‘Pe fye Mulecite Cisuma’
1 Imikalile ya Bwina Kristu isanshamo ‘pe fye ukucite cisuma kuli bonse.’ (1 Tes. 5:15) Ilyo tuli ku mabungano ya citungu, tulaba na mashuko ayengi umo twingacitila icisuma kuli bambi. Pali ishi nshita, tulamonwa ku cintubwingi, kabili bonse abo tukumanya balatunganya imibele yesu ukulingana ne fyo twacita kuli bene. Pa kusunga ishina lisuma twakwata ilya Inte sha kwa Yehova, imibele yesu ilingile ukulanga ukuti ‘tulecindika abantu bonse.’ (1 Pet. 2:17) Ukucite fyo kusanshamo ukuba ‘abalolekesha ifya fwe bene, ne fya banensu.’—Fil. 2:4.
2 Ukusambilisha Abana Ifya Kucita Icisuma: Inshita shimo, abana ababula abakalamba bakubatungulula balilenga kwaba amafya. (Amapi. 29:15) Limo, abafyashi bobelwa ne milimo imbi no kuleka abana beka ukwabula aba kubamona. Abana bamo ni bamapuusu. Uyu musango ulapumfyanya no kucilinganya bambi, baNte na bashili baNte.
3 Mwe bafyashi, ilyo ibungano lishilafika, kuti cawama mwapoosako inshita ukupituluka na bana benu mu mibele ya Bwina Kristu iyo bafwile ukukwata inshita yonse kabili apali ponse. (Efes. 6:4) Ku ca kumwenako, bebeni ukuti ukutemwa kwine kwine ukwa Bwina Kristu “takucita icishiyene, takuifwaila ifya kuko, takukalifiwa.” (1 Kor. 13:5; NW) Abakalamba kuti balenga aya mashiwi ukuumfwika nga baba ca kumwenako cisuma ico na bambi bengamona. Mwe bana, kuti mwacita icisuma pa kuumfwila abafyashi benu, ukutiina ifintu fya bene, no kulangulukilako abo mupalamene na bo. (Kol. 3:20) Ilyo tuli abaikatana pa kubombesha ukufwaya ukucita icisuma kuli bonse, ‘tupulamika isambilisho lya kwa Lesa Umupusushi wesu muli fyonse.’—Tito 2:10.
4 Ukucita Amakwebo: Bamo pa kumona ukuti bambi te kuti bashite kamera, bacita amakwebo ya kukopa ifikope pa mabungano na konse ukubungene abantu ba kwa Yehova. Tacabipa ukukopwa pali aya mabungano yaibela. Na lyo line, abengi abakopa balasangamo icibwesha, e co, makwebo bacita. Pa kuti ica musango uyu tacibifishe ukuyemba kwa ku mupashi ukwa kubishanya kwa Bwina Kristu, twibasuminisha ukucita amakwebo yabo. E fyo cingaba na ku makwebo yambi. Ico tubunganina pamo kupepa Yehova epela, ukulya pe tebulo lyakwe ilya ku mupashi no kuipakisha ukukoseleshanya.—Rom. 1:11, 12.
5 Imibele yesu iisuma ilatashiwa ku baletutamba mu cinkumbawile e lyo na balya batupata pa milandu yapusanapusana. Lyonse imilandile yesu iya Bwina Kristu ne micitile fifwile ukushinina ukuti tulefwaya ukucita icisuma.
[Akabokoshi pe bula 4]
Mukwai Muleibukisha:
■ Ukumona ifyo abana benu balecita.
■ Icifulo ce bungano tacifwile ukubomfiwa nge “cibombelo” ca kusabankanya “amakwebo” ayali yonse.
■ Bomfyeni icifulo ce bungano ku mulimo uo cipangilwe, e kutila, ukupepelapo Yehova.