Muleba Aba Mushilo mu Fintu Fyonse Ifyo Mucita
1. Cinshi cacindamina ukuba aba mushilo mu fintu fyonse ifyo tucita?
1 Fwe babomfi ba kwa Lesa wa mushilo, Yehova, tulesha na maka ukuba aba mushilo mu fintu fyonse ifyo tucita. (1 Pet. 1:15, 16) E kutila muli fyonse ifyo tucita tulesha ukucita ifyo Yehova afwaya. Ukulongana kwa citungu ukwa uno mwaka kukatupeela ishuko ilya kulanga ukuti twaba aba mushilo.
2. Kuti twalenga shani apa kulonganina ukuba apa busaka?
2 Apa Kulonganina Pafwile Ukuba apa Busaka: Kulaba ukubombesha kwa kupekanya apa kulonganina no kupawamya ilyo ukulongana kushilatendeka. Kanshi fyonse ifyo twaisa na fyo ku kulongana, nampo nga mapulastiki nelyo mabotolo, tufwile ukufisenda. Filya fine twacifisenda pa kwisa ku kulongana ninshi muli ifya kulya ne fya kunwa, e fyo twingasenda na pa kuya pantu ninshi no kwanguka nafyanguka.
3. Finshi fingalenga ubusali kabili kuti twawamya shani pa cifulo ca kulonganina?
3 Ku ncende shimo pa kulongana kwa citungu, indupwa shiliila ifya kulya mu cibansa ciine balelonganina kabili ici cilawama nga nshi. Lelo tatufwile ukusha ifisoso palya pene twikele mpaka ubushiku bwa kulekelesha e lyo twawamya. Cila lupwa lufwile ukukusa ifisoso fyonse ifili apo baliila. Shininkisheni ukuti ilyo ukulongana kwa cungulo kuletendeka ninshi namutoola no kukusa amabotolo, utupendo, ifya kulya fiponaile nelyo ifisheleko, amapulastiki, amapepala ayali yonse nangu fye maprogramu ya kulongana. Nga mulefwaya kuti mwaisa na pulastiki umo ulupwa lwenu lwingalabika ifisoso no kusendelamo pa kuya mu kupoosa mu ng’ungulu nelyo mu cilindi batile e cishala ca kubomfya ilyo tulelongana. Mwilabika nelyo ukuleka amabotolo ya fya kunwa fyatalala nelyo ayashilimo ifintu yabe fye apali ponse, kuti yalenga ubusanso kabili tayamoneka fye na bwino. Nga ca kuti mwalikwata ing’anda pa cifulo pene apa kulonganina shininkisheni ukutila ulubansa lwenu luli ulwa busaka. Sambilisheni abana benu ukupyanga no kukusa ifisoso ukuyapoosa uko fifwile ukupooswa.
4. Mafunde nshi mu Israele ayalelenga ukuba no bumi busuma, kabili cinshi abantu ba kwa Yehova aba leelo bengasambilila kuli ci?
4 Ukusha ifimbusu ifya busaka ilyo twafibomfya bushininkisho na bumbi ubwa kuti “tubombe cisuma kuli bonse.” (Gal. 6:10) Ifunde Lesa apeele Abena Israele ulwa fya kupoosa ubusali bwa bantu talyapita na mu mbali kabili lyalyanguka ukulikonka. (Belengeni Amalango 23:12, 13) Ili funde lya kale lilabomba na muno nshiku kabili kuti twaba no bumi busuma nga twaumfwila ifishinte fya liko. Ukumfwila amafunde ya kwa Yehova pa lwa busaka lyonse kuleta amapaalo kabili kulatulenga ukupusanako na bantu bambi.—Amala. 28:9, 10.
5, 6. Ukutemwa kuti kwatulenga shani ukuba aba busaka?
5 Ukutemwa aba bwananyina kukatulenga ukubalangulukilako. (1 Kor. 13:4, 5) Te mucinshi ukusha nelyo ukuleka ifisoso apo twikele pantu abanensu na bo bekele fye mupepi. Te mucinshi ukusha ifimbusu ifya busali pantu abanensu na bo balefibomfya. E ico, tulecita ifilanga ukutila twalitemwa abantu banensu.—Yoh. 13:35.
6 Tulomfwilapo icilumba pa fifulo fyesu ifya kupepelapo kabili tulatashiwa pantu cila nshita tuya tulecita bwino mu kusunga ifi fifulo ifya busaka. Shi ifwe bonse natutwalilile ukubombesha ‘ukuisangulula kuli fyonse ifikowesha umubili no mupashi, tube abafishapo bumushilo mu kutiina Lesa.’ (2 Kor. 7:1) Mulebelesha ukuba aba busaka pa ng’anda pa mwenu kabili mulesambilisha abana ukulabombako uyu mulimo wa kusunga ing’anda iya busaka. Belesheni ukuwamya Ing’anda yesu iya Bufumu, ne ci cikalenga ukuti ilyo twalongana pa kulongana kukalamba tukafwaisha ukuba ne misango isuma iya kwa Lesa wesu uwa Mushilo Yehova.—Esa. 60:2.
7. Bushe pa kulongana kuti twalanga shani imisango isuma?
7 Ilyo Tulelongana: Pa cifulo ca kulonganinapo e po sana sana tufwile ukuba ne mibele isuma. Mukwai mukaleumfwila ifyo bakapyunga bakalamweba ukucita, ukumfwila uko bamweba ukwimika bamotoka no kubomfwila mu cifulo ca kulonganina. (Heb. 13:17) Abafyashi bafwile ukwikala pamo na bana babo, nangu bapungwe, ukucila ukubaleka bayaikala pe bumba lya baice banabo. Nga namukwata bamashini abali bonse aba kukopelako tamufwile ukubasuntinkanya ku malaiti nelyo ku fisoselo filebomfiwa pa kulongana kabili ilyo mulekopa mwikalapumfyanya bambi. Nga mulefwaya ukukopa ifikope uku ninshi tulelongana, mwikala-asha amalaiti ya bakamera. Mwikaleka amapeja na mafoni ya kwenda na yo ukupumfyanya bambi. Apo muli nga pacitika ubusanso, ebeni kapyunga nelyo aba ku dipartimenti wa First Aid.
8. Bushe imisango yesu ilyo tuli pa kulongana kwa citungu icindika shani Lesa?
8 Imisango yesu ilatulenga ukupusanako na bantu bambi kabili ilacindika Lesa wesu. (1 Pet. 2:12) Abantu bambi bakalamona ifyo Inte sha kwa Yehova bakalacita ilyo bakalalongana ukulongana kwa citungu. E ico, kosenipo ukuba aba busaka, sungeni icifulo cesu ica busaka kabili beni aba mushilo mu fintu fyonse ifyo mucita.
[Akabokoshi pe bula 5]
Mukabe ne Misango Iisuma
◼ Mukabe no Busaka
◼ Mukalesopa abana benu
◼ Mukalelangulukilako bambi