Inshila Yacilapo Kuwama
INTE SHA KWA YEHOVA shalyangwako ku fyo bumupashi bwacepa mu calo na pali bucisenene no kukanashikatala kwa fya mipepele ukuleandatila ubwikashi bonse. Pali uyu mulandu, inshita shimo babeta abati bamunshalulwa. Lelo bushe ni bamunshalulwa? Iyo. Nangu line balishininwa mu kukosa pa lwa mipepele, tababa ni bamunshalulwa mu nshila intu iyi numbwilo yabomfiwilwamo. Tabapamfya intungulushi sha fya mashiwi ya calo ukuti batwale pa ntanshi imimwene imo, kabili tabaalukila ku kwime bungwe na ku lukaakala ukulwisha abo bashisuminishanya na bo. Balisanga inshila yacilapo kuwama. Bapashanya Intungulushi yabo, Yesu Kristu.
Inte sha kwa Yehova shalishininwa ukuti icine ca mipepele e ko caba, no kuti cisangwa muli Baibolo. (Yohane 8:32; 17:17) Lelo Baibolo isambilisha Abena Kristu ukuba aba cikuuku, abasuma, abanakilila, kabili aba congwe—imibele iyo ishisuminisha bumpelwa mano. (Abena Galatia 5:22, 23; Abena Filipi 4:5) Mwi buuku lya mu Baibolo ilya Yakobo, Abena Kristu balikoseleshiwa ukulundulula “amano ayafuma mu muulu,” ayalondololwa ukuti “pa kubala yantu ya musangwela, e lyo ya mutende, ya mutembo, ya bupete, yaisulamo uluse ne milimo isuma.” Yakobo alundileko kuti: “Abacito mutende batanda mu mutende, baseepamo ubulungami.”—Yakobo 3:17, 18.
Inte sha kwa Yehova shilebukisho kuti Yesu alyangilweko apakalamba ku cine. Aebele Ponti Pilato ati: “Pali ici e co nafyalilwe, kabili pali ici e co naishiile pano isonde, pa kuti nkeseshimike cine ubunte.” (Yohane 18:37) Nangu cingatila aaletungilila icine mu kushangila, tafwaile ukuti akakatishe icine pali bambi. Mu cifulo ca ico, aleipukisha ku mintontonkanya yabo na ku mitima. Aalishibe ukuti Wishi wa ku muulu, Lesa ‘umusuma kabili uwatambalala,’ e wali no kupingulapo ni nshila nshi e lyo ne nshita ya kufumishapo ubufi no lufyengo pano nse. (Ilumbo 25:8) E ico, tafwaile ukutitikisha abo bashasuminishenye na wene. Mu kupusanako, cali ni ntungulushi sha mipepele ishaumina kumo isha mu kasuba kakwe e shaeseshe ukutitikisha Yesu.—Yohane 19:5, 6.
Inte sha kwa Yehova shalishininwa mu kukosa pa lwa fisumino fya mipepele, kabili balalangisha ifishinte fyakatama ifyashangila ifyakuma ku mibele isuma. Ukupala umutumwa Paulo, balishininwa ukuti kwaba fye “Shikulu umo, ukutetekela kumo, ulubatisho lumo.” (Abena Efese 4:5) Balibukila na kabili ulwa mashiwi ya kwa Yesu aya kuti: “Inshila iitwala ku mweo ya kamfyemfye kabili yalifyenenkana, kabili banono abaisanga.” (Mateo 7:13, 14) Nalyo line, tabesha ukupatikisha bambi ukukonka ifisumino fyabo. Mu cifulo ca ico, bapashanya Paulo kabili bonse abengafwaya ‘babalomba’ ukuti “shi muwikishiwe kuli Lesa.” (2 Abena Korinti 5:20) Iyi e nshila yacilapo kuwama. E nshila ya kwa Lesa.
