Ilyashi lya Bakabilisha ba Bufumu

“Ulubuuto Lwenu Lengeni Lubalikile ku Cinso ca Bantu”

MU LYASHI lyakwe ilya pa Lupili, Yesu asosele ku basambi bakwe ukuti: “Imwe muli lubuuto lwa pano isonde.” Alikonkenyepo ukubacincisha ukuti: “Ulubuuto lwenu lengeni lubalikile ku cinso ca bantu, ukuti bamone imilimo yenu iisuma, no kucindika Shinwe wa mu muulu.”—Mateo 5:14-16.

Mu Italy imilimo isuma iya Nte sha kwa Yehova yalimonwa bwino bwino. Ku ca kumwenako, imyendele yabo iisuma lintu balesangwa ku mabungano yabo aya cila mwaka ilacindika Lesa, nga fintu amalyashi yakonkapo yaleshininkisha:

▪ Pa myaka iingi umwanakashi umo mu Terni, Italy, ayafwile umwana wakwe umwanakashi ukucito bukwebo bwa kushitisha ifya kulya fyayanguka mwi tuuka lyabela mupepi ne cibansa ca mu musumba. Ashimiko kuti: “Nalimwenepo ubupusano ubukalamba nga nshi pa kati ka baleisa ku fyangalo fya mupila na makombe ye bungano lya Nte sha kwa Yehova. Inte shalicililepo kufwala mu kulinga, kabili baali abafumacumi kabili aba mucinshi. Ilingi line nalepapa ifyo abantu ba mishobo yalekanalekana bengalaumfwana bwino muli ulya musango.

“Bushiku bumo Nte alinjiminike mu musebo no kunjipusha nga ca kuti nalishibe ishina lya kwa Lesa. Nshalishibe, kabili apantu naishibe ukuti Inte sha kwa Yehova bantu abasuma, nalisumine ukuti akantandalile. Nalikwete ifipusho pa lwa mibele ya bafwa, ifyo ayaswike ukubomfya Baibolo. Ukwabulo kushingashinga, nalisumine ukulasambilila Baibolo, kabili pa numa ya milungu ibili natendeke ukusangwa ku kulongana.

“Pa kubalilapo umwana wandi alenkaanya, lelo imyendele yandi no mupampamina fyalyalwile imibele yakwe iya mutima. Natendeke ukusambilila imyeshi 9 iyapitapo. Ilelo umwana wandi no mulume wakwe balalanda bwino sana ukutasha Inte abashitako mwi tuuka lyabo. Lelo ine, nabatishiwe pe bungano lyabelele muli ici cine cibansa.”

▪ Pa numa ye bungano mu Roseto degli Abruzzi maneja wa ncende bemikako amatenti atile: “Nalimona ukuti Inte sha kwa Yehova ba bufumacumi nga nshi muli fyonse ifyo bacita. Umulungu wapwa, 40 aba bene balishile ku ncende yandi, kabili nshakwete amafya ayali yonse na bene. Mu cifulo ca ico, abene beka fye e bengakweba nga nabakwata abali bonse abalundwako abaleikala mu matenti yabo abalekabila ukulipililwa. Ukulingana ne fyo nabamona, e ba kushishanya na bo abawamisha abo umuntu engakwata.”

▪ Pa numa ye bungano limo line, maneja wa mu hotela alondolwele ukuti: “Inte sha kwa Yehova bonse ba mutende. Te bamapusu, kabili balaya mu kusendama bwangu. Mu cituntulu ba cikuuku, abafumacumi, kabili balaicindika. Kuti cawama nga ca kuti bonse baba nga bene. Bambi baleba ifipe ifili fyonse—ifya kubikamo amaluba, ba trei ba mito ya fwaka, ukusanshako fye na mapepala ya mu cimbusu na shuga! Tamwatala amucitapo ica musango yu. Ilyo abana benu balebuula ice cream mu fuliji mu cungulo bushiku, nshisakamikwa ukuti njemone ifyo basendele. Balapenda ubwingi bonse pamo ubwa ndalama bafwile ukumpeela no kwisa mu kulipila ilyo line fye. Nalibacetekela nga nshi. Fintu cingaba icawamisha nga ca kuti bambi na bo e fintu baali! Ndakumbwa nati kanshi abeni bandi bonse nga ni Nte sha kwa Yehova.”

Inte sha kwa Yehova shalishibikwa bwino mu Italy, nga fintu shaishibikwa na mu ncende shimbi ishingi mwi sonde lyonse. ‘Baleenda bwino mu Bena fyalo’ na muli fyo ukulete lumbo kuli Lesa wa cine, umwine we shina ilyo basenda.—1 Petro 2:12.