Ukulongana kwa Citungu Ukwa Nte sha kwa Yehova Ukwa mu 2006 Ukuleti “Ukulubuka Nakupalama”
1. Bushe abantu ba kwa Lesa aba ku kale balelanga shani ukuti balicindamike ukupepa kwa cine, kabili lishuko nshi ilyapalako na ifwe tukwete pali lelo?
1 Imfumu Hisekia iya baYuda ba ku kale yabomfeshe inkombe ukutwala bakalata ba kwitilapo abantu ku kulongana ku Yerusalemu. (2 Imila. 30:6, 13) Ifyo abantu bacitile ilyo baitilwe fyalangile ifyo balemona ukupepa kwa cine. (2 Imila. 30:10-12) Nomba line fye, ababomfi ba kwa Yehova na bo bakaba ne shuko lya kulango kuti balatasha nga nshi pe shuko lya kulongana pamo ku kupepa Yehova. Kalata uwa kumwita ku Kulongana kwa Citungu ukuleti “Ukulubuka Nakupalama,” nafika pa cilonganino cenu. Bushe ifi mwamupokelela mwalacita shani?
2. Finshi tufwile ukutendeka ukucita pa kuti tukamwenemo sana mu kulongana?
2 Nomba E Nshita ya Kuipekanya: Nga tulefwaya ukumwenamo sana muli programu wa ku mupashi uo baletupekanishisha, tufwile ukusangwako inshiku shonse. Tendekeni nomba ukuipekanya ukusangwa ku kulongana inshiku shonse shitatu no lupwa lwenu lonse. (Amapi. 21:5) Fimo ifyo mwingacita pa kuipekanya, kupoko luusa ku ncito, ukulanshanya na bena mwenu nga te baNte, ukufwaya ukwa kusendama, no kwafwa abasambi ba Baibolo ukusangwako inshiku shonse. Te kwesha ukutendeka ukuipekanya cilye nshita yapwa. Kabili ilyo muleipekanya mulepepelapo kuli Yehova no kumucetekela ukuti “akacita.”—Amalu. 37:5.
3. Cinshi cacitwa pa kwangushako ifintu pa kulongana kukalamba?
3 Pa kwangushako ifintu pa kulongana kukalamba, iofesi lya musambo lyalipusha abantu mu filonganino ukuti balande uko bengatemwa ukulonganina icitungu, no muputule no kulongana kumbi ukukalamba. Pa kulongana kwa mulimo, bakasabankanya bonse ababatishiwa balimishe amaboko ukusala uko bengatemwa ukulalonganina.—Ukufu. 19:8.
4. Kuti twakoselesha shani bamunyinefwe?
4 Cinshi bambi bashisangilwa kuli uku kulongana kwacindama ifi? Limo icilenga ni ndalama ne ncito. Lelo nga ca kutila lupwa nalwala nelyo nafwa, balenda amakilomita ayengi sana pa kuti bayemona uyo lupwa nelyo bafike ku cililo. Tababa pa ng’anda pa mwabo pa milungu iingi fye. Bamo “abapuswa” ku kulongana kwa cilonganino, balapanya ne fya ku mupashi ifisuma ifyo Yehova atupeela cila mwaka pa kulongana kukalamba. Icifwaikwa kuipeelesha no kupekanya bwino. Ibumba Litungulula lilatasha pa kuipeelesha kwa bantu bonse abaya mu kusangwa ku kulongana kukalamba. Bakasabankanya ababa nga filya Davidi ali balakoselesha bambi.—Amalu. 122:1.
5. Nangu ca kutila tacanguka kuli bamunyina abengi ukusangwa ku kulongana kwa bantu ba kwa Yehova, cinshi bashitontonkanyapo ukucita?
5 Tacanguka kuli bamunyinefwe abengi ukusangwa ku kulongana kukalamba. Lelo balishiba ukutila ukulongana kwa bantu ba kwa Yehova kulabakosha. Bamo balenda intamfu iikalamba pa kuti fye bafike ku kulongana, lelo tabafwaya na kupuswa ku kulongana. Kangalila wa citungu atile munyina umo no mukashi wakwe na bana babili abaice balyendele ukucila amakilomita 70 ukuya mu kulongana ku citungu ca North Western. Baendele inshiku shitatu. Bamunyina na bankashi bambi baendele bakilomita 300, mupepi no mulungu umo. Bamo balenda amakilomita ayengi e lyo kabili baenda pa maawala na yambi mu bwato pa fimana na mu nika pa kuti fye basangwe ku kulongana kwa citungu. Bamunyina aba bonse na bankashi balaipakisha ukusangwa ku kulongana. Pa numa ya kulongana balenda filya fine baishile. Kabili babwelelamo ku mwabo ninshi bali ne nsansa kabili balaba abakosa lwa ku mupashi. E fyo imyendele ya bengi yaba pa myaka iingi!
