Amabungano ya Citungu aya “Ukusambilisha kwa Bulesa”

BONSE abo bafwaisha ukusambilishiwa na Yehova balelolesha mu kuswatuka ku ntanshi ku Mabungano ya Citungu aya “Ukusambilisha kwa Bulesa.” Programu wa nshiku shine akebekesha imbali shacindama isha kusambilisha kwa mu Malembo isho shicingilila Abena Kristu muli ishi nshita sha mpika shilekulilako isha pa lwa umo umo ne cimpungili ca mu calo. Programu ikabaafwa ukukaanya mu kushangila ‘icili conse icapusana ne sambilisho ilituntulu’ no kuba bakasambilisha bawaminako aba Cebo ca kwa Lesa.—1 Timote 1:10.

Mwandi fya kumwenako fyawama twakwata ifya kupashanya! Kasambilisha Wakulisha te umbi ukucila pali Yehova Lesa umwine! Muli ifyo, Elihu mu kulungika asosele kuli Yobo ukuti Yehova “[eutulengo] kwishibo kucile nama sha mu mpanga, no kutulenga aba mano ukucile fyuni fya mu lwelele.” Na kabili aipwishe ukukuma kuli Yehova ukuti: ‘Ni ani [kafundisha, NW] nga wene?’ (Yobo 35:11; 36:22) Lesa aloshiwako pali Esaya 30:20, (NW) pamo nga “Kafundisha Mukalamba.”

Uwa bubili kuli Yehova eka nga kasambilisha ali ni Yesu Kristu. Aishibikwe nga “Kasambilisha” kabili nga “Kafundisha,” (NW) ukuloshiwako muli uyo musango imiku imo 50 mu Malandwe. Te mulandu no bwingi bwa kuposha kwakwe ukwa kucincimusha ne fipesha amano fimbi, Yesu taishibikwe nga Shiŋanga wa fya cipatala lelo nga Kasambilisha, Kafundisha.—Mateo 8:19; Luka 5:5; Yohane 13:13.

Mu kulingisha, Yesu asambilishe abasambi bakwe na batumwa ukuba bakasambilisha nga fintu aali. Kuti twamona ici ukufuma muli Mateo 10:5 ukufika ku 11:1 na Luka 10:1-11. Mu kwipipa pa ntanshi talanina ukuya ku muulu, Yesu apeele abasambi bakwe umulimo wa kusambilisha uwaishibikwa bwino uwalembwa pali Mateo 28:19, 20. Ibuuku lya Imilimo, capamo na makalata yapuutwamo ayakonka pali lyene mu Malembo ya Bwina Kristu aya ciGreek, lishimika fintu mu kubamo kupimpa, mu kulamuka, kabili mu busumino abakonshi ba mu kubangilila ba kwa Yesu bapwishishishe uyu mulimo wa kusambilisha.

Uyu mulimo wa kusambilisha uli uwe pamfya nga nshi ilelo ukucila na kale lyonse. Tuleikala mu nshiku sha kulekelesha isha iyi micitile ya fintu, kabili pa mulandu wa ico, ubumi nabubimbwamo. Pa kuti abantu beakanako mu membu sha kwa Babiloni Mukalamba no kupokelela ulubali lwa finkunka fyakwe, bafwile ukusambilishiwa no kwaafwiwa ukufuma muli Babiloni no kupingulapo ukubombela Yehova no Bufumu bwakwe.—Ukusokolola 18:4.

Pa kwaafwa bonse aba Nte sha kwa Yehova mu kubombesha kwabo ku kupwishishisha umulimo wabo uwa kusambilisha, Yehova ukupitila mu kuteyanya kwakwe napayanya Amabungano ya Citungu aya “Ukusambilisha kwa Bulesa.” Aya mabungano ya nshiku shine yakatendeka mu Ciputulwa ce Sonde ica ku kapinda ka ku Kuso mu kubangilila kwa lusuba. Shi umubomfi waipeela umo umo uwa kwa Yehova nashininkishe ukuti asangwa mu kucefyako kuli limo ilya aya mabungano, ukubapo no kupeelako ukusakamana ukufuma ku lwimbo lwa kwiswila ne pepo pali Cine icungulo ukufika kwi pepo lya kwisalila pa Mulungu icungulo.