Bushe Uleibukisha?

Bushe waliipakisha ukubelenga abafuma aba nomba line bamagazini ba Ulupungu lwa kwa Kalinda? Nga ni fyo, walacisanga ica kusekesha ukwibukisha ifipusho fyakonkapo:

▫ Bushe icine ca mipepele kuti casangwa?

Yesu Kristu atile: “Mukeshibe cine, ne cine cikamulenga abantungwa.” (Yohane 8:32) Yesu talondolwele fye ukuti icine kuti casangwa lelo alangilile ukuti ukucisanga kulafwaikwa mu kupepa kwesu ukwa kuli Lesa. Aebele umwanakashi umwina Samaria ati: “Bakapepa bene bene bakapepela Tata mu Mupashi na mu cine.” (Yohane 4:23)—4/15, ibula 15.

▫ Robert Estienne aali ni ani, kabili ni shani fintu ashile ica kwishibikilwako?

Robert Estienne aali uwaishiba ifya kupulinta uwaikeleko mu mwanda wa myaka uwalenga 16. Apeeleshe ubumi bwakwe ku kusabankanya Amalembo ya Mushilo kabili abombeshe ku kusokolola amashiwi ya mu Baibolo nga fintu yalembelwe pa kutendeka fye. Umusango wakwe uwa kwakanya amalembo ya Baibolo mu fikomo fyakwata amanambala e musango ubomfiwa mpanga yonse ilelo.—4/15, amabula 10, 14.

▫ Ni shani fintu tunonkelamo mu kubelenga Baibolo ukwa cila bushiku?

Amalembo lyonse yalatukwatila ubupilibulo ubupya, na masesemo ukukuma ku nshiku sha kulekelesha yasanguka ayacilapo kwebekesha ukuyamwena mu cintu twamona, ico twaumfwa, na cintu twakumanya pa lwesu. Ilyo ukubelesha kwesu kwine mu bumi kuletanunuka e lyo twabomba ne mpika, tulacilapo kutesekesha ukufunda kwa Baibolo. (Amapinda 4:18)—5/1, ibula 15.

▫ Ni shani fintu amalembo ya mu Baibolo yengebukishiwa?

Ilyo ulebelenga Baibolo, conga mu malembo yasalilwe ayo ulefwaya ukulaibukisha, nelyo yambwile pa makardi no kuyabika apo wingalayamona cila bushiku. Ilyo uleesha ukusungila ifi fikomo, etetula pali fyene no kufibomfya. Wilaesha ukusungila ayafulisha pa nshita imo, nalimo limo fye nelyo yabili umulungu umo.—5/1, amabula 16, 17.

▫ Fyebo nshi fintu Ilandwe lya kwa Luka lyakwatamo mu kulunda ku fintu bakalemba bambi abe Landwe bapayenye?

Ilintu iciputulwa cikalamba ica fyebo fyalembelwe na Luka fyalipalana kuli filya ifyaba mu bulondoloshi bwa kwa Mateo, amaperesenti 59 fintu fyapusanako. Luka alembele ifipesha amano mutanda, ifyaba fye mwi buuku lyakwe kabili acitile lipoti ukucila pa miku ibili ubo bwingi bwa filangililo fya kwa Yesu ifishalumbulwa na bakalemba bambi abe Landwe.—5/15, ibula 12.

▫ Kubyasha nshi ukwapulamo ukwa lubuuto lwa cine kwasokolwele mu 1935?

Ulya mwaka abantu ba kwa Yehova baishileumfwikisha ukuti ibumba likalamba ilyalumbulwa pa Ukusokolola 7:9, 14 talyaloseshe kwi bumba lya cibili ilya ku muulu, lelo lyaloseshe kuli abo bantu amasubilo yabo ya pe sonde. (Yohane 10:16)—5/15, ibula 20.

▫ Ni mu nshila nshi ishibomba isho twingasansamushishamo abafwililwe?

