Ibungano lya Citungu Ilya Nte sha kwa Yehova Ilya mu 2003 Ilileti “Peeleni Lesa Ubukata”
1 Ukupitila muli kasesema wakwe uwa busumino Esaya, Yehova atile: “Peepekeni kuli ine, mwe bantu bandi, mwe luko lwandi, kutikeni kuli ine.” (Esa. 51:4) Muli ino nshita ya ku mpela iileya ilebipilako, bushe tatulesumina ukuti ukupeepeka ku mafunde ya kwa Yehova kwalicindama nga nshi ukucila kale? Inshila imo ‘tukutikilamo’ kuli Yehova ni mu kuumfwila ifunde lyakwe ilya kulongana ku kupepa. Fintu tufwaisha ukwisaba ne shuko lyaibela ilyo amabungano yesu aya citungu aya pa mwaka yakatupeela! Ibumba Litungulula ilya Nte sha kwa Yehova na kabili nalitantika ukuti amabungano ya fitungu ayengi yakacitwe muno Zambia mu 2003.
2 Nga fintu cabilishiwe mu Ulupungu lwa kwa Kalinda ulwa July 1, 2002, amabungano ya pa kati nko na yo yakaba mu fyalo fyasalwa. Apo ifyalo fye ifinono e mukabela amabungano ya pa kati ka nko, abakasalwa e bakasangwako. Finshi twingacita pa kumwenamo sana mu mapekanyo yalepangwa pali nomba pa lwa mabungano ya uno mwaka?
3 Sangweniko Inshiku Shonse: Pa kuti tukamwenemo sana mu kufunda kupekanishiwa ne bumba lya musha wa cishinka kabili uwashilimuka, tulefwaya ukushininkisha ukuti twasangwako kuli programu onse. (Mat. 24:45) Bushe mulekabila ukulomba cuti ku bene ba ncito pa kuti mukasangwe kwi bungano pa nshiku shonse? Pa ntanshi Nehemia talalomba ulusa ku Imfumu Artakishashete ukumusuminisha ukuya ku Yerusalemu ku kukuula cipya cipya ifibumba, ‘apepele kuli Lesa wa mu muulu.’ (Nehe. 2:4) Na imwe mufwile ukupepa kuli Yehova ukuti amukoshe ukulomba cuti ku bene ba ncito pa kuti mukasangwe kwi bungano pa nshiku shonse shitatu. Ni shani nga ca kuti umwine wa ncito aleshimunuka ukumupeela cuti? Nakalimo ukulondolola ukuti ukufunda tupokelela pa mabungano yesu e kutwafwa ukuba ababomfi ba bufumacumi, ababombesha kabili abacetekelwa kuti kwalenga bamusuminisha. Na kabili, nga twaba na ba mu lupwa abashasumina, kuti caba bwino ukubacinkulako bwangu bwangu ulwa mapekanyo yesu aya kusangwa ku kulongana kwa citungu.
4 Ukupekanya Umwa Kwikala: Ilingi line bamunyina balapekanya ukwikala na balupwa nelyo ifibusa mupepi no kubelele ibungano. Mu mishi, bamunyina balakuula imisakuta nelyo ukusendama mu fiyanda ifyo bakabomba ba kwi bungano bateyanya. Amabungano yamo yashima ifikuulwa fya pa masukulu ku kwikalamo abeshile. Nga muleikala kuli bamunyina nelyo balupwa, tacalinga ukulya umundemwa no kwenekela ukwikalako inshiku na shimbi pa kuti mutuusheko pa numa ye bungano. Iyi miputule ya kwikalamo fye pa nshita ye bungano epela. Abalesungwa balingile ukushininkisho kuti bena na bana babo bacindika ing’anda ya kwa shibweni no kukanaonaula nangu cimo nelyo ukusakawila mu fipe nelyo ukwingila uko bashilingile ukwingila. Nga kwaba ubwafya pa lwa ici, bashibweni balingile ukweba Dipartimenti wa Mayanda pe bungano, kabili bamunyinefwe bakaitemenwa ukwafwa.