Bumunshalulwa mu fya mipepele bwalipusanako nga nshi, mu nshila intu ilyo ishiwi libomfiwilwamo ilelo. Bamunshalulwa babomfya imicenjelo iingi—iibimbamo ulukaakala—ukwilikisha ifishinte fyabo pa bwikashi. Mu kucite fyo, basanguka ulubali lwa fya mashiwi ya calo. Yesu, nangu ni fyo, atile abakonshi bakwe tabalingile ukuba “aba pano isonde.” (Yohane 15:19; 17:16; Yakobo 4:4) Mu kumfwana na yo mashiwi, Inte sha kwa Yehova balaisunga ukukanaibimba nangu panono mu kukansanina pa mashiwi ya calo. Kabili, nga fintu inyunshipepala ya ku Italy iya Fuoripagina yasuminishe, bene “tabapatikisha icili conse pa muntu uuli onse; uuli onse alibo muntungwa ukupokelela nelyo ukukaana cintu basosa.” Cinshi cafumamo? Ubukombe bwa mutende ubwa mu Baibolo ubwa Nte bulacebusha abantu ba misango yonse, nangu ni abo abaali kale bamunshalulwa.—Esaya 2:2, 3.
Icalo Umwaba Ifishinte Fyakatama Ifyashangila
Inte shalishibo kuti abantunse tabengapikulula amafya ayakuma kuli bamunshalulwa ba fya mipepele. Tawingapatikisha umuntu ukusumina muli Lesa nelyo ukupokelela ifisumino fya pa lobe. Ukutontonkanya ukuti ica musango yo kuti cacitika e kwaleteleko ifya kucitika fyacishapo kutiinya mu lyashi lya kale, pamo nga Inkondo sha mushilo, Ukulubulwisha kwakaluka ukwa mu nkulo sha pa kati, no “kwalula” Abena India ba ku Amerika. Nangu cibe fyo, nga mwacetekela Lesa, kuti mwaitemenwa ukuti cishalile kuli Lesa e o akabombelepo.
Ukulingana na Baibolo, Lesa alimika apo akapesha inshita iyo asuminisha abantunse ukutoba amafunde yakwe icalenga ukucula no kukalipwa. Iyo nshita yalaswa ipwililile. Kale kale, Yesu alateka nge Mfumu mu Bufumu bwa kwa Lesa ubwa mu muulu, kabili mu kwangufyanya bulya Bufumu bukabombelapo ku kufumyapo amabuteko ya bantunse no kupokolola ukuteka pa milandu ya cila bushiku iya mutundu wa muntu. (Mateo 24:3-14; Ukusokolola 11:15, 18) Icikafumamo cikaba ca kuti paradise akakumana icalo conse umo umutende no bulungami fikaba ifyafula. Pali iyo nshita takwakabe ukukaanashininkisha ifyo Lesa wa cine alingile ukupepwa. “Abalungama bakapyaninine calo, no kwikalamo inshiku pe.” (Ilumbo 37:29) Ifishinte fyakatama ifya musango yo pamo nga uluse, icishinka, ubulungi, no busuma fikacimfya ku busuma bwa mutundu wa muntu onse uwa cumfwila.—Ilumbo 85:10-13.
Ukwenekela iyo nshita mu kuba no kusekelela, kemba wa malumbo mu musango wa mushikakulo atila: “Uluse ne cishinka nafikumana, ubulungami no mutende nafifyompana; icishinka cimena pa nshi, no bulungami bulengela mu muulu; Awe Yehova akalapeele cisuma; ne calo cesu cikalafumyo bulimi bwa ciko. Ubulungami buleya bulamutangilila, no mutende ulekonka mu nshila ya nyantilo shakwe.”—Ilumbo 85:10-13.
Ilintu tatwingaalula icalo, umo umo kuti akusha ifishinte fyakatama ifya bukapepa nangu fye ni lelo line. Muli fyo, kuti twaesha ukuba umusango wa bantu abo Lesa akafwaya ukuba aba kumupepa muli cilya calo cipya. Lyene tukaba pa kati ka balanda abo kemba wa malumbo alosesheko ukuti: “Abalanda bakapyaninine calo, no kuilemeno bwingi bwa mutende.” (Ilumbo 37:11) Lesa atungilila no kupaala abacito kufwaya kwakwe, kabili alibalaya ifintu fya kusungusha ku nshita ya ku ntanshi. Umutumwa Yohane atile: “Pano isonde paleya, no lunkumbwa lwa pako; lelo uucito kufwaya kwa kwa Lesa ekalilila umuyayaya.”—1 Yohane 2:17.
[Icikope pe bula 7]
Inte sha kwa Yehova shilaalika bonse ukuti bengabeleshanya ne mbila nsuma ya Bufumu bwa kwa Lesa
[Abatusuminishe Ukubomfya Icikope pe bula 6]
Inyali pa mabula 3, 4, 5 na 6: Printer’s Ornaments/kuli Carol Belanger Grafton/Dover Publications, Inc.