Ibungano lya Citungu Ilya Nte sha kwa Yehova Ilya mu 2001 Ilileti “Bakasambilisha wa Cebo ca kwa Lesa”

¹ Kasesema Esaya alondolwele Yehova ukuti ni Kasambilisha Wakulisha, shifwe uutucincisha ukuti: “Iyi e nshila, e mo mwende.” (Esa. 30:20, 21) Lelo ni nshila nshi tumfwilamo ifyebo fya kwa Yehova ifya kutwafwa? Yehova alanda ku bantu bakwe ukupitila muli Baibolo na mu mpapulo shilanda pali Baibolo, ukulongana kwa pa cilonganino, ukwa muputule, ukwa bushiku bwaibela, na pa mabungano ya citungu ifiteyanishiwa no “musha wa cishinka kabili uwashilimuka.” (Mat. 24:45) Tuletasha Yehova ukuti aletwalilila ukututungulula mu nshila ya kwendamo.

² Cila mwaka, ibungano lya citungu lilatupa akashita ka kubungana pamo na basumina banensu no kukutikisha ku fyebo fya kwa Yehova. Uyu mwaka wapwile, abantu 326,888 e basangilwe ku Mabungano ya Citungu ayaleti “Bakacita wa Cebo ca kwa Lesa” ayatwafwile nga nshi lwa ku mupashi. Muno 2001, Amabungano ya Citungu aya nshiku shitatu ayaleti “Bakasambilisha wa Cebo ca kwa Lesa” yakaba muno Zambia monse. Natwishiba ukuti muleipekanya ukusangwako, e co twalemba fino fyebo ku kumwafwa.

³ Ukwa Kwikala: Ilingi line bamunyina batantika ukwikala na balupwa nelyo ifibusa mupepi no kubelele ibungano. Mu mishi, bamunyina balakuula imisakuta nelyo ukusendama mu fipaka ifyo bakabomba ba kuitemenwa aba kwi bungano bateyanya. Amabungano yamo yabomfya ifikuulwa fya pa masukulu ku kwikalamo abeshile kwi bungano. Nga muleikala kuli bamunyina nelyo balupwa, tacalinga ukulya umundemwa no kwenekela ukwikalako inshiku na shimbi pa kuti mutuusheko pa numa ye bungano. Iyi miputule ya kwikalamo fye pa nshita ye bungano epela. Abalesungwa balingile ukushininkisho kuti bena na bana babo bacindika ing’anda ya kwa shibweni no kukanaonaula nangu cimo nelyo ukusakawila mu fipe nelyo ukwingila uko bashilingile ukwingila. Nga kwaba ubwafya pa lwa ici, bashibweni balingile ukweba Dipartimenti wa Mayanda pe bungano, kabili bamunyina bakaitemenwa ukwafwa.

⁴ Ukusakamana Abali no Kukabila Kwaibela: Abakoloci, abanakuka lwa ku mubili, ababa mu mulimo wa nshita yonse, nelyo bambi kuti bakabila ukwafwiwa pa kusangwa kwi bungano. Balupwa, baeluda, na bambi mu cilonganino abeshibe ukabila kwaibela ukwa bantu bamo kuti babasakamana bwino. Tatulingile ukufuntwila abaleteyanya ibungano umulimo wesu ngo lupwa nelyo nge cilonganino (1 Tim. 5:4) Pali formu wa Kulomba Umuputule uwa Sosaite palitantikwa ifyo abafwile ukulomba umuputule balingile ukuba. Komiti wa Mulimo uwa pa Cilonganino alingile ukushininkisha ukuti umuntu uulelomba umuputule nalinga ilyo ashilatuma formu kuli Dipartimenti wa Mayanda. Kalemba wa pa cilonganino alingile ukulembapo na keyala kakwe ne nambala ya telefoni pa kuti Dipartimenti wa Mayanda ingamusanga bwangu epali kwabako amepusho yamo yamo.

⁵ Ukucilikilo Mulilo na Masanso Yambi: Ukwabula no kutwishika, icilenga sana ukupilwa pa mabungano te kwipikila mupepi ne misakuta, lelo bana abangasha umulilo nelyo abo bashiila ukwipika. E ico, pa kutaluka ku busanso bwingamuponena no kuponena bamunyinenwe, mwileka abana benu balelulumba beka; mwishiila abana amenshi yalebilauka, nelyo ukwipika. Napamo balabomba bwino ifi ku ng’anda, lelo icifulo ce bungano capusanako kabili ukusakamana na kumbi kulafwaikwa ku kutalusha amasanso. Kuno kwena abantu bekala pepi pepi, kabili abana balitemwa ukwangala nga bali na bana banabo. Balalafiwa bwangu no kukanamona ubusanso, e co tatufwile ukubashiila kandulo, macisa nelyo inyali. Ubwafya na bumbi bwisa ilyo abafyashi baya ku kulongana no kusha abana beka ku misakuta. Abana balingile ukwikala na bafyashi ilyo amalyashi yalelandwa. Ilyo bakapyunga bamona abana balelulumba beka pe bungano, balingile ukubabwekesha ku bafyashi. Mwe bafyashi, twamulomba ukwikatana na bakabomba ba pe bungano, nga mwacite fyo mukalangisha ‘ukutemwa aba bwananyina bonse.’—1 Pet. 2:17.

