Bakabilisha Ba Bufumu Bacita Lipoti
Icine ca Baibolo Calubula Umushimbe Mwanakashi wa Butotelo mu Bolivia
ABANTU abengi aba mitima ya bufumacumi balefuma mu butotelo bwa bufi, balesambilila icine ca Baibolo, kabili baleisa mu kupepa Yehova, Lesa wa cine. Ukucila pali 7,600 balicita ifyo mu Bolivia, ukusanshako no mushimbe mwanakashi wa butotelo.
Lintu ali fye ne myaka ya bukulu pabula, M—— akumenye Inte sha kwa Yehova mu kubalilapo. Aiswile ciibi cakwe lintu Inte baishile pa mwakwe, kabili pa muku wa kubalilapo, aumfwile ishina lya kwa Lesa, Yehova, ukushimbulwa. Lyalambatile ku muntontonkanya wakwe pa myaka.
Apantu ali fye e mukashana eka mu lupwa, capingwilwepo ukuti alingile ukuba umushimbe mwanakashi wa butotelo. “Fintu nali uwa nsansa ukuti naali no kuba mu mulimo wa kwa Lesa—kwena, ifyo e fyo natontonkenye,” e fisosa M——. Lelo ubuseko bwakwe bwayalukile mu bulanda lintu amwene ulufyengo na kapaatulula ukucitwa mu ŋanda ya bashimbe banakashi aba butotelo. Asosa ukuti: “Nakalimo nshakabale ndaba ifyo ifiputulwa fya nshita ifya kubombomana ne sho mpumo sha ku mubili ne sha ku mupashi ifyo fyali ifya kulengo kushikitika, ukunenga ukumona Lesa, te pamo nga Umo uwa kutemwa, lelo nga Umo uukanda ukwabula icililishi.”
Atwalilila ukuti: “Ukufika pa nshita nabele umushimbe mwanakashi uwa butotelo, nshatungulwike mu kusanga ishina Yehova muli Baibolo. Nasangile fye ‘Yahweh,’ kabili ico calimpelengenye. Kasuba kamo nalile fye na mu kufwaya abo abantu abalanda ulwa kwa Yehova, lelo nshabasangile.
“Inshita yalipitilepo, kabili ubushiku bumo lintu naleya ku ŋanda ya lupwa lwandi, namwene icishibilo, ‘Iŋanda ya Bufumu iya Nte sha kwa Yehova.’ Nalefwaya ukubeba ukuti bali ni bakasesema ba bufi, lelo takwali uuli onse uwali muli iyo ŋanda. Nalibweleleko pa Mulungu. Ukulongana kwalecitwa, kabili abafulilako bamoneke ukupapushiwa ukumona umushimbe mwanakashi uwa butotelo mwi bumba nafwala uniformo yakumanina. Pa numa ya kulongana, naeseshe ukufuma mu kwangufyanya. Nangu ni fyo, umo Nte alimposeshe, e co nalimwipwishe ukuti, ‘Mulandu nshi mupontela Uwashila pa kulangisha ilyo ishina?’ Icipusho candi catungulwile kwi sambililo lya Baibolo, kabili namutantikile ukuti engantandalila pa ŋanda ya lupwa lwandi. Abafyashi bandi balimutamfishe. Nangu cibe fyo, twalikumene na kabili imyeshi ibili pa numa, kabili alindalike ku mwakwe kwi sambililo lya Baibolo. Nalyebekeshiwe ku fyebo anangile, ukushinina ukuti Abena Kristu balingile ukubomfya ishina lya kwa Lesa. Ubo bushinino bwampeele ubukose bukabilwa ku kukaana ifintu fya fye fyonse ifyo nasambilishiwe pamo nga umushimbe mwanakashi uwa butotelo.
“Ndebukisha ifintu ifingi pa lwa bumi bwandi mu ŋanda ya bashimbe banakashi aba butotelo. Ku ca kumwenako, inshita imo nakabile ifya kulya fyafulilako. E co nalilembele kalata no kwipusha abafyashi bandi ku kuntuminako fimo, ukwabulo kwishiba ukuti amakalata yalebebetwa pa ŋanda ya bashimbe banakashi aba butotelo. Pa ca kulya cakonkelepo, umukate uwingi nga nshi na jelly (ifya kulya fyalowa) fyabikilwe pa ntanshi yandi, kabili napatikishiwe ukulya fyonse. Nomba nali ne fya kulya fyacishamo. Nalumbulwile ici ku fibusa fyandi, kabili umo atubulwile ukuti nshonaule umukate uyo nshali na kulya no kuusalanganya pa nshi. Lintu nacitile ico, umushimbe mwanakashi uwa butotelo apo pene alimfyambete no kumfubula pa nshi, mu kuba ne cipope cakosa ica kuti ningile ukumyanga pa nshi ya muputule ponse ukuba apa busaka no lulimi. Umuputule wali uukalamba. Ilintu naleumfwila icipope, naumfwile ukusekela mu kati ukwingi no kuseka—takwaliko uluse ululi lonse ulwalangilwe.
“Nomba kuti namona fintu cili ica buseko ukuba umuntungwa ukufuma kuli conse ico. Nga fintu cingenekelwa, uku kulubulwa kwabimbilemo amalambo. Ku cintu cimo, tata alintamfishe mu ŋanda. Nangu ni fyo, pa ntanshi ya kufuma mu ŋanda ya bashimbe banakashi aba butotelo, nalikwete ishuko lya kwaafwa abashimbe banakashi aba butotelo bambi abacaice ukusambilila icine. Ndasekelela ukusosa ukuti bamo aba ifwe twalipeela ubumi bwesu kuli Yehova Lesa!
“Pa numa nafumine ku ŋanda ya bashimbe banakashi aba butotelo, cali icakosa kuli tata ukumfwikisha umulandu nakaanine incito sha malipilo yasuma lelo isha kupoosa inshita. Nangu cibe fyo, nafwaile inshita yakulilako ku mulimo wa kwa Lesa. Nomba ndabomba nga painiya wa nshita yonse, mu kuba no bumi bushapikana lelo ubwa kulambula nga nshi. Kabili ku buseko bwandi ubukalamba, mayo na bamunyina baliilunda kuli ine mu mulimo wa kwa Yehova.”
Mu cine cine, icine ca Baibolo cilalubula umo ukufuma kuli iyi micitile ya butotelo bwa bufi ubwa calo, kabili cilaleta ubuseko bwatwalilila ne nsansa.—Yohane 8:32.