Cinshi Mukasosa ku muBuddha?
1 Mu fyalo fimo ukucila pali hafu wa balebatishiwa bali baBuddha. Cinshi cilebaleta ku cine? Bushe kuti mwashimikila shani imbila nsuma ku muBuddha?
2 Langeni Ukwangwako kwa Cine Cine: Abengi abali kale abaBuddha batila ukupelulula kusuma te kwabaletele ku cine. Lelo, icabafikile pa mitima cali kwangwako kwa cine cine kuntu balangilwe. Umwanakashi umwina Asia uwaleikala ku United States alitemenwe sana bucibusa bwa kwa nkashi uwaile pa mwakwe ica kuti alisumine ukusambilila. Taishibe ukulanda bwino iciNgeleshi, lelo nkashi alimutekanishishe. Ilyo alesanga ulya mwanakashi nanaka nelyo talefwaya ukusambilila, nkashi aleishako fye nankwe no kutantika ukuti bakasambilile limbi. Kwi pele pele ulya mwanakashi, bamwane babili abaume, na banyina abakote balibatishiwe. Alibwelelemo ku calo uko atuntwike kabili alyafwilishe bambi abengi ukusambilila icine. Umwana wakwe umo umwaume nomba abomba pa Bethel. Mwandi yali mapaalo ayafumine mu kulangisha “icongwe no kutemwa abantu” ukwa kwa Yehova!—Tito 3:4.
3 Imfundo sha baBuddha: AbaBuddha ilingi line tabakaana imfundo shimbi, lelo tabacimona icakabilwa ukukonka fye icifundisho cimo. E co ifisumino fyabo fyalipusanapusana. Umutwe umo uwaseeka mu cisambilisho cimo ica buBuddha usoso kuti ubumi bwalisulamo amacushi, lelo ukupitila mu kushilimunwa, umo kuti acilima ukukonkanyapo ukufyalwa cipya cipya mu bumi bwabipa. Cisoswo kuti pa kulubuka ku kufyalwa cipya cipya, umo afwile ukufikilisha ubuyo bwa Nirvana, iili mibele iishingalondololwa pantu Nirvana te cifulo nelyo icintu icicitika lelo, yaba mibele umushaba ukukalipwa no bubifi. (Moneni Cinshi Cicitika Nga Twafwa?, amabula 9-10.) Cinshi ici citusambilisha? Citusambilisho kuti ukukansana na bantu pa lwa mfundo sha baBuddha tacingatwafwa. Lelo, landeni pa mafya ayasakamika bonse.
4 Komaileni pa fyo Bonse Tufwaya: Apantu abaBuddha batila ubumi bwa pe sonde bwa macushi, ukulanda pa lwa bumi bwa muyayaya pe sonde te kuti cimoneke icabamo amano kuli bene. Nalyo line, ifwe bonse tulafwaisho kuipakisho bumi bwa lupwa ubwa nsansa, tulafwaya amacushi ukufumishiwapo, no kwishibo bupilibulo bwa bumi. Moneni ifyo mwingakomaila pa fintu ifyo bonse tukabila.
5 Nalimo kuti mwatendeke fi:
◼ “Ilelo twikala mu calo umo abantu abengi abakaele balecula. Bushe kuti mwatila cinshi cikabilwa pa kupwisha ukukalipwa no bulanda kuli bonse? [Lekeni aasuke.] Kwaliba ubulayo bwa kale ubunsansamusha icine cine. [Belengeni Ukusokolola 21:4.] Kwena, ilya nshita icili tailaisa, lelo lintu ikesa, kuti twatemwa ukuimona, bushe te fyo?” Lyene tambikeni ulupapulo ululondolola fintu ukucula kukapwa.
6 Ku mukalamba, kuti mwatila:
◼ “Napamo na imwe namusakamikwa nga ine pa lwa mano ayabotelela ayafulile pali ndakai kabili ayalesonga abana besu. Mulandu nshi bucisenene bufulile fi ku bacaice? [Lekeni aasuke] Bushe mwalishibo kuti ici calisobelwe mu citabo icatendeke ukulembwa kale ilyo imipepele ya baShilamu, Abena Kristu, na baHindu ishilabako? [Belengeni 2 Timote 3:1-3.] Moneni ukuti iyi mibele icili iletwalilila nangu ca kuti abantu baleya baleishibilapo ifingi. [Belengeni icikomo 7.] Ulu lupapulo lwalingafwile ukumfwikisha icine ico abengi bashaishiba. Bushe kuti mwatemwa ukulubelenga?” Tambikeni icitabo nelyo broshuwa uwingalinga.
7 AbaBuddha balicindika Baibolo ukuti citabo cashila. E co ibelengeni mu kulungatika. (Heb. 4:12) Nga ca kuti umuntu atwishika intambi sha basungu, mwebeni ukuti bonse abalembele Baibolo bali bena Asia.
8 Ni Mpapulo Nshi Shingabomba Bwino? Kwaliba trakiti wa Will Suffering Ever End? uwalembelwa maka maka abaBuddha, kabili uwapulintwa mu cina China, icina Japan, icina Sri Lanka, ne cina Thailand. Ukulundapo, bakasabankanya abengi balibomfya bwino impapulo shakonkapo: ifitabo fya Icaba Inkaama ku Nsansa sha Lupwa, Ifipusho Abacaice Bepusha—Ifyasuko Fibomba, na Ukusapika Lesa Ukwa Mutundu wa Muntu; babroshuwa Cinshi Caba Imifwaile ya Bumi—Ni Shani Wingaisanga?; na “Moneni! Ifintu Fyonse Nafilenge Fipya,” kabili, kuti mwabomfya trakiti wa Imbila ya Bufumu Na. 35, Bushe Abantu Bonse Bakatala Abatemwana? nga epo acili. AbaBuddha abengi abalesambilila icine batendeka muli broshuwa Cintu Lesa Afwaya no kulekelesha mu citabo ca Ukwishiba.
9 Nangu cingati bamishonari ba ciBuddha bafikile mu Atena mupepi ne myaka 400 ilyo Paulo ashilashimikilamo, tacaishibikwa bwino nampo nga alibalile akumanyapo umuntu uwaambukilwe ku mfundo sha baBuddha. Nangu cibe fyo, twalishiba fintu Paulo ayumfwile pa lwa kucitilo bunte ku bantu abalekanalekana. Aicitile “ubusha kuli bonse” pa kuti ‘apusushishemo bamo.’ (1 Kor. 9:19-23) Ilintu tulecitilo bunte kuli bonse tukumanya kuti twacita cimo cine ukupitila mu kwangwa abantu no kupitila mu kukomaila pe subilo ilyo bonse tufwaya.