Kutika. Payanya ukwebekesha. Kabiye kasangweko. Itendekeleko lintu cakabilwa. Lemba kalata nelyo kardi wa kusansamusha. Pepa na bene. (Yakobo 5:16) Twalililo kubaafwa.—6/1, amabula 13, 14.

▫ Cinshi cintu bamunyina ba ku mupashi na bankashi bengacita ku kwaafwa abo bekala mu ndupwa shayakanikana mu mipepele ukuti bengashipikisha?

Lyonse landa amashiwi ya kukoselesha, ayashininkishiwa, na ya kusansamusha kuli bene. (1 Abena Tesalonika 5:14) Ici cibomba nge ca kupembesula ku muntontonkanya wabo no mubili. Lintu cingabomba na lintu calinga, basanshemo mu mibombele yobe iya teokrasi ne ya kwangalila pamo. Basanshemo mu mapepo yobe. (Abena Roma 1:9; Abena Efese 1:16)—6/1, ibula 29.

▫ Filambu nshi fiisa ukufuma mu kubelesha ukutekanya lintu tuleibimba mu butumikishi bwa mwi bala?

Ukutekanya kwaafwa kasabankanya wa Bufumu ukushipikisha ukukanayangwako ukuli konse nelyo ukukaanya. Mu cifulo ca kulakansana na bene mayanda aba cipyu, abatumikishi batekanya bakaba na maka ya kupeela icasuko cafuuka nelyo ukufumapo umutalalila, muli yo nshila ukusungilila umutende no buseko. (Mateo 10:12, 13) Mu kulundapo, abantu bapale mpaanga bakakulilwa ku bukombe bwa Bufumu.—6/15, ibula 9.

▫ Mulandu nshi ukwishiba icine ca Baibolo kwabelo kwa mutengo?

Ukwishibe cine kulatulubula ku bufi, ukukopekwa no kutiine mipashi. Lintu twaikalila kuli cene, icine cilatukosha ukushipikisha amafya kabili cilapuuta muli ifwe isubilo ilitulenga ukwiminina abashangila pe samba lya bwesho.—7/1, ibula 8.

▫ Cishingamo nshi ica kutendekelako cintu icilonganino casubwa ica Bwina Kristu capokele kuli Israele wa cifyalilwa?

Lishuko lya kucitilo bunte ku bukulu bwa kwa Yehova pa kati ka nko. (Esaya 43:21; 1 Petro 2:9)—7/1, ibula 19.

▫ Cinshi catubululwa ku mashiwi ya mutumwa Petro aya kuti umulume alingile ‘ukupeela umucinshi’ ku mukashi wakwe? (1 Petro 3:7)

Umulume uucindika umukashi wakwe tamuseebanya nelyo ukumucefya. Ukucila, alangisha ku mashiwi yakwe ne ncitilo—lintu bali beka na pa cintubwingi—ukuti alimukatamika. (Amapinda 31:10-31)—7/15, ibula 19.

▫ Mulandu nshi cingasoselwo kuti calibamo kutemwa ukutamfya kacita wa fibi ushalapila ukufuma mu cilonganino ca Bwina Kristu?

Ukutamfya kulumbulula kwa kutemwa ukwa kuli Yehova ne nshila shakwe. (Ilumbo 97:10) Kulanga ukutemwa kuli abo balekonkelela inshila yalungama pantu kulafumya pa kati kabo umo uwingalenga ukusonga kwabipa pali bene; ici na co cilacingilila ukusanguluka kwa cilonganino. (1 Abena Korinti 5:1-13)—7/15, ibula 25.

▫ Ni shani fintu “umusha wa cishinka kabili uwashilimuka,” uwalandwapo kuli Yesu pali Mateo 24:45-47, engeshibikwa ilelo?

Beshibikilwa maka maka ku mulimo untu babomba mu kupayanya impapulo shashimpwa pali Baibolo, mu kusambilisha na mu kushimikile ‘mbila nsuma iya bufumu,’ na mu kukakatila mu kupalamisha ku Cebo ca kwa Lesa, Baibolo. (Mateo 24:14; 28:19, 20)—8/1, ibula 16.