwene yandi yonse iya bumi. Umulume wandi tasumina, lelo Yehova alingafwa no kuntungilila, capamo no lupwa lwandi ulunono. Aliba ni Kasambilisha wandi Mukalamba kabili alinsambilisha ukuba umukashi wawaminako na nyina. Ndatwalilila ukutasha Yehova ukuti alingafwa ukufuma ku mfifi ya ku mupashi ukwingila mu lubuuto lwa cine ca Baibolo.”

Mu cine cine, Icebo ca kwa Lesa icapuutwamo calilumine ku busuma muli uyu mulandu. Ukusambilila Baibolo no kubomfya icasambililwa cipeela ubupilibulo ne mifwaile ku bumi kabili citungulula ku bumi bwa ciyayaya mu calo cipya ica kwa Lesa. Nga fintu Lesa apuutilemo Mose ukulemba ukuti, “te cintu ca fye kuli imwe; mweo wenu.”—Amalango 32:47.