Ukusalangana kwa Bumunshalulwa mu fya Mipepele
BUMUNSHALULWA mu fya mipepele—amakumi yanono aya myaka ayapitapo, kali fye kabungwe akanono mu kati ka buProtestanti. Nomba ifintu nafyaluka! Bruce B. Lawrence, uulanda pa fya mipepele, alembele ukuti imyaka 30 iyapitapo, banono fye abaletontonkanyo kuti ku ntanshi ku kupwa kwa mwanda wa myaka uwalenga 20, bumunshalulwa mu fya mipepelea bwali no kuba icintu cikalamba kabili icingaba lyashi likalamba ilingalasakamika abantu mu fya kusabankanishishamo amalyashi no kusapika kwa ba pa mayuniversiti.
Lelo, ico cine e cacitika. Amalipoti ya mu nyunshipepala pa lwa kwime bungwe kwa lukaakala mu misebo, ubukomi, utubungwe twa kulwisha ukuponya amafumo, ukusonga ifya mashiwi ya calo ukucitwa na mabumba ya mipepele ayapamfya ukuti ifintu fibombwe, e lyo no koca amabuuku pa lwalaala ayo yamonwa ukuti mwalibe miponto e fitwibukishako ulwa fintu bamunshalulwa ba mu fya mipepele bacita. Inyunshipepala iilanda pa fya bunonshi mu Italy iya Mondo Economico yalondolwele ukuti mupepi fye na konse bumunshalulwa mu fya mipepele buli “ubwapambana ku kulwa mwi shina lya kwa Lesa.”
Bamunshalulwa ba mu fya mipepele ilingi line balondololwa nga impelwa mano shacishamo, abasonkomona imibombele ya kuumana akapi no kulaleto kululunkanya pa bantu. Abantu balatulumushiwa pa fikulile amabumba pamo nga baComunione e Liberazione muli baKatolika, baGush Emunim aba mu buYuda, na ba Christian Coalition muli buProtestanti bwa ku North America. Mulandu nshi bumunshalulwa mu fya mipepele bulesalanganina? Cinshi cibukunta? Bushe napamo kuti caba “cilandushi ca kwa Lesa,” nge fitubulula Gilles Kepel umwina France uwasambilila ifya bwikashi bwa bantu?
[Futunoti]
a Munshalulwa wa mu fya mipepele ni umo uwaikatilila mu kushangila ku fishinte fya cishilano, imipepele ya cishawasha. Ubupilibulo bwe shiwi “munshalulwa” buli no kulandwapo mu kucilapo kukumanina mu cipande cikonkelepo.
[Abatusuminishe Ukubomfya Icikope pe bula 3]
Nina Berman/Sipa Press