Ibungano lya Citungu Ilya Nte sha kwa Yehova Ilya mu 2000 Ilileti “Bakacita wa Cebo ca kwa Lesa”
1 “Nkamutootela mu lukuta lukalamba; nkamutashisha mu bantu abengi.” (Amalu. 35:18) Tontonkanyeni fintu Davidi engomfwa bwino ilelo ukumona abantu abengi nabalongana capamo pa mabungano ku kusambilishiwa kuli Lesa! Bushe na imwe e po mwali pa bantu 321,545 abalongene pa Mabungano ya Citungu aya “Icebo ca Kusesema Ica kwa Lesa”? Ukufuma pa August 13 ukufika pa September 12, 1999 kwali amabungano 55 mu Zambia. Amabungano ya citungu aya mu 2000 yakatupayanishisha amashuko na yambi aya kulongana capamo na bakalumbanya banensu aba kwa Yehova “abaibukila ulwa kukabila kwabo ukwa ku mupashi” kabili aba nsansa, abafwaisha ‘ukumfwa ico umupashi ulesosa ku nkuta.’—Mat. 5:3, NW; Ukus. 2:29.
2 Ukwa Kwikala: Ilingi line bamunyina balatantika ukwikala na balupwa nelyo ifibusa mupepi no kubelele ibungano. Mu mishi, bamunyina balakuula imisakuta nelyo ukusendama mu fiyanda ifyo bakabomba ba kuitemenwa aba kwi bungano bateyanya. Amabungano yamo yabomfya ifikuulwa fya pa masukulu ku kwikalamo abeshile kwi bungano. Nga muleikala kuli bamunyina nelyo balupwa, tacalinga ukulya umundemwa no kwenekela ukwikalako inshiku na shimbi pa numa ye bungano. Iyi miputule ya kubomfya fye pe bungano epela. Abalesungwa balingile ukushininkisho kuti bene pamo na bana babo bacindika ing’anda ya kwa shibweni no kukanaonaula icili conse nelyo ukusakawila mu fipe nelyo ukwingila ukushilingile kwingilwa. Nga kwaba ubwafya pa lwa ici, bashibweni balingile ukweba Dipartimenti wa Mayanda pe bungano, kabili bamunyina bakaitemenwa ukwafwa.
3 Ukusakamana Abali no Kukabila Kwaibela: Balupwa, baeluda, na bambi mu cilonganino abeshibe imibele yaibela iya bakoloci, abanakuka lwa ku mubili, ababa mu mulimo wa nshita yonse, nelyo bambi aba mu cilonganino cenu ababa no kukabila kwaibela kuti mu kutemwa babasakamana ukupitila mu kubafwilisha ukusangwa kwi bungano. (Linganyeniko 1 Timote 5:4.) Formu wa Kulomba Umuputule uwa Sosaite alitantika imilingo ya bafikapo ukulomba umuputule. Ici cicitilwa fye bakasabankanya abashimikwa bwino, ukusanshako abakwata abana abomfwa, abasuminishiwa na Komiti wa Mulimo uwa Cilonganino. Aya maformu yalingile ukutumwa ku Dipartimenti wa Mayanda mu kwangufyanya.
4 Ukucilikilo Mulilo na Masanso Yambi: Ukwabula no kutwishika, icilenga sana ukupilwa pa mabungano te kwipikila mupepi ne misakuta, lelo bana abangasha umulilo nelyo abo bashiila ukwipika. E co, pa kusengauka ubusanso bwingamuponena na bamunyinenwe, mwileka abana benu balelulumba beka; mwishiila abana amenshi yalebilauka, nelyo ukwipika. Napamo balabomba bwino ifi ku ng’anda, lelo icifulo ce bungano capusanako kabili ukusakamana kwalundwako kulafwaikwa ku kusengauka amasanso. Kuno kwena abantu bekala pepi pepi, kabili abana balitemwa ukwangala nga bali na bana banabo. Balalafiwa bwangu no kukanamona ubusanso, na muli fyo tatufwile ukubashiila kandulo, machisa nelyo amalampi. Ubwafya na bumbi bwisa ilyo abafyashi baya ku kulongana no kusha abana beka ku misakuta. Abana balingile ukwikala na bafyashi ilyo amalyashi yalelandwa. Ilyo bakapyunga bamona abana balelulumba beka pe bungano, balingile ukubabwekesha ku bafyashi. Mwe bafyashi, twapaapaata ikataneni na bakabomba ba pe bungano na muli fyo mukalangisha ‘ukutemwa aba bwananyina.’—1 Pet. 2:17.
5 Ukuteyanya kwa kwa Yehova mu kutemwa kulatucinkulako pa nshita yalinga pa lwa mabungano. Ku ca bulanda, mu mabungano yamo yamo mu myaka yapita, ifipe fya bamo fyalipiile ku mulilo wayambwike ku mulandu wa mulekelesha. Bamunyina bashingamwa pa mabungano, kabili maka maka abafyashi, balelombwa ukusakamana sana ifi fishinka fyakatama pa kuti amabungano yesu yakabe ya kukuulilila no kubishanya kusuma, kabili pa kuti kwikaba ubulanda pa mulandu wa masanso yafuma mu mulekelesha.
