Ukulongana kwa Citungu Ukwa Nte sha kwa Yehova Ukuleti “Mulelola!” Ukwa mu 2009
1. (a) Mapaalo nshi tukapokelela nga twasangwako mu kulongana kwa citungu inshiku shonse shitatu? (b) Kuipekanya kwa musango nshi uko tulingile ukutendekako pali ino nshita?
1 Bonse fye tulelolela Ukulongana kwa Citungu ukwa mu 2009 pa kuti tukalongane pamo na bakapepa banensu aba kwa Yehova, “abaishiba ukuti balakabila ifya kwa Lesa.” (Mat. 5:3) Apo ubushiku bwa kwa Yehova bwile bulepalama nga nshi, tulemucincisha bonse ukuti mukasangweko inshiku shonse shitatu pa kuti mukanonkelemo nga nshi mu kwampana kusuma na Bena Kristu banenu pamo no kukoseleshanya kwa Bwina Kristu pa kuti mwingaba abashangila mu citetekelo. (Sefa. 1:14) Lekeni bakafundisha na bamwingisha incito bakeshibe ukuti ukulongana kwa citungu na ko kwalicindama nga nshi mu kupepa kwenu. Ipekanyeni bwino ilyo kucili inshita no kulomba ipaalo lya kwa Yehova pa kuti mube abashipa; nga mwabangilila ukuipekanya akamwafwa icine cine.—Esa. 50:10.
2. Mulandu nshi tushilingile ukuyila ku kulongana kwa fyalo ifingi nga ca kuti tatwasalwa ukuyasangwako?
2 Ukulongana kwa Fyalo Ifingi: Apo uku kulongana kukaba fye mu fyalo ifinono na mu misumba imo imo, abalingile ukuya kuli uku ukulongana ni abo fye abaebwa ukuti balingile ukuya. Nga twakonka ubu butungulushi ninshi abantu tabakafule ukucila mu cipimo.—1 Kor. 14:40; Heb. 13:17.
3. Ni nshila nshi twingalangilamo ukutemwa kwa Bwina Kristu kuli bamo mu cilonganino cesu?
3 Ukwafwa Bambi Ukusangwa ku Kulongana: Bushe kuli bamo mu cilonganino cenu abalekabila ubwafwilisho pa kuti bakasangwe ku kulongana kwa citungu? Nga ca kuti mwayafwa bamo ukuya mu kulongana ninshi “tamubika fye amano ku fyo mulefwaya fye mwe bene, lelo mulabika amano na ku fyo bambi bafwaya.”—Fil. 2:4.
4. Bushe bamo baipeeleshe shani pa kuti fye basangwe ku kulongana kwa citungu?
4 Abantu ba kwa Yehova tabalinganya indalama ku mapaalo yaba mu kusangwa ku kulongana kwa citungu. Umfweni ifyo cali kuli bamo abapangile ukuti mpaka fye bakasangwe ku kulongana kwa ba mu fyalo ifingi ukwa Nte sha kwa Yehova ukwaliko mu 1958 mu New York, ukwakwete umutwe wa kuti, Ukufwaya kwa Bulesa. Pa mulandu wa kuti munyinefwe umo alefwaya ukuyabombako umulimo wa kuitemenwa na pa kuti engasangwako mu kulongana, apingwilepo ukwisala akampani kakwe aka makuule pa milungu ibili. Munyinefwe wa ku fishi ifyo beta ukuti Virgin Islands ashitishe impanga ya maeka yasano pa kuti aba mu ng’anda yakwe bonse 6 bakasangwe ku kulongana. Umulumendo umo no mwina mwakwe bashitishe ubwato bwabo ubwa injini pa kuti basende abana babo bonse batatu, ukutendekela fye ku mwana wa myeshi ibili mpaka na ku wa myaka 7. Ku Kalifornia, abalumendo batatu pali bumunyina, aba mu ng’anda fye imo ine babebele ukuti nga bafuma pa ncito baya mu kulongana, ilyo bakabwela bakasanga balingishapo bambi pa fifulo fyabo. Nangu babatiinishe ifi, na lyo line, tabaumfwile umwenso wa kuya kuli kulya kulongana kwa lulumbi.
