Bakabilisha ba Bufumu Bacita Lipoti

Umushimbe Mwanakashi uwa Butotelo pa Myaka 25 mu Kupelako Asambilila Icine

BAIBOLO yasobele ukuti “ibumba likalamba” ukufuma mu nko shonse lyali no kwisa no kupepa pe tempele lya ku mupashi ilya kwa Yehova. (Ukusokolola 7:9) Ici cilecitika ilelo, kabili tulasekelela ukumona ukuti abengi, mu kuba no kwaafwa kwa cine ca kwa Lesa, muli fyo baleputula iminyololo ya butotelo bwa bufi. Ifyakukumanya fikonkelepo filelangilila ici.

◻ Umwanakashi mu Rome, Italy, ashimika ukuti: “Ukufuma pa nshita nali umunono ukufwaisha kwandi ukwakulisha kwali kwa kuba umushimbe mwanakashi uwa butotelo, apantu nafwaishe no mutima wandi onse ukubombela Lesa. Nali na maka ya kufikilisha ukuibililika kwandi pa myaka ya bukulu 32, pa December 8, 1960, lintu nabuulile imilapo yandi iya kubalilapo iya cumfwila, ubupiina, no musangwela. Ukupeelwa kwandi ukwa mulimo kwali kwa kusakamana akasuba no bushiku mupepi na bana 30 abapiina kabili abalekeleshiwa abaali inshiwa nelyo abana ba bafungwa. Nasangile ukwikushiwa mu kupeelwa kwandi ukwa mulimo.

“Icitetekelo candi calitenshiwe pa numa ya myaka ikumi iya mulimo lintu ukukansana kwaimine mu kati na nkati ka caimikwa. Nalipapile, nga ca kuti Lesa aletutungulula, engasuminishisha ukukansana kwa musango uyo ne cimfulumfulu mu ŋanda yakwe ine.”

Uyu mushimbe mwanakashi wa butotelo akwete nkashi nankwe uwaleikala mu France kabili aali umo uwa Nte sha kwa Yehova. Acitile ubunte kuli uyu umushimbe mwanakashi wa butotelo mu makalata kabili amutumine New World Translation of the Holy Scriptures. Uyu mushimbe mwanakashi wa butotelo ashimika ukuti: “Pa numa ya myaka 23, uko kwali e kukumana kwandi ukwa kubalilapo ne Cebo ca kwa Lesa.” Lyene cali e iyo nshita apokelele isambililo lya Baibolo ne Nte sha kwa Yehova. Asoso kuti: “Ilyo nalelunduluka mwi sambililo, naishibe Yehova Lesa ne fifwaikwa fyakwe pamo pene ne mibele yakwe iya kupapusha. Nayumfwile uwabipilwa lintu naishibe ukuti tasuminisha ulwa kubomfya kwa fipasho, apo ici caimikwa caiswilemo ifipasho fya cipimo conse no musango. Naumfwikishe ukuti nga ca kuti nalefwaya ukutemuna Yehova, nshali no kwikala muli cilya cifulo. Pa numa ya myaka 25 iya mulimo waipeelesha ngo mushimbe mwanakashi wa butotelo, nalisangile icine mu kupelako. E co pa October 1, 1985, napeele icishibisho candi icakufumako, ku kutulumushiwa kukalamba ukwa bakalamba bandi abe calici.

“Bamunyinane ne nkashi abakwato kutemwa balingafwile ponse pabili lwa ku mupashi na lwa ku mubili. Ukutasha kuli Yehova no kuteyanya kwakwe, nalibatishiwe pa August 30, 1986, no kutendeka pa musebo ku bumi bwa muyayaya.”

Yehova Apaala Ukufwaisha kwa wa Myaka Yacile Kumi ku Kubombela Lesa

◻ Kafundisha wa pa sukulu mu Brazil uwali umo uwa Nte sha kwa Yehova amwene ilintu alelungika amapepala ye sukulu ukuti umusambi umo uwa myaka ya bukulu 14 alembele ulwa kufwaisha kwakwe ukwa kusambilila ifyafulilako pa lwa kwa Lesa. Atendeke isambililo lya Baibolo no musambi, lelo ilyo uyu mukashana alelunduluka, ulupwa lwakwe ulwa ciKatolika lwabindile isambililo kabili baonawile impapulo shakwe. Umusambi wacaice atendeke ukusambilila Baibolo mu kati ka nshita ya kutubilisha kwe sukulu, lelo alisangilwe. E co isambililo lyalitwalilile ukupitila mu kulembeshanya amakalata. Mu kwangufyanya, nangula ni fyo, ulupwa lwasangile amakalata yakwe no kuyoca. Wishi atendeke ukumupatikisha ukuya ku Minsa. Aile na bo lelo asendele kope wa Ulupungu lwa kwa Kalinda uwa kubelenga mu kati ka mapepo, ukuufisa pa kati ka mabula ya katabo ke calici. Ici catwalilile pa myeshi mutanda, ukufikila ubushiku bumo alyongolweke ukufuma pa mwabo ukuya ku Ŋanda ya Bufumu. Mu kati ka kulongana wishi amonekele pa mwinshi kabili aebele bamunyina ukweba umwana mwanakashi wakwe ukuti aali no kumuma lintu afikile ku ŋanda. Ukubombesha kwa bamunyina ku kupelulushanya nankwe kwalifililwe.

Ubushiku bwakonkelepo, uwa nsansa kabili uwamwentula mwentula, aile ku kumona bamunyina. Abalangile ifilaso ifingi pa mubili wakwe umo wishi amupumine. Mulandu nshi, lyene, aali uwa nsansa? Pa numa ya kufuma ku Ŋanda ya Bufumu, wishi aipwishe abantu abafulilako mwi tauni ukusanshako mwine musumba, pa lwa busuma no bubi bwa kuba kwa mwana mwanakashi wakwe umo uwa Nte sha kwa Yehova. Mwine musumba atile Inte baali bantu basuma, abawaminwa ukucetekela. Alundileko ukuti bakwete imibele yawamisha no kuti kuti cabe cisuma nga nshi ukukwata umwana wakwata ifi fipimo, ifyo fyali ifyasumbukisha ukucila ifyo ifya misepela mu cinkumbawile.

Te mulandu ne ci, umukashana alipuminwe. Lelo wishi amwebele ukuti alemuma pantu ashiile iŋanda ukwabula ulusa. Kabili atile aali no kumuma na kabili nga ca kuti alekele ukusambilila Baibolo nelyo ukusangwa ku kulongana kwa Nte sha kwa Yehova! Umwana mwanakashi nomba ni kasabankanya wapimpa, kabili bamo aba lupwa lwakwe balelanga ubuseko mu cine.

Mu cine cine, Yehova apaala abacaice abakwata ukufwaisha kwafumaluka ukwa kumubombela, nga fintu ici cakukumanya cilelanga.—Ilumbo 148:12, 13.