⁶ Ukuteyanya kwa kwa Yehova kulatucinkulako bwino pa nshita yalinga pa lwa mabungano. Ku ca bulanda, mu mabungano yamo yamo mu myaka yapita, ifipe fya bamo fyalipiile ku mulilo wayambwike ku mulandu wa mulekelesha. Bamunyina bashingamwa pa mabungano, kabili maka maka abafyashi, balelombwa ukusakamana sana ifi fishinka fyakatama pa kuti amabungano yesu yakabe aya kukuulilila no kubishanya kusuma, kabili pa kuti kwikaba ubulanda pa mulandu wa masanso yafuma mu mulekelesha.

⁷ Imyendele: Imyendele te lyonse iba bwino. Lelo mwileka ici cimufuupule ku kusangwa kwi bungano. Ifilonganino fimo filashima babasi ku kubatwala ku fifulo fye bungano. Bamotoka bonse abo mulebomfya ukusendelamo abaleya kwi bungano balingile ukuba bwino, abalinga ukwenda pa musebo. Tabalingile ukwisula sana. Tuletubulula ukuti munyina wakosoka alingile ukuba kapitao uwa kwangalila imyendele. E wakulaishibisha ibumba pa lwa aya mapekanyo, no kubeshibisha inshita bakulaima no ko bakulaimina. Nga kwabako amafya, kapitao alingile ukwishibishiwa pa kuti amwebe ifya kucita. Nga bamo bakabila ukubafwilisha, ukubafunda, nelyo ukubombela pa bwafya bumo, bamunyina bakosoka kabili abashilimuka bali no kucite co.

⁸ Ukusangwa kwi Bungano Limbi: Icilonganino cimo cimo caebwa ukusangwa kwi bungano mupepi no ko cabela. Ukulingana ne mpendwa ya bakasabankanya baebwa ukusangwa kwi bungano limo, Sosaite ilatunganya impendwa pa kuti ipekanye ifipuna fyakumanina, ukwa kwikala, ifitabo, na fimbipo. Nangu cibe fyo, nga kuli cimo icikalenga kusangilwa kwi bungano limbi kabili mulekabila ukwa kwikala, kalemba wa pa cilonganino kuti alomba formu wa Kulomba Umuputule ukufuma ku Sosaite, uo mulingile ukulemba no kutwala basainapo. Lyene tumeni kwi bungano mukayasangwa.

⁹ Te Konaule Nshita Ukusangwako: Bamunyinefwe abengi balacula nga nshi pa kuti fye basangwe kwi bungano. Bamona amabungano ya bantu ba kwa Yehova ngo bumi bwabo. Bamo benda intamfu ishitali nga nshi pa kuti basangwe kwi bungano, nalyo line tabafwaya ukupuswa kwi bungano nangu limo. Munyina wa myaka ya kufyalwa 73 aendele bakilomita mupepi na 450 ukuyasangwa kwi bungano. Afikile pa numa ya nshiku 16, na makasa ninshi nayafiimba, lelo ali uwa nsansa pa kuti alisangilweko. Pa numa ye bungano, ali ne nsansa nga nshi kabili alikoshiwe lwa ku mupashi, na kabili abwelelemo pa makasa. Lyonse e fyo enda pa myaka iingi!

¹⁰ Bankashi babili baendele ulwendo lwa bakilomita mupepi na 160 pa kuyasangwa kwi bungano. Pali aba bankashi pali umo uo umulume aebele ukuti tabali na kuya kwi bungano, pantu takwete indalama sha kwendela. E fyo cali na kuli nkashi umbi. Aba bankashi babili balikoseleshenye no kupingulapo ukwesha ukwenda fye pa makasa. E fyo bacitile pamo na bana babo kabili bali aba nsansa nga nshi ukuti balisangilwe kwi bungano.

¹¹ Napamo imwe tamwakende intamfu iitali, lelo pa kuti mukayesangwako no lupwa lwenu ukubombesha no kuipusula fikakabilwa. Kuti pambi mwakabila sana ukushipa pa kulomba cuti ku ncito. Bushe mwalimonana na bakalamba ba ncito pa kuti bamupeko cuti alekabilwa? Uno mwaka, amabungano yamo yakaba mu nshita ye sukulu. Nga namukwata abana abaya ku sukulu, mu cikuuku ishibisheni bakafundisha babo ukuti abana benu bakapuswa ku sukulu pa kutila bakasangwe kuli uku kukanshiwa kwa ku mupashi ukwacindama nga nshi.—Amala. 31:12.

