Ibungano lya Citungu Ilya Nte sha kwa Yehova Ilya “Tetekeleni Icebo ca kwa Lesa” Ilya 1997
1 “Ubushiku bumo mu mansa shenu bwawama ukucile nshiku ikana limo pa nse.” (Ilu. 84:10) Lintu kemba wa malumbo apepele pe tempele lya kwa Yehova, alibukile ukuti Lesa wa maka yonse e po aali. Lintu uluko lwalongene ku mitebeto yabo iya pa mwaka na bakapepa ba cine ukwisula mu Yerusalemu, abena Israele bali no kuipakisha ukubishanya kwawamisha ilyo balelongana mu lubansa lwe tempele. Balecinkulwako ulwa kwikatana kwabo ukwa luko ukuti baali e bantu fye beka pe sonde abo Yehova abikilepo ipaalo lyakwe no bubile. Cila mwaka, tulakwata ishuko lya kuyumfwa fimo fine pa lwa kwikatana kwesu no buseko na bamunyinefwe ne nkashi. Muno nshiku amabungano ya citungu aya pa mwaka e imo iya nshila Yehova alonganikilamo abantu bakwe ku kufundwa no kubishanya.
2 Ukusakamana impendwa yakulisha iya bantu ba kwa Yehova abaleikala mu Yerusalemu ne ncende shashingulwikeko mu nshita sha mitebeto kwalefwaya ukuteyanya. Ukusungilila umuyano no mutende cilemoneke fyo kwalekabila ukupeela amakambisho ukukuma ku kwa kwikala, inshita sha kulongana, ne fintu fimbi. Apantu iyi milandu yakumine ukupepa kwabo ukwa cine, Abena Israele bali no kukonka aya makambisho mu nsansa.—Ilu. 42:4; 122:1.
3 Ilyo amapekanyo ye Bungano lya Citungu ilya 1997 ilya “Tetekeleni Icebo ca kwa Lesa” yaletwalilila, natukwata ifishinka fimo ifilefwaikwa ukuti musakamane no kulangulukapo mu kusakamanisha. Nga mwakonka ifi, cikalangilile fyo pa lwenu mulatasha pa fyo mutantikiilwe. Nangu ca kuti imilandu imo imo pali iyi yalilandwapo kale, cili icakatama ukuti umo na umo uwa ifwe tumone icishingamo cesu bwino bwino pa ntanshi ya kwa Yehova mu kutungilila ukutantika kwe bungano lyesu.
4 Ukupekanya Amayanda: Ilingi line bamunyina balaipekanishisha abene ukwikala na balupwa lwabo nelyo ifibusa mu misumba umubelele amabungano. Mu ncende sha mu mishi, bamunyina balakuula imisakuta nelyo ukusendama mu fipaka ifipangwa na bakabomba ba kuitemenwa abe bungano. Amabungano yanono yabomfya amayanda yekalamo abana ba masukulu pa kuti bengapayanishisha abalesangwako umwa kwikala. Lintu babapeela umwa kwikala kuli bamunyina nelyo balupwa lwabo, tacili icalinga ku makombe ukushukila icileela ca bamunyinefwe mu kukanalangulukilako pa kwenekela ukwikala inshiku shalundwako pa kuti bengatuusha pa numa ye bungano. Iyi miputule ya ciputulwa ca nshita ice bungano epela. Abo abapokelela amayanda ya musango yo balingile ukushininkisha ukuti bene na bana babo baikala mu mucinshi mu ŋanda ya kwa shibweni wabo no kukanaonaula icili conse nelyo ukusakawila mu fipe nelyo incende shimbi isha mu ŋanda. Nga ca kuti abene mayanda bakumanya ubwafya ubuli bonse ukulola kuli ifi fyatubululwa, balingile ukweba Dipartimenti wa Mayanda pe bungano mu kwangufyanya, kabili bamunyina kulya bakaba abaitemenwa ukwaafwa.
5 Ukusakamanwa Kwaibela: Uku kupayanya kwa bakasabankanya ba ca kumwenako cisuma epela, ukusanshako ababa na bana ba mibele isuma, abasuminishiwa na Komiti wa Mulimo uwa Cilonganino. Ababa no kukabila kwaibela ni bamunyinefwe ne nkashi, kabili tulefwaya ukubaafwa.—Yako. 2:15-17; 1 Yoh. 3:17, 18.
6 Abakoloci, abalwalilila, aba mu mulimo wa nshita yonse, nelyo na bambi kuti pambi bafwaya ukwafwiwa pa kuti bengasangwa kwi bungano. Balupwa, baeluda, na bambi mu cilonganino abaishiba ukukabila kwa aba ukwaibela mu kutemwa kuti batantika ifilekabilwa, ukucila ukukuusha icishingamo ca lupwa ne cilonganino kuli bakabomba ba pe bungano. (Linganyeniko 1 Timote 5:4.) Ilyo mushilaisushisha formu wa Kulomba Umuputule, belengeni mu kusakamanishisha ifyebo fyabela pe samba lya uyu formu. Uku kulomba kulingile ukutumwa kuli Dipartimenti wa Mayanda mu kwangufyanya.
7 Abo abakwata ukukabila kwa kusakamanwa kwaibela TABALINGILE ukuya kwi bungano no kwipusha umwa kwikala lintu bafika, pantu Dipartimenti wa Mayanda afwile ukwebekeshiwa ukufuma kuli Komiti wa Mulimo uwa Cilonganino.
