Ibungano lya Citungu Ilya Nte sha kwa Yehova Ilya mu 2004 Ilileti “Endeni na Lesa”
1 Cinshi cilenga amabungano yesu aya citungu aya cila mwaka ukuba ayaibela kuli imwe? Bushe malyashi ya kukuulilila ne cilangililo batupekanishisha ku “musha wa cishinka kabili uwashilimuka”? (Mat. 24:45-47) Bushe ni mpapulo shipya ishibamo ifilyo fya ku mupashi pa nshita yalinga? Bushe ni bamunyina na bankashi abashimika ifya kukumanya pa fyo Baibolo yawamya imikalile yabo? Bushe malipoti pa fyo umulimo wa kushimikila Ubufumu ule-enda bwino mu fyalo fimbi? Bushe kubishanya na basumina banenu aba mishinku yapusanapusana? Cine cine, iyi milandu ne milandu imbi ilenga tulefulukisha amabungano yesu!
2 Sangweniko Inshiku Shonse Shitatu: Yehova asosele ukupitila muli Mose ati: “Kuutanyeni abo bantu . . . ku kuleka bomfwe kabili ku kuleka basambilile.” (Amala. 31:12) Yehova napekanya programu waibela ukupitila mwi bumba lya musha wa cishinka kabili uwashilimuka ku kutusambilisha pa bushiku bumo na bumo ubwe bungano. Apo aletusambilisha ukuti ‘tucenjele,’ tulefwaya ukusangwa ku masambililo yonse. (Esa. 48:17) Nga mulefwaya ukulomba ulusa ku bene ba ncito, pepeni kuli Yehova, nga filya Nehemia acitile, no kuyalanda na bo. (Nehe. 1:11; 2:4) Kabili, cisuma ukwishibisha bwangu balupwa lwenu abashasumina ulwa mapange yenu aya kusangwa kwi bungano.
3 Ukwa Kwikala: Ilingi line bamunyinefwe balaipekanishisha abene ukwikala na balupwa lwabo nelyo ne fibusa mu misumba balelonganina. Mu ncende sha ku mishi, bamunyina balakuula imisakuta nelyo basendama mu fifulo fyapekanishiwa na babomfi ba kuitemenwa abe bungano. Mu mabungano yamo yamo abeshile kwi bungano bekala umulaala abana be sukulu. Nga ca kutila mulesungwa fye na bamunyinenwe nelyo balupwa, te cisuma ukubashukila no kutontonkanya ukutila limbi kuti bamusungako pa nshiku na shimbi isha kutuusha pa numa ye bungano. Iyi miputule ya pa nshita ye bungano fye epela. Abalesungwa e lyo na bana babo bafwile ukucindika abalebasunga no kukwata imisango isuma ku fipe fya mu ng’anda ya kwa shibweni kabili tabafwile ukonaula icili conse nelyo ukukonkola mu fipe fya bene ng’anda nelyo ukwingila mu miputule nelyo ififulo fishingilako bambi icingileingile. Nga ca kutila abene mayanda bakwata amafya ya musango uyu, balingile ukwishibisha Dipartimenti wa Miputule pe bungano bwangu bwangu, kabili bamunyina kuti babombelapo.
4 Ukukabila Kwaibela: Umutumwa Paulo acinkwileko ifilonganino fya ku Galatia ‘ukubombe cisuma kuli bonse, lelo maka maka ku ba bwananyina mu citetekelo.’ (Gal. 6:10) Bamunyina na bankashi abakoloci, abanakuka, abafyashi abashimbe, abashakwata pa kuuma ukuboko nelyo aba mu mulimo wa nshita yonse napamo te kuti bamulombe ubwafwilisho. Lelo napamo kuti nabakwata amafya pa kusangwa kwi bungano. Bushe kuti ‘mwabombe cisuma’ kuli bene no kuitemenwa ukubafwilishako? Balupwa lwabo Abena Kristu pamo na baeluda e balingile ukwangwako sana ku kukabila kwa ba musango yo.
5 Nga ca kutila kasabankanya aleta Formu wa Kwipushishapo Umuputule, Komiti wa Mulimo pa Cilonganino alingile ukupitulukamo, ukubomfya ifya kupitulukilamo ifyaba pali formu. Bafwile ukumona nga kuti babombelapo abene pali uko kwipusha. Uku kupekanya, kwa bakasabankanya aba misango isuma, na bana babo abaicindika epela. Nga ca kuti Dipartimenti wa Miputule ali na mepusho ayali yonse pa lwa umo uwalomba ukwa kwikala, bakepusha kalemba wa pa cilonganino.
6 Ukusangwa kwi Bungano Limbi: Limbi pa mulandu ne fya kuponako fimo fimo te kuti musangwe kwi bungano uko mulingile ukusangwa pamo ne cilonganino cenu. Nga mulefwaya ifyebo pa lwa fifulo fimbi ifya mabungano moneni umutande uli pe bula 5 pa kutila mwishibe inshiku kukaba amabungano uno mwaka mu Zambia. Tumeni formu wa Kulombelapo Umuputule ku cifulo mulefwaya ukuyalongana. Nga ca kutila kukaba amabungano yabili no kucilapo mu musumba, shininkisheni ukulangilila inshiku no lulimi lwe bungano mulefwaya ukusangwako.
