Bushe Ukucimfyanya E Lufungulo ku Kutunguluka?

‘UKUCIMFYA e cintu cacindamisha pali fyonse.’ Ilelo abengi bekalila kuli ayo mashiwi, ilingi line ayasoswa ukuti yalandilwe na kafundisha wa cangalo ca football uwa ku America, Vince Lombardi. Nomba, ifyalo ifyali kale ifya ciKomyunisimu fyaliilunda ku kulumbanya icishinte ca kucimfyanya. Ukusuminisha ukucimfyanya mu mishiika yabo kwasoswa ukuba e cikabilwa ukulola ku busambashi. Ku Kabanga abafyashi abengi balenga abana ukutangana na bambi kabili batuma bene ku masukulu ya kusambilila kwashika ukwa pa kashita akepi ayo yabasambilisha inshila shakampuka isha kupita amashindano ya kwingilila. Abafyashi bayangwako mu kucishamo baliba abashininwa ukuti ukwingila mwi sukulu lya kulengo kukampuka e lufungulo ku lubanda lwa nshita ya ku ntanshi.

Ukucimfyanya e lufungulo ku kutunguluka, e fintu abengi basumina mu kukosa. Ukulingana ne cisumino cabo, abantunse balilunduluka ukupitila mu kucimfyanya. “Ukucimfyanya kwa kulwila ukusumbulwa e ntulo ya bukose bwa makampani ya mu Japan,” e fyasosele amaperesenti 65.9 aya ntungulushi sha makampani yakalamba ayasapikwe na kabungwe ka ku Japan aketwa Federation of Economic Organizations. Kabili cimoneka ukuti amakampani ya mu Japan yalitunguluka pa nshita ntali. Nangu cibe fyo, bushe ukucimfyanya mu cituntulu e lufungulo ku kutunguluka?

Bushe kwa Kulambula mu Cine Cine?

Abantu abacimfyanya na bambi balangisha imibele ya mutima iya kaso, iya ine ntanshi. Balaba aba nsansa lintu bambi bafilwa, ukwelenganya ukuti mu kukonkapo ici cili no kulenga imibombele yabo ukuwaminako. Ku kumwenamo kwa pa lwabo ukwa kaso, kuti pambi babomfya imingalato iingacena bambi. Ni kuli cinshi ukusupila kwa musango yo ukwa kutunguluka ukupitila mu kucimfyanya kukatungulula? Yasuo, uwaifimbilikishe umwine muli nakatango wa kuba kanabesa mu kampani kakwe, ebukisha inshila yakwe iyapita kabili atila: “Uwaisulamo umupashi wa kucimfyanya kabili no kutontonkanya kwalemenena ku kusumbulwa, nailingenye ne mwine kuli bambi no kuyumfwa uwapulamo. Lintu abo bantu basumbwilwe ukuncila, naleilishanya pe fye pa lwa basakamana imilandu ya babomfi aba kampani. Nshakwete fibusa fya cine cine.”

Umupashi wa kucimfyanya na kabili kuti watungulula ku mfwa yabula ukwenekela. Shani? Mainichi Daily News iya ku Japan isuntinkanya karoshi, nelyo imfwa ukufuma ku kubomba kwacishamo, ku mibele ya A. Imibele ya A ilondolola icipasho ca mibele ya muntu icibomba no kukanshika pa mulandu wa kubomba ne pamfya, ukucimfyanya, no bulwani. Abasambilila pa lwa mibombele na malwele ya mutima abena America Friedman na Rosenman basuntinkanya imibele ya A ku bulwele bwa ku mutima ubucefya ukukonkoloka kwa mulopa mu mishipa ukuya ku micincili ya ku mutima. Ee, umupashi wa kucimfyanya kuti waba wa kulenge mfwa.

Ukucimfyanya mu cifulo ca ncito na kabili kuti kwatungulula ku ntenda shimbi isha ku mubili na ku muntontonkanya. Ica kumwenako cimo ni Keinosuke, kashitisha wali wa pa ntanshi uwa kampani kakalamba akashitisha bamotoka aka ku Japan. Acilile bonse abamutangilile lintu ashitishe bamotoka ubwingi bonse ubwa 1,250. Icikope cakwe calibikilwe mwi fremu no kukobekwa mu muputule walebomfiwa ne bumba lya badairekita pa maofesi yakalamba aya kampani. Nangula ca kuti alipatishe ukubomfya abanankwe ba pa ncito nga pa kutanukila ku kusumbulwa, akampani kalemupatikisha ukucimfyanya. Nge ca kufumamo, mu mwaka umo alwele ifilonda fya mu mala na ku bula kwine. Ulya mwaka umo wine, intungulushi sha kampani kakwe 15 balitekelwe mu cipatala, kabili umo uwa bene aliipeye.

Pa ŋanda, imibele ya mutima iya kufwaisha ifyuma ukulingana na ba Kampanda ilenga abantu ukuba na mataki ya mikalile mu bulwani bushitala abupwa. (1 Yohane 2:16) Ici cinonsha bashimakwebo epela, ukubika indalama mu minwe ya basulwishi ba pe sonde.—Linganyako Ukusokolola 18:11.

Nangu ca kuti ubulwani no mupashi wa kucimfyanya kuti pambi fyaletako ukulunduluka mu ncito, te ca kupapa ukuti Imfumu Solomone yalandilepo ukuti: “E lyo namwene ukuti ukucucutika konse no butukushi bonse fifuma mu kufinukana [“bulwani,” NW] kwa muntu no mubiye. Ici na co mupu no kufuluko mwela.” (Lukala Milandu 4:4) E co ni shani fintu twingasungilila umutende wa muntontonkanya ilintu tuleikala muli sosaite walemenena ku kucimfyanya? Ku kusanga, lekeni intanshi tumone uko imfundo ya kucimfyanya yatampiile.