5 Ukusakamana Abali no Kukabila Kwaibela: Bushe mu cilonganino cenu mwaliba bamo nalimo abengakabila ukubafwa pa kusangwa kwi bungano? Ukukabila kwaibela ukwa bakoloci, abanakuka lwa ku mubili, nelyo ababa mu mulimo wa nshita yonse kusakamanwa sana sana ku ndupwa shabo Abena Kristu, lelo baeluda na bambi abaishiba pa lwa abo abali mu kukabila nabo mu kutemwa kuti bayafwilishako mu kupanga amapekanyo.
6 Komiti wa Mulimo uwa Cilonganino akapituluka mu Kulomba kwa Muputule konse ukukepusha bakasabankanya. Ukubomfya ifyebo fyaba pali formu, komiti wa mulimo afwile ukupima nampo nga abalelomba balekabila ukwafwa kwaibela uko bambi abaliko mupepi teti basakamane. Ici cicitilwa fye bakasabankanya abashimikwa bwino, ukusanshako abana babo abomfwa. Dipartimenti wa Mayanda akalanshanya na kalemba wa cilonganino nga ca kuti nakwata ifipusho ifili fyonse ifikumine ukulomba kwaibela ukwa balekabila.
7 Ukusangwa kwi Bungano Limbi: Nga ca kuti kuli ifyalenga ukuti mukasangwe kwi bungano limbi ukucila ilyo mwaebwa ukusangwako kabili mulekabila umwa kwikala, mukwai moneni kalemba wa pa cilonganino pa mwenu. Kuti amupeela formu wa Kulomba Umuputule. Tumeni formu wenu kwi ofeshi lye Bungano ilyo mulepanga ukuyako. Nga ca kuti mu musumba mulepanga ukuyako mulaba amabungano na yambi, shininkisheni ukuti pali formu namulembapo inshiku no lulimi lwe bungano mulefwaya ukusangwako.
8 Ukucilikila Amasanso: Ukuteyanya kwa kwa Yehova kulatucinkulako bwino pa nshita yalinga pa lwa mabungano. Ku ca bulanda, mu mabungano yamo yamo mu myaka yapita, ifipe fya bamo fyalipiile ku mulilo wayambwike ku mulandu wa mulekelesha. Amasanso ya pa musebo na yo yaipeye abantu bamo. Bamunyina bashingamwa pa mabungano na bafyashi, balelombwa ukusakamana sana ifi fishinka fyakatama pa kuti amabungano yesu yakabe aya kukuulilila no kubishanya kusuma, kabili pa kuti kwikaba ubulanda pa mulandu wa masanso yafuma mu mulekelesha.
9 Ukwabula no kutwishika, icilenga sana umulilo pa mabungano te kwipikila mupepi ne misakuta, lelo bana abangasha umulilo nelyo abo bashiila ukwipika. E co, pa kusengauka ubusanso bwingamuponena na bamunyinenwe, mwileka abana benu balelulumba beka; mwishiila abana amenshi yalebilauka, nelyo ukubashiila ukwipika. Napamo balabomba bwino ifi ku ng’anda, lelo icifulo ce bungano capusanako kabili ukusakamana kwalundwako kulafwaikwa ku kusengauka amasanso. Kuno kwena abantu bekala capamo, kabili abana balitemwa ukwangala nga bali na bana banabo. Balalafiwa bwangu no kukanamona ubusanso, kanshi tatufwile ukubashiila kandulo, macisa nelyo amalampi. Ubwafya bumbi bwisa ilyo abafyashi baya ku kulongana no kusha abana beka ku misakuta. Abana balingile ukwikala na bafyashi ilyo amalyashi yalelandwa. Ilyo bakapyunga bamona abana balelulumba beka pe bungano, balingile ukubabwekesha ku bafyashi. Mwe bafyashi, twapaapaata ikataneni na bakabomba ba pe bungano, nga mwacita ifyo mukalangisha ‘ukutemwa aba bwananyina bonse.’—1 Pet. 2:17.
