Ukulongana kwa Citungu Ukwa Nte sha kwa Yehova Ukwa mu 2008 Ukuleti “Ukutungululwa no Mupashi wa kwa Lesa”
1. (a) Mulandu nshi ukufunda uko Paulo afundile Abena Kristu AbaHebere kwabela ukwapamfya nga nshi na muno nshiku mwine? (Belengeni AbaHebere 10:24, 25.) (b) Lishuko nshi tukakwata ku ntanshi ilya kukonka ukufunda kwa kwa Paulo?
1 Umutumwa Paulo akoseleshe Abena Kristu abaHebere ukulalongana pamo no kulakoseleshanya, atile “pali bufi” apo balemona ukuti ubushiku bulya bwaleya bulepalama. (Heb. 10:24, 25) Ubushininkisho bwa kuti “ubushiku” ubo Paulo alandilepo nabupalama nga nshi bwile bulekoselako! E ico kanshi, tulafwaisha ukukwata ishuko lya kulongana pamo na bamunyinefwe na bankashi yesu ku kufundwa Icebo ca kwa Lesa icingalatutungulula muli shino “nshiku sha kulekelesha” ishayafya nga nshi. (2 Tim. 3:1) Ishuko lya musango yu likabako pa kulongana kwa citungu ukuleisa mu 2008.
2. (a) Mulandu nshi cicindamine ukusangwa mu kulongana kwa citungu inshiku shonse shitatu? (b) Finshi tulingile ukutampa ukucita pa kuipekanya ukusangwako?
2 Mukasangweko Inshiku Shonse Shitatu: Tulemukoselesha ukulongana inshiku shonse shitatu. Nga ca kuti tatuli “abaleko kulongana,” tatwakapusweko nangu panono ku mutebeto usuma uwa mashiwi ya Cebo ca kwa Lesa. (Heb. 10:25) Bangilileni ukutampa ukulaipekanya. Mulingile ukubangilila ukweba abamulemba incito pa kuti bakeshibe bwino ifyo bengacita. Nga ca kuti abana benu bakaba tabalaisala amasukulu pa nshita ya kulongana kwa citungu, mulingile ukweba bakafundisha wabo ifyo mulepanga ukucita. Lekeni beshibe ukuti pa nshila shesu isho tupepelamo Yehova lyonse paba no kulongana kwa citungu. Mulingile ukwishiba ukuti Yehova akamupaala nga mwabika Ubufumu pa ntanshi.—Mat. 6:33.
3. Bushe bamo baipeeleshe shani pa kuti basangwe ku kulongana kwa citungu?
3 Abantu ba kwa Yehova tabalinganya indalama ku mapaalo yaba mu kusangwa ku kulongana kwa citungu. Umfweni ifyo caali kuli bamo abapangile ukuti mpaka fye bakasangwe ku kulongana kwa fyalo ifingi ukwa Nte sha kwa Yehova ukwaliko mu 1958 mu New York, ukwakwete umutwe wa kuti, Ukufwaya kwa Bulesa. Pa mulandu wa kuti munyinefwe umo alefwaya ukuyabombako umulimo wa kuitemenwa na pa kuti engasangwako mu kulongana, apingwilepo ukwisala akampani kakwe aka makuule pa milungu ibili. Munyinefwe wa ku fishi ifyo beta ukuti Virgin Islands ashitishe impanga ya maeka yasano pa kuti aba mu ng’anda yakwe bonse 6 bakasangwe ku kulongana. Umulumendo umo no mwina mwakwe bashitishe ubwato bwabo ubwa injini pa kuti basende abana babo bonse batatu, ukutendekela fye ku mwana wa myeshi ibili mpaka na ku wa myaka 7. Ku Kalifornia, abalumendo batatu pali bumunyina, aba mu ng’anda fye imo ine babebele ukuti nga bafuma pa ncito baya mu kulongana, ilyo bakabwela bakasanga balingishapo bambi pa fifulo fyabo. Nangu babatinishe ifi, na lyo line, tabaumfwile umwenso wa kuya kuli kulya kulongana kwa lulumbi, baliile.
4. Ni mu nshila nshi umo twingalangilila ukuti natubikako amano kuli bambi?
4 Afweni na Bambi Ukusangwa mu Kulongana: Paulo apapeete bamunyina ‘ukutontonkanya ifya kucincishanya.’ (Heb. 10:24) Bushe bamunyinenwe na bankashi yenu mwi Sambililo lyenu ilya Citabo pa Cilonganino balefwaikwa ukubafwa pa kuti bengasangwa mu kulongana? Bushe abo musambilisha Baibolo kuti mwabafwa ukuipakisha ukulongana pamo nenu, nangu fye ubushiku bumo? Ilyo muleishibisha balupwa wenu abashipepa pa fyo mulepekanya ukuya mu kulongana, nabo bene kuti mwabeeta ukuya nenu. Nga mwabombesha no mweo onse, ala kuti mwapapa ifyo mwingapaalwa.
5. (a) Kuti twacita shani nga tulefwaya ukwishiba inshiku ne fifulo ukukabela ukulongana kwa fitungu? (b) Finshi tulingile ukucita nga tulefwaya ifyebo pa kulongana kwa citungu kumbi uko icilonganino twabamo cishakaye?