6 Ukusangwa kwi Bungano Limbi: Icilonganino cimo cimo caebwa ukusangwa kwi bungano mupepi no ko cabela. Ukushimpwa pa mpendwa ya bakasabankanya abaebwa ukusangwa kwi bungano limo, Sosaite ilatunganya impendwa pa kuti ipekanye ifipuna fyakumanina, ukwa kwikala, ifitabo, na fimbipo. Nangu cibe fyo, nga kuli umulandu usuma uwa kusangilwa kwi bungano limbi kabili mulekabila ukwa kwikala, kalemba wa cilonganino kuti alomba formu wa Kulomba Umuputule ukufuma ku Sosaite, untu mulingile ukulemba no kutwala basainapo. Lyene tumeni kwi bungano mukayasangwako.
7 Pekanyeni Ukuti Mukalongane Inshiku Shonse Shitatu: Bushe Satana alyesha ukumupumbula mwaleka no kupoosako amano ku fya ku mupashi? Ku ca bulanda, bamunyina abengi na bankashi ne ndupwa shabo balapuswako ku fya kulya fya ku mupashi ifyacindama. Ni shani bapuswako? Pa kukanasangwa ku malyashi pe bungano lya citungu aya pa bushiku bwa kubalilapo. Limo calimonwa ukuti bamunyinefwe abengi balapuswako ku kufunda kwa ku mupashi no kubishanya ukubako pa bushiku bwa kubalilapo.
8 Calicitikapo kuli bamunyina bamo ukushimunuka ukuya ku bakalamba ba ncito no kubalomba inshiku sha kutusha pa kuti bakasangwe kwi bungano. Bushe na imwe mulashimunuka? Nga ni fyo, pepeni kuli Yehova pa lwa ici, kabili lyene shipeni no kuyalondolwela abakalamba ba ncito pa lwa ici. Ibukisheni ifisuma ifyafuminemo kuli Nehemia, uwakwete ubwafya ubwapalana na buntu mukwete. (Nehe. 2:1-6) Cetekeleni ukuti Shifwe wa mu muulu aliba uwaitemenwa ukumwafwilisha, no kwishibo kuti nga ca kuti mwatangisha ifya Bufumu, akapayanya ifintu mukabila mu bumi.—Mat. 6: 32b, 33.
9 Bushe Amabungano Yesu Yamwafwa Shani? Nkashi umo alembele ati: “Ndetasha sana pe bungano lya citungu ilya mu 1999. Ndaba ne nsansa sana ukubishanya na bamunyina abo mona fye pa mwaka. Natendeke ukusambilila icine lintu nali ne fumo kabili ilyo nali umupungwe, kabili ncili ndatemwa sana ilyo naibukisha inshita uwalentungulula isambililo lya Baibolo ansendele kwi bungano nabalilepo ukusangwako. Naloleshe amakumbi mu muulu muli cilya cibansa lintu twaleimba ulwimbo lwa Bufumu ulutila ‘Iminshipendwa ya Bamunyina,’ kabili nalililile. Naliipwishe ne mwine nati, ‘kuti Yehova amfwaya shani apo kwaliba bantu bonse aba abasuma ifi?’ Ubo bushiku napingwilepo ukubombela Yehova no mutima onse.” Mwandi ico ca kukoselesha! Cilaleta insansa nga nshi ukubishanya na bantu ba kwa Yehova aba mibele isuma, bushe te ifyo?
10 Muli shino nshiku sha kulekelesha, tulakabila ibungano lya citungu ilya cila mwaka ukucila na kale lyonse. Lyaba kupayanya kwa kwa Yehova ukwa kutwafwa ukusungilila bumupashi bwesu no kuba abashikatala. E ico pingulenipo ukulongana inshiku shonse shitatu ishe Bungano lya Citungu ilya uno mwaka ilileti “Bakacita wa Cebo ca kwa Lesa.” Ni shani fintu mwingacita ifyo mwapingulapo? Lombeleni kabela abakalamba ba ncito inshiku sha kutusha pa kuti mukasangwe kwi bungano lyonse. Nga ca kuti mukwate ndalama ishinono, tendekeniko nomba ukusunga indalama sha kuti mukasangilwe ku kulongana. Lombeni Yehova ukumwafwilisha ukupikulula ubwafya ubuli bonse. Ilyo mulecite co, kuti mwaenekela ukuyabishanya na bamunyinenwe ne nkashi no kumfwa ifyebo fya mweo wa muyayaya ukufuma kuli Shifwe wa ku muulu Yehova.—Linganyeniko Yohane 6:68.
ICISHIBISHO: Kalemba wa cila cilonganino akalolekesha pali fyonse ifikumine kwi bungano lya citungu no kucincimusha bambi pa lwa fyene. Nga kalemba talipo, eluda umbi uwafikapo afwile ukubomba iyi milimo. Kalemba afwile ukubombelapo bwangu bwangu pali fyonse ififwile ukucitwa ifyo iofeshi lye bungano lyalemba muli bakalata ukukuma ku fintu pamo nga umwa kwikala, umulimo wa kuitemenwa na fimbipo. Kufwile ukubako inshita iikalamba iya kuti engabelenga bakalata be bungano bonse kabili no kubalondolola (te kulanda fye mu mashiwi yakwe IYO).