5. Nga ca kuti kuli ifyalenga ukuti tukasangwe ku kulongana kwa citungu kumbi ukucila uko icilonganino cesu cifwile ukusangwa, finshi tufwile ukucita?
5 Ukukabila Kwaibela: Nga ca kuti kasabankanya alelomba umwa kuyaikala, Komiti ya Mulimo pa Cilonganino ilingile ukumona nga kasabankanya kuti atuma formu ya Kulomba Umuputule nangu iyo. Ilyo kalemba talatuma iyi formu kuli Dipartimenti ya Miputule, alingile intanshi abelenga ifyebo fyaba pali iyi yine formu.
6. Mulandu nshi ukulongana kwa mu lulimi lwa bankomamatwi kukabela fye pa fifulo fibili ifya kulongana kwa citungu?
6 Ululimi lwa Bankomamatwi: Nga fintu mwalamona pa mutande wa fifulo fya kulonganinapo icitungu muno Zambia, ululimi lwa bankomamatwi lukaba fye PA FIFULO FIBILI EPELA, ku Lusaka ku ciNgeleshi na ku Ndola ku ciNgeleshi. Kumbi TAKWAKABE ulu lulimi nakalya. Ifi tuteyenye e fingabomba bwino, pantu e lyo twingakwata aba kwilula abaishiba sana kabili kukaba abantu abengi pa kuti ukwampana kwa bwananyina kukabe ukwa kukoselesha. Baeluda e lyo na baishiba ukwilula ulu lulimi bafwile ukwishibisha bankomamatwi mu filonganino fyabo pa kuti bengeshiba pa lwa uku ukupekanya kabili balingile ukubafwa ukupekanya ukusangwa kuli kumo pali uku kulongana ukwa ulu ululimi lwa bankomamatwi. Baeluda bafwile no kwipusha bankomamatwi baba mu cilonganino cabo pa kuti bengeshiba nga balekabila ubwafwilisho.
7. Finshi tufwile ukukonka ilyo tulepekanya imyendele?
7 Ukupekanya Ifya Kwenda: Ifilonganino fimo filafwaya ifimbayambaya fya kulipila ifya kubatwala ku cifulo ca kulonganinapo. Ifimbayambaya fyonse ifyo mukafwaya fifwile ukuba ifituntulu kabili fifwile no kukwata umusonko wa kulangilila ukutila fyalisuminishiwa ukwenda pa musebo. Ifimbayambaya tafifwile ukwisula ukucila mu cipimo. Munyinefwe uwakosoka kuti apeelwa umulimo wa bukapitao ilyo mulepekanya. Akalaeba ibumba fyonse ifyo umulimo wa kupekanya ulwendo uleenda, no kubeeba inshita bakabasenda e lyo na po bakalaninina. Nga kwaba ubwafya pe bumba mulingile ukweba kapitao, e ulingile ukulanda ifya kucita. Nga ca kutila kwaba fimo ifilefwaikwa uwa kubombelapo, ukupandako bambi mano, nelyo ukubombela pa bwafya fye bumbi, bamunyinefwe aba mucetekenya kuti babombelapo.
8. Cinshi tulingile ukubikako sana amano ilyo tuleipekanya ukuya mu Kulongana kwa Citungu ukwa mu 2009?
8 Imilimo Iicindika Lesa: Nga tulelanga ifisabo fya mupashi muli fyonse ifyo tulecita, no kubika sana amano ku milandile yesu na ku ncitilo shesu ilyo tuli na bantu bambi pa cifulo ca kulonganinapo ukulongana kwa citungu, tulalundako kwi shina lisuma ilyo abantu ba kwa Yehova bapanga e lyo kabili tatupunwisha abantu bambi. (1 Kor. 10:31; 2 Kor. 6:3, 4) Shi lekeni ukuti ukusangwako kwenu ne mibele yenu fikacindike Lesa pa Kulongana kwa Citungu ukwa mu 2009!—1 Pet. 2:12.
[Akabokoshi pe bula 5]
Inshita sha Kulongana:
Ubushiku bwa Kubalilapo no Bwalenga Shibili
8:20 hrs. - 15:55 hrs.
Ubushiku Ubwalenga Shitatu
8:20 hrs. - 15:30 hrs.