Ukulongana kwa Citungu Ukwa Nte sha kwa Yehova Ukwa mu 2007 Ukuleti “Konkeni Kristu!”
1, 2. (a) Bushe Mose akoseleshe shani abena Israele ukunonkelamo mu kulongana pamo? (b) Finshi tulingile ukutendeka ukupekanya?
1 Mose aebele abena Israele bonse na balebeshi ukulalongana pamo lyonse imyaka 7 nga yapwa, pa kuti baleumfwa ku Mafunde ayalebelengwa. Mulandu nshi balelonganina? “Ku kuleka bomfwe kabili ku kuleka basambilile.” (Amala. 31:10-12) Pali cimo icikalamba ico Yehova alefwaila abantu bakwe ukulalongana ibumba likalamba. Nomba line, abantu ba kwa Yehova bali no kukwata Ukulongana kwa Citungu na kabili ukwa nshiku shitatu ukuleti “Konkeni Kristu!”
2 Bushe mwalitendeka ukuipekanya? Bushe mukakabila ukupoka ulusa ku ncito? Bushe kuti mwayafwa abasambi benu aba Baibolo nelyo balupwa benu abashasumina ukusangwa nenu ku kulongana kwa citungu? Bushe mu cilonganino cenu mwaliba bambi abengakabila ubwafwilisho pa kuti bakasangweko? Bushe mulefwaya ukuyalongana icitungu kumbi uko icilonganino mwabamo cishilonganina? Bushe mukakabila umwa kwikala? Ifyebo fyakonkapo fyalamwafwa ifyo mwingaiteyanya.
3. (a) Bushe Esaya 25:6 alefikilishiwa shani muno nshiku? (b) Bushe impendwa pa bushiku bwa kubalilapo ubwa kulongana kwa citungu iba shani, kabili kuti twacita shani umo umo?
3 Sangweniko Inshiku Shonse Shitatu: Yehova alapekanishisha abantu bakwe ifya kulya fya ku mupashi ifingi. (Esa. 25:6) Pa fya kulya ifyo atupeela paba no mutebeto wa ku mupashi uubako pa kulongana kwa citungu ukubako cila mwaka. Casangwa ukuti pa bushiku bwa kubalilapo impendwa ilacepa sana ukucila ifyo iba inshiku shimbi ishashala. Pangeni ukuti mukasangweko inshiku shonse shitatu pa kuti mukaipakishe ukulongana kwa citungu uko ukuteyanya kwa kwa Yehova kutupekanishishe! Nga mulefwaya ukupoka ulusa ku ncito, pepelenipo pali uyo mulandu. Lyena, ilyo fye babilisha inshiku sha kulongana kwa citungu, ‘shipeni’ no kuyalanda no mukalamba wa ncito. (1 Tes. 2:2; Nehe. 2:4, 5) Nalimo pa kuti bamumfwe, kuti mwalondolwela abene ba ncito ukuti ukulongana kwa citungu ukubako cila mwaka na ko kwalicindama mu kupepa kwenu. Nga mwalombela limo ilyo kucili nshita kuti calenga umukalamba wa ncito ukutantika bwino imilimo pa kuti amusuminishe ukuya.
4. Kuti twacita shani pa kuti twafwe abasambi besu aba Baibolo pamo na balupwa lwesu abashasumina ukusangwa ku kulongana kwa citungu?
4 Ukupekanishisha Abasambi Benu aba Baibolo no Lupwa Lwenu: Ala kuti cawama ukuya ku kulongana kwa citungu pamo na basambi benu aba Baibolo, pa kutila bayaimwene abene ukutemwa ukwa Bwina Kristu ukwaba mu “lukuta lukalamba”! (Amalu. 22:25) Mukabebele libela ilyo kucili inshita pa kutila bakaipekanye ukusangwako. Bebeniko ifisuma ifyaba mu kusangwa ku kulongana kwa citungu. Kuti mwaafwa abasambi ukwishiba ifyo ukulongana kuba nga mwabatambisha amavidio umwaba ukulongana kwa citungu ukwapita, sana sana vidio ya kuti United by Divine Teaching. Ebeniko na balupwa lwenu abashasumina ukuti mulepanga ukusangwa ku kulongana. Napamo kuti baisatambako icilangililo nelyo ukusangwako fye nangu ubushiku bumo.
5, 6. Bushe ukwangushako imiliile kwalenga cituwamine shani kabili mulimo nshi cila muntu afwile ukulabombako?
5 Pali ino nshita ifyo bateyanya ukulongana, te fyo caleba kale, nomba balyangusha ifintu. Batukoselesha ukukaanafusha ifipe ne fya kulya pa cifulo ca kulonganinapo. Twalisambilila ukuti pa kulongana bwino ‘finono fye fikabilwa.’ (Luka 10:42) Ukukaanafusha ifya kulya ifyo tusenda ku kulongana kulacefyanyako ifisooso, ne cifulo ca kulonganinapo cilasuungwa ubusaka. Kwena ifwe bonse tufwile ukusha incende twikelepo ubusaka ilyo tatulaya nga twainuka, e lyo kabili tufwile no kusunga icifulo fye conse ubusaka ubushiku fye bonse.