7 Ukucingilila Amasanso: Ukuteyanya kwa kwa Yehova kulatucinkulako pa nshita yalinga ukukuma ku mabungano. Ca bulanda ukutila pa mabungano yamo yamo mu myaka yapita, abasangilweko bamo balipililwe ifipe ku mulilo wa kuiletelela fye. Amasanso ya pa musebo na yo yalipeye abantu. Bakangalila pa mabungano na bafyashi, bale-ebwa ukusakamana sana iyi milandu yacindama pa kuti amabungano yesu yakabe aya kukuulilila kabili aya cisansamushi, ukwabula ukuloosha no bulanda pa mulandu wa mulekelesha umutumbuka amasanso.
8 Kwena icaishibikwa bwino sana ukuti e cilenga kube umulilo te kwipika fye ifya kulya mupepi ne misakuta, lelo bana bangalila ku mulilo nelyo ukwipika ukwabula ukubasopa. E ico pa kuti muicingilile mwe bene na bamunyinenwe ku masanso, mwileka abana ukulayendela ukwabula wa kubasopa; mwipeela abana umulimo wa kubilausha menshi pa mulilo, nelyo fye ukubeba ukwipika. Limbi kuti balepika fye bwino ku ng’anda, lelo pa cifulo ce bungano te cimo na ku ng’anda kabili mufwile ukwangwako nga nshi pa kuti mucilikile amasanso. Abantu abengi bekala pamo, kabili abana balatemwa amangalo nga bali na bana banabo. Balapumfyanishiwa bwangu kabili tabamwena libela ubwafya, na pali ici tatufwile ukulabapeela kandulo, macisa nelyo amalampi. Ubwafya na bumbi bubako ilyo abafyashi baya ku kulongana mu nshita ya kasuba no kusha abana beka ku musakuta ukwabula uwa kubasopa. Abana bafwile ukupatikishiwa ukwikala pa bafyashi babo pa nshita ya programu. Nga ca kutila bakapyunga bamona abana baleendauka pe bungano ukwabula wa kubasopa, balingile ukweba abana ukuya ku bafyashi babo. Mwe bafyashi, mukwai bombeleni pamo na babomfi ba pe bungano na muli iyi nshila mukalanga ukutila ‘mwalitemwa aba bwananyina bonse.’—1 Pet. 2:17.
9 Ifilonganino fimo filalipila aba fimbayambaya ukubatwala ku mabungano. Motoka yonse iilebomfiwa ukutwala abantu kwi bungano ilingile ukuba iituntulu sana iyasuminishiwa no kwenda pa musebo. Lyonse imyotoka tashifwile ukwisula ukucila pa cipimo. Tuletubulula ukutila munyina wakosoka apeelwe umulimo wa bukapitao pa kupekanya ifi. Alingile ukulaeba ibumba lyonse ulwa po amapekanyo yafika, ulwa nshita ya kwima no ko ibumba likalasendelwa pa kuya kwi bungano. Nga kuli ubwafya ubuli bonse ubukumine ibumba ebeni kapitao kabili akalanda ifya kucita. Nga kwaima icilekabila ukwafwa, ukupanda amano, nelyo ukubombela pa bwafya bumo, bamunyina bakampuka na baeluda bakabombelapo.
10 Pe bungano lya bantu ba kwa Yehova ilyaliko imyaka 2,500 iyapita, Esra na bena Lebi banankwe babelengele Icebo ca kwa Lesa no kucilondolola ku balongene. Cinshi catumbwikemo? Nehemia 8:12 itila “abantu bonse baile ku . . . kucito kwanga kukalamba, pantu bailwike ifyo bashimikilwe.” Bushe tatutasha pa kuti ibumba lya musha wa cishinka, ukupala Esra na bena Lebi, libomfya Icebo ca kwa Lesa, ukucilondolola, no kutulanga ifya kucibomfya mu bumi bwesu? Pa kucite fyo, ulya musha alalanga ukutemwa kwa cine nga kulya ukwa kwa Yehova pamo no kwangwa uko angwa abantu Bakwe bonse. Shi pampamineni pa kukanapuswa kwi Bungano lya Citungu ilya ‘Endeni na Lesa’!
ICISHIBISHO: Kalemba wa pa cilonganino e ukangalila fyonse ifikumine ibungano lya citungu no kulenga bonse ukucincimuka. Nga ca kutila kalemba talipo, eluda umbi uwafikapo alingile ukubomba iyi milimo. Kalemba alingile ukubombelapo bwangu pa butungulushi bulefuma ku beminishi be bungano pa lwa miputule ya kwikalamo, umulimo wa kuitemenwa, umulimo wa pa ntanshi na pa numa ye bungano. Afwile ukupeelwa inshita ikalamba pa kulongana pa kutila abelenge no kulondolola bakalata bonse abalelanda pa mabungano (te kusupula fye IYO). Baeluda bonse, maka maka kalemba, balingile ukwishiba bwino amapekanyo ye bungano mu fyaba mu Ubutumikishi Bwesu Ubwa Bufumu.
[Akabokoshi pe bula 3]
Inshita sha Programu
Pa Bushiku bwa Kubalilapo no Bushiku bwa Cibili
8:45 hrs. – 16:10 hrs.
Ubushiku bwa Citatu
8:45 hrs. – 15:05 hrs.