Bushe Uleibukisha?
Bushe walisanga ishafuma sha nomba line isha Ulupungu lwa kwa Kalinda ukuba isha mutengo ubomba kuli iwe? Lyene mulandu nshi tekwesesha ukwibukisha kobe ne fyakonkapo:
▫ Cinshi caali imifwaile ikalamba iya kundapa kwa kwa Yesu?
Kwalangishe, ku kukoseleshiwa kwe bumba likalamba ilya bantu bapale mpaanga ilelo, ukuti bakapusunsuka ba Armagedone bakondapwa mu kwangufyanya mu kulinganishiwako pa numa ya Armagedone. (Esaya 33:24; 35:5, 6)—12/15, ibula 12.
▫ Mulandu nshi tukabila ica kucinkulako ca cila nshita: “Ku kupepa mube aba mukoosha”? (Abena Roma 12:12)
Ifya kutitikisha fya bumi ne fishingamo pambi kuti fyatufinina nga nshi pa nshita shimo ica kuti twalaba ukupepa. Nelyo impika kuti pambi shatucimfya, ukutulenga ukuleka ukusekelela mwi subilo lya Bufumu, nelyo fye ukuleka ukupepa. Muli ifyo, tukabila ifya kucinkulako ifitukoselesha ukupepa kabili muli iyi nshila ukupalamina lyonse fye kuli Yehova.—12/15, ibula 14.
▫ Cinshi cishininkisha ukuti Ilyeshi lya mu kasuba ka kwa Noa lyashile icifwati cishingafuutwa pa mutundu wa muntu?
Calitunganishiwa ukuti imilumbe ya Lyeshi ukucila pali 500 yalishimikwa ne mikowa na bantu na bantu ukucila pali 250. Ukupalana kumo ukukalamba kuti kwasangwa muli yonse iyi milumbe.—1/15, ibula 5.
▫ Ni shani fintu bakasesema ba bufi ilelo bapala abo aba mu nshita ya kwa Yeremia?
Bakasesema ba bufi aba lelo baitunga ukwimininako Lesa, lelo baleba amashiwi ya kwa Lesa pa kushimikila ifintu ifipumbula abantu ukufuma ku fintu Baibolo isosa mu cituntulu. Ukucilisha ici cili ica cine ukukuma ku cisambilisho ca Bufumu. (Yeremia 23:30)—2/1, ibula 4.
▫ Cilola mwi lintu umo abatishiwa mwi shina lya mupashi wa mushilo?
Ici cilola mu kuti umo uulebatishiwa napampamina pa kubombela pamo no mupashi, ukukanacita icili conse ku kucilikila imibombele ya uko pa kati ka bantu ba kwa Yehova. E ico, uyo muntu afwile ukubombela pamo no musha wa cishinka kabili uwashilimuka kabili pamo no kutantika kwa baeluda mu cilonganino. (AbaHebere 13:7, 17; 1 Petro 5:1-4)—2/1, ibula 18.
▫ Mulandu nshi ukupepa kwa fipasho kwaba ukwa konaula nge fyo kuli kapepa?
Baibolo ilanga ukuti ifipasho fya kuselausha kuli Yehova Lesa kabili tafyaafwa abaipelesha kuli fyene ukupalama kuli Lesa. (Amalango 7:25; Ilumbo 115:4-8) Satana Ciwa “apofwishe imintontonkanya” ya bantu ukuti icine “cibalika.” (2 Abena Korinti 4:4, NW) E co lintu aleshinshimuna icipasho, umo mu cine cine alebombela amabuseko ya fibanda. (1 Abena Korinti 10:19, 20)—2/15, amabula 6-7.
▫ Mulandu nshi untu impaanga shamwenwe nge cikwatwa ca mutengo mu nshita sha Baibolo?
Amasako yali cikwatwa ca kuipyanikapo mu kutwalilila kabili yali no kubomfiwa ku kupanga ifya kufwala fya lupwa nelyo yali no kushitishiwa. Insengo sha basukusuku shalebomfiwa ku kupeela icishibilo ca Ntandala nelyo shali no kubomfiwa ku kubilisha inyenjele nelyo ukutungulula ukucenjelela kwa nkondo. Apantu impaanga shali ni shimo isha nama shasanguluka isho abena Israele baali no kulya, umukuni wa mpaanga waebekeshe ukupayanya kwa fya kulya, kabili lyonse wapayenye ishiba lya mukaka uwa kunwa nelyo kupangila cisi.—3/1, amabula 24-5.
▫ Cinshi cintu bakatemwa ba kwa Lesa balefwaya lintu bapepela Ubufumu bwa kwa Lesa ukwisa? (Mateo 6:10)
Baleipusha ukuti Ubufumu bwa kwa Lesa ubwa mu mulu bubuule incitilo yakapeleko pa konaula imicitile ya makamfulumende yapangwa no muntu, ayafilwa ukwikalilila ku cilayo ca yako ku kuleta umutende no mutelelwe. (Daniele 2:44)—3/15, ibula 6.
▫ Ni bani bali Bandubulwila, kabili bushe basambilishe Bulesa Butatu?
Bandubulwila baali abe calici abaikele mu ciputulwa ca kulekeleshako ica mwanda wa myaka walenga ibili. Balembele ku kupokolola ubuKristu ubo baishibe mu kulwisha amano ya buntunse aya bulwani ayaanene mu calo ca ciRoma. Takwaba nangu umo uwa bene uwasambilishe Bulesa Butatu.—4/1, ibula 24-9
▫ Bushe Sekaria, wishi wa kwa Yohane Kabatisha, alicitilwe bunkomamatwi na bucibulu, nga fintu Luka 1:62 amoneka ukulangilila?
Gabriele asosele ukuti ukulanda kwa kwa Sekaria kwali no kwambukilwa, te kumfwa kwakwe. (Luka 1:18-20) Luka 1:64 alondolola ukuti: “Awe apo pene akanwa kakwe [aka kwa Sekaria] kalicilwilwe; no lulimi lwalikakwilwe, kabili alalanda.” Moneni, takuli ukulumbulwa ukucitilwe pano pa lwa kumfwa kwakwe ukwambukilwa mu nshila iili yonse. Ukulumbulwa kwa ‘kucebusha’ pali Luka 1:62 pambi kuti kwapilibula ukuti ukubomfya icilundwa ca mubili kumo kwalicitilwe ku kuletako ukupingulapo kwa kwa Sekaria.—4/1, ibula 31.