8 Amakombe Ayasangwako Ukufuma ku Nse ya Ncende Yabo: Mupepi na lyonse, icifulo icipeelwa kuli imwe ukusangwako ciba ni cimo icipalamishe ku cilonganino cenu. Ukupekanya kwa kukwata ifipuna fyakumanina, impapulo, amayanda, na fimbipo, kushintilila pa cinabwingi ca bakasabankanya bakasangwa kwi bungano uko icilonganino cabo capeelwa. Nangu cibe fyo, nga ca kuti pa mulandu usuma mukasangwa kwi bungano limbi mu cifulo ca ilyo mwapeelwa kabili mulekabila umwa kwikala, kalemba wa cilonganino kuti pambi aorda formu wa Kulomba Umuputule ukufuma ku Sosaite, untu mulingile ukwisusha no kusainisha. Lyene mukautume ku maofesi ye bungano uko mukasangwa.
9 Ukubombela Pamo Kwenu Kulakabilwa: Ukutunguluka kwa uku kutantika kwa mayanda kushintilila pa kubombela pamo ukwa bonse ababimbilwemo.—Linganyeniko AbaHebere 13:17.
10 Pa kubimbwamo mu mabungano ya bantu ba kwa Yehova, tulakoshiwa ukucita ukufwaya kwa kwa Yehova kabili tulacingililwa ku kusonga kwa ku calo ukwa ku nse uko ukwinganasha icitetekelo cesu ica Bwina Kristu. Bonse kuti twatasha Yehova ukuti alipayanishisha abantu bakwe abaipeela ifi fiputulwa fya nshita ifya kupembesula kwa ku mupashi muli ino nshita ya mpela.
11 Ukucilikila Umulilo na Masanso Yambi: Ukwabulo kutwishika, icikalamba icilenga ubusanso bwa mulilo pa mabungano, tacaba kwipikila ifya kulya mupepi ne misakuta, lelo bana abashangalilwa bwino abangasha umulilo nelyo abekala ku mulilo. E ico, pa kuti imwe na bamunyinenwe mucingililwe, mwilaleka abana benu ukwendauka ukwabula ukusakamanwa; mwilashiila abana banono ukusakamana amenshi yalebilauka, nelyo mu nshila imbi ukusakamana umulilo wa kwipikila. Kuti pambi bakwata amaka ya kucite fi fintu bwino ku ŋanda, lelo icifulo ce bungano cintu capusanako kabili mulingile ukuba abasakamana apakalamba pa kusengauka amasanso ukucitika. Abantu abengi bekala capamo mu kupalamisha, kabili abana batemwa ukwangala ifyangalo lintu bali na baice banabo. Balapumbulwa mu kwanguka kabili tabamwena libela ubusanso, kabili pali iyi milandu tatulingile ukubapeela kandulo, macisa nelyo inyali. Ubwafya na bumbi bulabako lintu abafyashi baya ku kulongana mu kasuba no kusha abana banono mu misakuta ukwabulo kusakamanwa. Abana balingile ukwikala na bafyashi babo mu kati ka programu. Lintu bakapyunga bamona abana baleendauka mu cifulo ce bungano ukwabulo kusakamanwa, kuti batungulula abo bana ukubwelela ku bafyashi babo. Mwe bafyashi, twapaapaata bombeleni pamo na bakabomba ba pe bungano kabili muli iyi nshila langilileni “[ukutemwa] aba bwananyina.”—1 Pet. 2:17.
12 Ukuteyanya kwa kwa Yehova mu kubamo kutemwa kulapayanya ifya kucinkulako fya pa nshita yalinga ifikumine amabungano. Ca bulanda ukusoso kuti pa mabungano yafulilako imyaka yafumako, abalesangwa kwi bungano bamo balilufishe ifipe fyabo mu mulilo uyo wali no kusengaukwa. Abo bamunyina abashingamwa pa mabungano, kabili ukucilisha abafyashi, baleipushiwa ukusakamana ifi fishinka fyacindama pa kuti amabungano yesu yakalenge ukubishanya kwa kukuulilila kabili ukusuma, kabili takwakapone ubulanda ne nkumbabulili pa mulandu wa mulekelesha uuletako amasanso.
13 Cintu cilemoneka kuli ifwe bonse ukuti Yehova aletungilila ukutantika kwa mabungano ya pa mwaka. Apantu iyi milandu yakuma ku kupepa kwa cine, tulingile ukukonkelela amakambisho yapeelwe mu nsansa. Ukushininkisha ukuti twaliba ‘abacishinka mu cacepesha’ kutulenga ukupokelela amapaalo yawamisha ayapembelela abo Yehova atemwa.—Luka 16:10.
14 Esaya 33:20 atila: “Tamba Sione, umusumba wa nshita shesu [isha mitebeto, NW].” Kuti twaelenganya fye amabumba ya nsansa ayaleisula mu Yerusalemu no kwankula kwi kambisho lya kwa Yehova mu kuitemenwa ilya ‘kuba fye abasamwa.’ (Amala. 16:15) Amabungano yesu aya citungu aya pa mwaka yatupeela ishuko lya mu nshita ilyawamisha ilya kumfwa ku kufunda kwa bulesa no kuipakisha ukubishanya kwa cikabilila na bamunyinefwe ne nkashi. Shi Yehova napaale ukubombesha kwenu ilyo muleipekanya ukusangwa ku Mabungano ya Citungu aya 1997 aya “Tetekeleni Icebo ca kwa Lesa.”