6 Ilyo Yesu apekanishishe abantu ukucila pali 5,000 ifya kulya, kwali umuyano kabili ilyo fye bapwishishe ukulya kwali incito ya kuwamya. (Luka 9:14, 15; Yoh. 6:10-13) Ilyo abantu ba kwa Lesa baalekonka amafunde ya kwa Mose, abaume bafikapo balesontwa aba kusakamana umwa kuliila pe tempele ukuti muleba umwa muyano. (1 Imila. 9:26) Bushe ifi fyalembwa kuti fyatwafwa ukwiluka ifyo Yehova enekela ifwe ukuba? Tatufwile ukusha twaposaika ifya kupombamo ifya kulya, ifisooso, amabotolo no tupendo nangu amapulastiki pa cifulo ca kulonganinapo. Komiti we bungano yalipekanya umwa kupoosa ifisooso, e ico natulefibomfya.
7. Bushe abakalamba na bana kuti bacita shani pa kuti baipakishe ilyo balelya pa nshita ya kutuusha?
7 Inshita ya kulya pa kulongana ni nshita iyo abafyashi bengalanshanya na bana babo ifishinka pa fyo ukulongana kwaciba e lyo no kubatasha nga baciicindika pa kulongana. (Linganyeniko ifyaba mu citabo ca Inkaama ya Lupwa icipa 1, para. 2.) Kwena ilyo inshita ya kutuusha yafika, kuti twaya mu kwampana na bamunyinefwe pa kuti ‘tukoseleshanye,’ lelo tatufwile ukuleka abana ukulabutauka nangu ‘ukubalekelesha,’ ukulaangala nga bantu bali ku fiila.—Rom. 1:11, 12; Amapi. 29:15.
8, 9. (a)Kuti twacita shani pa kuti tube bakapekape nga filya calembwa pali 1 Timote 6:18? (b) Bushe nga ca kutila umo alefwaya ukwa kuyaikala pa kulongana cikaba shani?
8 Ukwafwa Bamunyinefwe na Bankashi: Umutumwa Paulo afundile Abena Kristu abali ne fyuma “ukucite cisuma, ukuba abakankaala mu milimo isuma, ukuba bakapekape, abaiteyanya ukupako bambi.” (1 Tim. 6:17, 18) Kuti twaba bakapekape nga fintu Paulo akoseleshe nga tuletontonkanya pa fyo twingaafwa abakote, abalwala, ababa mu mulimo wa nshita yonse, abafyashi abashimbe, nelyo bambi mu cilonganino abengakabila ubwafwilisho pa kuti bakasangwe ku kulongana. Ukuba kwena, abafwile ukwafwa aba bonse twalandapo ni balupwa lwabo bakapepa, lelo baeluda e lyo na bambi mu cilonganino kuti bamona abalekabila ubwafwilisho no kubaafwa ukulingana no kukabila kwabo.—Gal. 6:10; 1 Tim. 5:4.
9 Nga ca kutila umo mu cilonganino alefwaya ukwa kuyaikala pa kulongana, Komiti ya Mulimo pa Cilonganino kuti yamona nga ca kutila uyo kasabankanya nalinga ukupeelwa formu wa Kulomba Umuputule. Ilyo tamulatuma formu ku Dipartimenti ya Muputule, mufwile ukubelenga ifyebo fyaba pali formu.
10. Finshi tufwile ukukonka ilyo tulepekanya imyendele?
10 Ifilonganino fimo filafwaya motoka ya kulipila iya kubatwala ku cifulo ca kulonganinapo. Imyotoka shonse isho bakafwaya shifwile ukuba ishituntulu kabili shifwile no kukwata umusonko wa kulangilila ukutila shalisuminishiwa ukwenda pa musebo. Imyotoka tashifwile ukwisula ukucila mu cipimo. Munyinefwe uwakosoka kuti apeelwa umulimo wa bukapitao ilyo mulepekanya. Akulaeba ibumba ifyo amapekanyo yaleenda, no kubeeba inshita bakabasenda e lyo na po bakalaninina. Nga kwaima ubwafya pe bumba kuti mwalanda na kapitao pa kuti mwishibe ifya kucita. Nga ca kutila kwaima fimo ifilekabila uwa kubombelapo, ukupandako bambi mano, nelyo ukubombela pa bwafya fye bumbi, bamunyinefwe aba mucetekenya kuti babombelapo.
11. Finshi tufwile ukucita nga ca kutila tulekabila ukuyalonganina ku cifulo cimbi uko icilonganino cesu cishaebwa ukulonganina?
