Bakabilisha ba Bufumu Bacita Lipoti

Imyendele iyo Ipulamika Ubutumikishi Bwesu Ubwa Bwina Kristu

UMUTUMWA Petro akonkomesha Abena Kristu ukuti: “Mwende bwino mu Bena fyalo.” (1 Petro 2:12) Umutumwa Paulo alangisha ukuti ku myendele yesu iisuma, “[Tupulamike] isambilisho lya kwa Lesa Umupusushi wesu muli fyonse.” (Tito 2:10) Inte sha kwa Yehova ukushinguluke calo conse bakwata ukushimikwa kusuma ukwa myendele isuma. Mona ifya kumwenako.

Imimwene ya kwa Kafundisha iya Myendele Isuma

◻ Iofesi lya musambo ilya Watch Tower Society mu Costa Rica lyacita lipoti ukuti impendwa ikalamba iya bacaice muli cilya calo bemika ica kumwenako cawama. Munyina umo alanda ica mukuliile ku cine. Ashimika ukuti: “Icintu icancebwishe mu kucishamo cali myendele yawama iya bonse imisepela na bakalamba lelo ukucilisha imisepela. Ilintu nalebomba nga kafundisha, nakwete ishuko lya mu nshita ukubebeta mu kupalamisha Inte pe sukulu lyandi. Kabili apantu naleikala no lupwa lwa Nte sha kwa Yehova, nabebetele imyendele ya bana kulya nako.

“Nali fye no kumona ubupusano pa kati ka basambi abaali Inte na basambi bambi mwi sukulu lyandi. Inte balefika lyonse mu nshita kabili aba misango isuma, tabalebepa, kabili lyonse balebomba imilimo bapelwa. Namwene na kabili ukuti baali abafumacumi pa kulemba amashindano yabo, nangu cingati ilingi line abasambi bambi mu cinkumbawile balebepa. Mu kulundapo, baali abanakilila kabili aba mucinshi kuli ine nga kafundisha wabo. Pa kuba uwasekeshiwa ne Nte shacaice pa sukulu na mu ŋanda muntu naleikala, natendeke ukufwailisha ubu butotelo na mu kupelako napokelele icine.”

Ifya Kufumamo Fisuma Ukufuma ku Myendele ya Bwina Kristu pe Bungano

◻ Umo uwa Nte sha kwa Yehova mu cilonganino ku lubali lwa ku masamba ulwa El Salvador afwaishe ukwakana imbila nsuma iya Bufumu na bamunyina ba ku mubili babili. Umo alikutike no kutendeka ukusambilila Baibolo ne Nte sha kwa Yehova. Munyina umbi ali wa kwi calici lya Evangelical ilitwa Prince of Peace (Cilolo wa Mutende), kabili asosele kuli munyina ati: “Wilalanda kuli ine; ulebombela amabuseko ya kwa Ciwa.”

Lintu inshita yaishile iye bungano lya citungu, uyo uwalesambilila alalike munyina ukuya nankwe kwi bungano. Munyina atile: “Cisuma, nalakonka; Ndeya fye mu kumona apo ningasanga icilubo pa lwa Nte.” Aba bamunyina babili basangilwe kwi bungano capamo. Impendwa ikalamba iya basangilweko no muyano usuma pe bungano fyasekeshe uwa ku Evangelical, uwasosele ukuti tabalile amonapo icapala cene kale. Lintu afikile ku ŋanda, asosele kuli munyina ati: “Tambika ukuboko kobe.” “Kwa nshi?” e fyaipwishe munyina. “Tambika fye ukuboko kobe,” cali e casuko. Bafunkene iminwe, kabili munyina uwali wa kwi calici lya Evangelical alondolwele ati: “Ukufuma nomba nakulasambilila ne Nte sha kwa Yehova. Mu cituntulu, nshaishibe cintu nalepusa.” Nomba na o wine ni kabilisha wacincila uwapimpa uwa mbila nsuma ya Bufumu bwa kwa Lesa.