10 Ifilonganino fimo filaashima bamotoka ku kubatwala ku fifulo fye bungano. Bamotoka bonse abo mulebomfya ukusendelamo abaleya kwi bungano balingile ukuba bwino, abalinga ukwenda pa musebo. Tabalingile ukwisula sana iyo. Tuletubulula ukuti munyina wakosoka alingile ukuba kapitao uwa kwangalila imyendele. E wakulaishibisha ibumba pa lwa aya mapekanyo, no kubeshibisha inshita bakulaima no ko bakulaimina. Nga kwabako amafya, kapitao alingile ukwishibishiwa pa kuti amwebe ifya kucita. Nga bamo bakabila ukubafwilisha, ukubafunda, nelyo ukubombela pa bwafya bumo, bamunyina bakosoka kabili abashilimuka bali no kucite co.
11 Tuli ca Kutamba: Bushe abantu balamona ubupusano pa Nte sha kwa Yehova na baba muli cino calo? Ee! Umfweni ifyo abashili Inte sha kwa Yehova balandapo: “Lyonse tubomba na besa ku kukumana kwabo, lelo imwe mwalikatana sana kabili mubombela pamo.” “Umulungu wapwile twakwete ibumba limbi ilya mipepele. Twalimwene ubupusano sana pali imwe na bene.” “Twalishiba ukuti lyonse kuti twashintilila pa kwafwa kwenu no kubombela pamo.” Bushe ukulandapo kwa musango yo takutwafwa ukwiluka ifyo “amano ayafuma mu muulu” yanonsha ubuntu bwesu? (Yako. 3:17) Apo twaba “ica kutamba ku ba pano calo,” shi imyendele yesu inshita yonse nailelanga umucinshi no bukata bwa kwa Lesa wesu, Yehova.—1 Kor. 4:9.
12 Apo “imibele ya pano calo ileyaluka,” tulekabila amabungano yesu aya citungu ukutwafwa ukutwalilila ukulola lwa ku mupashi. (1 Kor. 7:31) Pa kuti mupekanye ukusangwako pa nshiku shonse kano mwabombesha, lelo tamwakalengwe nsoni. Ibungano lya Citungu ilya uno mwaka ilileti “Peeleni Lesa Ubukata” lipekanishiwe ku kutwafwa ukutwalilila abashangila ilyo tulepembelela ukupingula kwa kwa Yehova pa calo ca kwa Satana. Shi twisuminisha nangu cimo ukutucilikila ukupokelela ukufunda Yehova atupekanishishe.—Esa. 51:4, 5.
ICISHIBISHO: Kalemba wa cila cilonganino akalolekesha pali fyonse ifikumine kwi bungano lya citungu no kucincimusha bambi pa lwa lyene. Nga kalemba talipo, eluda umbi uwafikapo afwile ukubomba iyi milimo. Kalemba afwile ukubombelapo bwangu bwangu pali fyonse ififwile ukucitwa ifyo iofeshi lye bungano lyalemba muli bakalata ukukuma ku fintu pamo nga umwa kwikala, umulimo wa kuitemenwa ne ncito iibako ilyo ibungano lishilatendeka na lintu lyapwa. Inshita iikalamba ifwile ukupeelwa pa kulongana iya kuti bakalata be bungano bengabelengwa bonse kabili no kubalondolola (te kulanda fye mu mashiwi yakwe IYO). Baeluda bonse, maka maka kalemba, bafwile ukwishiba bwino imipekanishishe ye bungano iyasabankanishiwa muli bakalata na mu Ubutumikishi Bwesu Ubwa Bufumu.
[Akabokoshi pe bula 3]
Inshita sha Kulongana
Ubushiku bwa Kubalilapo no Bushiku bwa Cibili
8:45 hrs. - 16:00 hrs.
Ubushiku bwa Citatu
8:45 hrs. - 15:25 hrs.