11 Ukusangwa ku Kulongana Kumbi: Tulemukoselesha ukuyalongana uko icilonganino cenu caebwa ukusangwa, pa kuti kwikaba ukubulisha apa kwikala, impapulo, amayanda umwa kusendama, na fimbipo. Lelo nga kuli fimo ifyalenga ukuti mufwaye ukuyalongana kumbi, kabili mulefwaya no mwa kusendama, kuti mwatuma formu ya kwipushishapo umwa kusendama ku balelolekesha pa kulongana mukasangwako. (Moneni umutande pe bula 5 apali inshiku sha kulongana kwa citungu muno Zambia.) Nga ca kuti mwi tauni mulelonganina muli ukulongana kubili no kucilapo, landeni ululimi ne nshiku sha kulongana mukasangwako.
12. Mulandu nshi ukulongana ukukabela ululimi lwa bacibulu ulwa fishibilo kukabela fye mu fifulo fyasalwa?
12 Ululimi lwa Bacibulu (Sign Language): Nga fintu mumwene mu mutande wa fifulo fya kulonganinapo icitungu muno Zambia, ululimi lwa kubomfya ifishibilo ulwa bacibulu lukaba fye MU FIFULO FIBILI EPELA, ku Lusaka ku CiNgeleshi na ku Ndola ku CiNgeleshi. Kumbi TAKWAKABE ulu lulimi nakalya. Ifi tuteyenye e fingabomba bwino, pantu aba kwilula abakabako bantu baishiba sana kabili kukaba abantu abengi pa kuti ukwampana kwa bwananyina kukabe ukwa kukoselesha. Baeluda e lyo na baishiba ukwilula ulu lulimi bafwile ukwishibisha bacibulu mu filonganino fyabo pa kuti beshibe ulwa uku kupekanya kabili bafwilisheni ukupekanya ukusangwa kuli kumo pali uku kulongana ukwa ulu ululimi lwa bacibulu. Baeluda bafwile no kwipusha bacibulu baba mu cilonganino cabo pa kuti beshibe nga balekabila ubwafwilisho.
13, 14. (a) Finshi bamunyinefwe batupekanishisha ilyo tatulaya ku kulongana? (b) Kuti twatasha shani pa milimo yonse iyo bamunyinefwe batubombela? (Belengeni AbaHebere 13:17.)
13 Konkeni Ukutantika: Ilyo twafika apa kulonganina tulamona ifyo bamunyinefwe babomba pa kutila icifulo cimoneke bwino. Bamunyinefwe abatutemwa ababomba bukapyunga balatuposha, balatupeela amaprogramu, kabili balatufwaila apa kwikala. Bamunyinefwe na bankashi balawamya icifulo no kulenga camoneka bwino. Kwaliba na imbi milimo iyacindama iyibombwa pamo ngo kupekanya amalyashi ayapusanapusana aya pa kulongana, ukupekanya umwa kwikala, no kubombe imilimo imbi iyashala.
14 Lyonse ilyo kuba ukulongana kwa citungu, abengi balabombesha imyeshi iingi ukupekanya ifilefwaikwa, kabili indupwa shabo na sho shilabasuminisha pa kutila babombele pali iyi milimo yacindama. Bushe tatutasha bamunyinefwe na bankashi abaipeelesha ukubomba pa kuti ifwe bonse tumwenemo? Tukalanga ukuti tulatasha nga twakonka ifi fyebo twafundwa ifili muli cino cipande no kufunda kumbi uko nalimo bengatupeela ilyo tushilaya ku kulongana kwa citungu. (Heb. 13:17) Ifwe bonse nga twabombela pamo mu kuitemenwa tukalenga ifintu fyonse ‘fikabombwe busaka busaka kabili mu kukonkana.’—1 Kor. 14:40.
15. (a) Mulandu nshi ukulongana kwa bantu ba kwa Yehova kwacindamina muno nshiku? (b) Cinshi umo umo afwile ukucita nomba?
15 Ukulongana kwalicindama, sana sana ilyo ‘tulemona ubushiku bulya bulepalama.’ (Heb. 10:25) Pa kulongana kwa citungu, umusha wa cishinka kabili uwashilimuka alatupeela ifyebo ifya kutwaafwa pa kuti ‘twangwe kucite fyebo fyonse’ ifyo Yehova alefwaya tulekonka. (Amala. 31:12) Tendekeni ili line ukupekanya pa kuti mukasangweko inshiku shonse shitatu ku Kulongana kwa Citungu ukuleti “Konkeni Kristu!” Ukusangwa mu kulongana kukalenga mukamwenemo mu kufunda kwa mu Baibolo no kuipakisha ukwampana na bamunyinefwe na bankashi!
[Akabokoshi pe bula 3]
Inshita sha Kulongana
Ubushiku bwa Kubalilapo no bwa Cibili
8:20 hrs.—16:15 hrs.
Ubwa Citatu
8:20 hrs.—15:35 hrs.