¹² Nga bamunyinefwe balumbwilwe mu maparagrafu yabangilileko, na ifwe tulaponenwa na mafya. Lelo ukwabulo kutwishika kuti twapashanya icitetekelo cabo no kupingulapo ukusangwa ku fiputulwa fyonse ifya kulongana kwesu ukwa citungu. Nga mulekabila ukwafwiwa, shintilileni pali Yehova ku butungulushi, ukwishiba ukuti akapaala ukubombesha kwesu ukwa kusangwa kuli programu onse.

¹³ Lobololeni Amapaalo: Tulafuluka Icebo ca kwa Lesa, pa kwishiba ukuti muli cene e mo twingamwena ipusukilo. (1 Pet. 2:2) Ilyo tukasangwa kwi bungano lya citungu no kukutika kuli programu, bonse tukafwiwa ukukosha icitetekelo muli cilya Cebo no kuba abakoselako ku kucimfya ukusansa kwa kwa Satana. Pa kucite fyo, tukalanga Yehova na bantu bambi ukuti tulakatamika nga nshi ifyashila kabili “tatuli abakwinda . . . lelo tuli abakwate citetekelo no kusunge mitima yesu.”—Heb. 10:39; 12:16; Amapi. 27:11.

¹⁴ Ibungano lya mu Lulimi lwa Bankomamatwi: Pe bungano lya citungu ilya ku Lusaka, kukaba ukupilibula iciNgeleshi ukutwala mu lulimi lwa bankomamatwi. Programu onse akapilibulwa kuli bonse abakasangwako mu lulimi lwa bankomamatwi ulwa cina Amerika, pa kuti na bo bakaipakishe uku kubishanya kwa kukuulilila. Pali uyu mulandu, TAKWAKABE AMAPEKANYO yaibela aya kupilibula mu lulimi lwa bankomamatwi pa mabungano yambi. Cili icacindama ukuti bankomamatwi bonse NOMBA LINE batendekeko amapekanyo ya kusangwa kwi bungano ukukaba ukupilibwila programu mu lulimi lwa bankomamatwi. Baeluda balingile kulanda na bankomamatwi bonse ababa mu cilonganino cabo no kushininkisha ukuti nabeshiba ulwa uku kupekanya no kumona nga balekabila ukwafwiwa pa kuyasangwako. Nga kuli abalefwaya ukwa kusendama, shi moneni amaparagrafu 3 na 4.

¹⁵ Insondwelelo: Ilyo inshita ilepalama iya kuti musangwe kwi bungano lyenu ilya citungu, pepeleni uyu mulandu kuli Yehova pa kuti mukasangwe ku fiputulwa fyonse pa nshiku shonse shitatu no kunonkelamo nga nshi muli programu. Bushe kale kale mwalilomba cuti ku ncito uwa nshiku shitatu ishe bungano ilyo mulefwaya ukusangwako? Nga tamulalomba cuti, lombeni nomba line. Ilingi line tacibomba ukulomba cuti ilyo kwashala fye inshita inono. Umusha wa cishinka kabili uwashilimuka napekanya Ibungano lya Citungu ilya uno mwaka ilileti “Bakasambilisha wa Cebo ca kwa Lesa” ku kutuliisha lwa ku mupashi no kukuulilila icitetekelo cesu. E co tendekeni ukupekanya nomba ukusangwako, konkeni ukukonkomesha kwa kwa kemba wa malumbo uwatile: “Cindikeni Lesa mu nkuta”!—Amalu. 68:26.

ICISHIBISHO: Kalemba wa cila cilonganino akalolekesha pali fyonse ifikumine kwi bungano lya citungu no kucincimusha bambi pa lwa lyene. Nga kalemba talipo, eluda umbi uwafikapo afwile ukubomba iyi milimo. Kalemba afwile ukubombelapo bwangu bwangu pali fyonse ififwile ukucitwa ifyo iofeshi lye bungano lyalemba muli bakalata ukukuma ku fintu pamo nga umwa kwikala, umulimo wa kuitemenwa ne ncito iibako ilyo ibungano lishilatendeka na lintu lyapwa. Afwile akwata inshita iikalamba iya kuti engabelenga bakalata be bungano bonse kabili no kubalondolola (te kulanda fye mu mashiwi yakwe IYO). Baeluda bonse, maka maka kalemba, bafwile ukwishiba bwino imipekanishishe ye bungano iyasabankanishiwa muli bakalata na mu Ubutumikishi Bwesu Ubwa Bufumu.