Bakabilisha Ba Bufumu Bacita Lipoti

Inte sha kwa Yehova Bashimikila mu Lyashi mu Kuba ne fya Kufumamo Fyawama

ABANTU abengi baishibishiwe mu kubalilapo ku cine ca Baibolo lintu umo uwa Nte sha kwa Yehova ashimikile kuli bene mu lyashi. Muli ici Inte bakonke ca kumwenako ca kwa Yesu Kristu, uwashimikile mu lyashi ku mwanakashi umwina Samaria pa cishima lintu aishile ku kutapa amenshi. (Yohane, icipandwa 4) Mu Africa wa ku Kabanga, umo uwa Nte sha kwa Yehova ashimikile mu lyashi ku mushimbe mwanakashi uwa butotelo uwa ciKatolika. Iofesi lya musambo wa Watch Tower Society lyashimika icafuminemo:

◻ Mu kubangilila ulucelo lumo mu nshila pa kuya ku tauni, Nte akumenye umushimbe mwanakashi uwa butotelo uwa ciKatolika. Akwete ishuko lya mu nshita ukwipusha umushimbe mwanakashi uwa butotelo ukuti: “Ni kwi uleya ino nshita ya kasuba?” Icasuko cali ca kuti: “Ndeya mu kupepa kuli Lesa wandi.” Lyene aipwishe umushimbe mwanakashi uwa butotelo ukuti: “Bushe walishiba ishina lya kwa Lesa obe?” “Bushe ishina lyakwe te Lesa?” e fyayaswike umushimbe mwanakashi uwa butotelo. Nte aipwishe ukuya ku ŋanda ku mwakwe cilya cungulo kasuba ku kulanshanya ishina lya kwa Lesa. Pa numa ya kulanshanya umushimbe mwanakashi uwa butotelo aile kwi calici lyakwe no kwipusha umo uwa bashimapepo nga ca kuti alishibe cintu ishina “Yehova” lyaiminineko. Icasuko cali ca kuti, “Lishina lya kwa Lesa.” Umushimbe mwanakashi uwa butotelo alipapushiwe nga nshi pa kumfwa ukuti shimapepo alishibe ici lelo tabalile acisambilisha kuli wene.

Nte atandalile uyu mwanakashi inshiku pabula mu kukonkana kabili amusambilishe icine pa lwa Bulesa Butatu, umweo, umulilo wa helo, ne subilo lya bafwa. Umwanakashi alyumfwikishe fyonse kabili lyene aipwishe Inte ukumupeele nshita imo ukubelebesha pali fyonse fi ifisambilisho fipya. Pa numa ya milungu ibili akumenye Nte na kabili no kwipusha ukukwata ukulanshanya kwalundwako. Pali ino nshita uyu mushimbe mwanakashi uwa butotelo alipingwilepo ukufuma mwi calici kabili kale kale aali naonaula ifipasho fyakwe, bakolona, no musalaba. Shimapepo aeseshe ukumunashanasha ukubwela, lelo aali uwapampamina pa kusupile cine. Pa numa alibatishiwe kabili alibomba nga painiya wa kwafwilisha uwa lyonse pa myeshi iingi te mulandu no butuntulu bwakwe ubwa bumi ubwabipa no mushinku watantalila.

Apantu iŋanda yakwe ikalamba, atambike yene ku cilonganino ukubomfiwa nge Ŋanda ya Bufumu. Bamunyina bapyanikepo umutenge wa kale, ukubongolola ifibumba fya mu kati, no kupanga iciputulwa cikalamba ica cikuulwa ukuba icifulo ca kulonganinamo ica kucebusha. Uyu uwali kale umushimbe mwanakashi uwa butotelo uwa ciKatolika ekala mu muputule ku numa ya ŋanda ya kulonganinamo. Aliba uwa nsansa nga nshi pa kuba na maka ya kucita uku kusangwilako ku kupepa kwa kwa Yehova.

◻ Icakukumanya na cimbi icilanga amano ya kucitilo bunte bwa mu lyashi cafuma ku Kampala, Uganda. Mu nshila pa kuya kwi ofesi lya kamfulumende, mishonari Inte alandile mu lyashi kuli abo abali nankwe mu cikwepe. Umwaume umo, Mr. L————, alumbulwile ukufwaisha ukupoka icitabo catambikwe lelo taali na kucipoka pali kalya kashita. E co apeele mishonari ishina lyakwe na adresi ye ofesi lyakwe. Pa numa mishonari aile kulya no kwipusha ulwa kwa Mr. L————. Alitilwe lelo ku kupapushiwa kwa kwa mishonari, umwaume wapusanako alimonekele. Kwali abaume babili abe shina limo line abalebomba muli lilye ofesi. Ubunte ubwipi bwalipeelwe kuli Mr. L———— wa cibili, kabili alangile ubuseko bushili bwa lyonse. Ilintu Mr. L———— wa kubalilapo alufishe ubuseko, isambililo lya Baibolo lyalitendekwe na Mr. L———— wa cibili. Nomba ali ni Nte yabatishiwa, kabili umukashi wakwe no mwana mwaume wakwe balecito kulunduluka kusuma ukulola ku lubatisho.

Yesu Kristu ni Kacema Musuma kabili alishiba abapale mpaanga abo imitima yabo yakongamina ku bulungami. Ifi fyakukumanya filangililo kuti alatungulula abakonshi bakwe ku ba musango uyo. Ukushimikila kwa mu lyashi kuti kwaletako ifisabo!—Yohane 10:14.