5 Ifya Kucita pa Kuti Mwingeshiba Ifyebo Mulefwaya: Iofeshi lilapokelela amafoni cila mwaka ku bantu bafwaya ukwishiba inshiku sha kulongana kwa citungu e lyo ne fifulo ukukabela ukulongana. Ilingi line amafoni ayengi yafuma kuli bamunyinefwe na bankashi yesu abapokelela kale ifi ifyebo. Ilyo tamulatuma foni ku ofeshi, tuleti intanshi mulingile ukumona mu Ubutumikishi Bwesu Ubwa Bufumu ubwa March 2008. Pe bula 5 muli buno Ubutumikishi muli umutande wa mashina ya fifulo fyonse ukukabela ukulongana kwa fitungu muno Zambia. Nga ca kuti mulefwaya ukwishiba ifyebo pa kulongana kwa citungu ukukabela ku cifulo cimbi uko icilonganino mwabamo cishakaye, kuti mwalembela kalata kuli ico cine cifulo mulefwaya. Nga ca kuti mu musumba muli ukulongana kubili no kucilapo, mulingile no kulangilila ululimi ne nshiku sha uko kulongana uko mulefwaya ukuyasangwa.
6. Fishinka nshi ifyo tulingile ukwishiba pali formu ya kuti Ukulomba Umuputule?
6 Ukukabila Kwaibela: Nga ca kuti kasabankanya alelomba umwa kuyaikala, Komiti ya Mulimo pa Cilonganino ilingile ukupingula nampo nga kasabankanya kuti atuma formu ya Kulomba Umuputule nangu iyo. Ilyo kalemba talatuma iyi formu kuli Dipartimenti ya Miputule, alingile intanshi abelenga amafundisho yaba pali iyi yine formu.
7. Mulandu nshi ukulongana kwa lulimi lwa bacibulu kukabela fye mu fifulo fimo ifya kulongana kwa citungu?
7 Ululimi lwa Bankomamatwi (Sign Language): Nga fintu mumwene pa mutande wa fifulo fya kulonganinapo icitungu muno Zambia, ululimi lwa kubomfya ifishibilo ulwa bankomamatwi lukaba fye PA FIFULO FIBILI EPELA, ku Lusaka ku ciNgeleshi na ku Ndola ku ciNgeleshi. Kumbi TAKWAKABE ulu lulimi nakalya. Ifi tuteyenye e fingabomba bwino, pantu e lyo twingakwata aba kwilula abaishiba sana kabili kukaba abantu abengi pa kuti ukwampana kwa bwananyina kukabe ukwa kukoselesha. Baeluda e lyo na baishiba ukwilula ulu lulimi bafwile ukwishibisha bankomamatwi mu filonganino fyabo pa kuti bengeshiba pa lwa uku ukupekanya kabili balingile ukubafwa ukupekanya ukusangwa kuli kumo pali uku kulongana ukwa ulu ululimi lwa bankomamatwi. Baeluda bafwile no kwipusha bankomamatwi baba mu cilonganino cabo pa kuti bengeshiba nga balekabila ubwafwilisho.
8. Finshi tufwile ukukonka ilyo tulepekanya imyendele?
8 Ukupekanya Ifya Kwenda: Ifilonganino fimo filafwaya ifimbayambaya fya kulipila ifya kubatwala ku cifulo ca kulonganinapo. Ifimbayambaya fyonse ifyo mukafwaya fifwile ukuba ifituntulu kabili fifwile no kukwata umusonko wa kulangilila ukutila fyalisuminishiwa ukwenda pa musebo. Ifimbayambaya tafifwile ukwisula ukucila mu cipimo. Munyinefwe uwakosoka kuti apeelwa umulimo wa bukapitao ilyo mulepekanya. Akalaeba ibumba fyonse ifyo umulimo wa kupekanya ulwendo uleenda, no kubeeba inshita bakabasenda e lyo na po bakalaninina. Nga kwaba ubwafya pe bumba mulingile ukweba kapitao, e ulingile ukulanda ifya kucita. Nga ca kutila kwaba fimo ifilefwaikwa uwa kubombelapo, ukupandako bambi mano, nelyo ukubombela pa bwafya fye bumbi, bamunyinefwe aba mucetekenya kuti babombelapo.
9. Ni nshila nshi twingalumbanishishamo Yehova ilyo tuli pa kulongana kwa citungu?
9 Imilimo Isuma: Icumfwila ku cebo ca kwa Yehova ica kuti tulingile ukulongana pamo ku kupepa cilatulenga ‘twanonkelamo fwe bene.’ Icacilapo kucindama ca kuti, cilatupeela ishuko lya kucindika ishina lya kwa Yehova. (Esa. 48:17) “Imilimo isuma ilamoneka apabuuta” ku bantu abengi pa kulongana kwa citungu, ica kuti bamo balema baisa na mu kulandapo. (1 Tim. 5:25) Imibele yesu iisuma ilaleta insansa ku mutima wa kwa Lesa wesu, Yehova!
10. Bushe Mateo 4:4 alangilila shani ubucindami bwa kulakutikisha amalyashi yonse?
10 Yesu atile imyeo yesu yashintilila pa kumfwa “icebo conse icifuma mu kanwa ka kwa Yehova.” (Mat. 4:4) Pa kulongana kwesu ukwa citungu ukwa cila mwaka, Yehova alapekanya ica ‘kulya ca ku mupashi pa nshita iyalinga,’ icipekanishiwa no “musha wa cishinka kabili uwashilimuka.” (Mat. 24:45) Kulaba ukubombesha pa kupekanya no kupakula uyu mutebeto wa ku mupashi. Shi natukasangweko inshiku shonse shitatu no kulakutikisha amalyashi yonse e lyo tukalangilila ukuti tulatasha pa fyo Yehova atusakamana bwino.
[Akabokoshi pe bula 3]
Inshita sha Kulongana:
Ubushiku bwa Kubalilapo no Bwalenga Shibili
8:20 hrs. - 15:55 hrs.
Ubushiku Ubwalenga Shitatu
8:20 hrs. - 15:00 hrs.