6, 7. Kuti twayafwa shani abalekabila imyendele nelyo umwa kusendama?
6 Ukukabila Kwaibela: Pa Amapinda 3:27 patila: “Witana busuma ku munobe, ilyo cili mu maka ya kuboko kobe ukubucita.” Kuti mwacita shani ubusuma kuli bambi pa kulongana kukalamba? Bakasabankanya abakalamba sana, balya abalwalilila, na baba mu mulimo wa nshita yonse, na bambi fye kuti bakabila ukubafwilishako imyendele no mwa kusendama. Balupwa e bafwile ukusakamana aba bonse twalandapo nga balekabila fimo. (1 Tim. 5:4) Nga te kuti bakumanishe ukucite fyo, abasumina banabo kuti babafwa. (Gal. 6:10) Bakangalila ba masambililo ya fitabo bafwile ukumona nga ca kutila pe sambililo lya citabo pali abalekabila ifi fintu pa kuti fyonse fyapekanishiwa bwino ilyo ukulongana takulafika.
7 Amaformu ya kwipushishapo umwa kusendama e ko yali. Abengapokako fye ni bakasabankanya abo cafishe kuli ba lupwa lwabo ne cilonganino ukubapekanishisha umwa kusendama. Komiti wa Mulimo uwa Cilonganino afwile ukumona nga ca kutila kasabankanya nalinga, nge fyo ifyebo fyaba pali formu filangilila. Abo bengepushisha umwa kusendama ni balya fye abakosa mu kupepa pamo na bana babo abakwata imisango isuma.
8. (a) Cinshi tufwile ukusangilwa ku kulongana kwa citungu ku cifulo uko twaebwa ukuya? (b) Finshi mufwile ukucita nga ca kutila mukalonganina ku cifulo cimbi?
8 Ukusangwa ku Kulongana Kumbi: Tulemukoselesha ukuyalongana uko icilonganino cenu caebwa ukusangwa, pa kuti kwikaba ukubulisha apa kwikala, impapulo, amayanda umwa kusendama, na fimbipo. Lelo nga kuli fimo ifyalenga ukuti mulongane kumbi, kabili mulefwaya no mwa kusendama, kuti mwatuma formu ya kwipushishapo umwa kusendama ku balelolekesha pa kulongana mukasangwako. (Moneni umutande pe bula 5 uulelanda pa kulongana kwa citungu muno Zambia uko batantike ukulingana ne nshiku sha kulongana.) Nga ca kuti mwi tauni mulelonganina muli ukulongana kubili no kucilapo, landeni ululimi ne nshiku sha kulongana mukasangwako.
9. Cinshi kukabela fye ififulo fibili uko ifyebo fikapilibulwa mu lulimi lwa bacibulu?
9 Ululimi lwa Bacibulu: Nge fyo mukamona pa mukululo apali inshiku sha kulongana e lyo ne fifulo muno Zambia, kukaba ukupilibula mu lulimi lwa bacibulu pa kulongana kukaba mu ciNgeleshi pa fifulo FIBILI FYE, ku Kitwe (Chamboli) na ku Lusaka (EC-03). TAKWAKABE ukulongana kumbi apo bakabomfya ululimi lwa bacibulu. Ici cikalenga ifyebo ukupilibulwa bwino mu lulimi lwa bacibulu no kuti bacibulu abakalongana pa cifulo cimo bakafule pa kuti ukubishanya kukawame kabili bakakoseleshanye na banabo. Baeluda na bapilibula ifyebo mu lulimi lwa bacibulu bafwile ukweba bacibulu mu cilonganino cabo pali aya mapekanyo no kubafwa ukupekanya pa kuti bakasangwe ku cifulo ukukaba ululimi lwabo. Baeluda bafwile ukumona nga ca kutila kuli bacibulu mu cilonganino abalekabila ubwafwilisho.
10-12. Kuti twacilikila shani amasanso, kabili finshi tufwile ukwibukisha?
10 Ukucilikila Amasanso: Ukuteyanya kwa kwa Yehova lyonse kulatucinkulako fimo pa kulongana kukalamba. Ca bulanda ukutila pa kulongana kumo kumo mu myaka yapita, bamo abaile mu kulongana balipililwe ifipe ifishali na kupya ababikako amano. Bambi na bo balifwile mu masanso ya bamotoka. Bamunyina baleangalila ukulongana e lyo na bafyashi, bafwile ukubika sana amano kuli fi fintu fyacindama pa kuti ukulongana kwesu kukakoshe abantu no kulenga bakaipakishe ukwampana na basumina banabo, te kuleta imisowa no bulanda pa mulandu wa kucita ifintu ifileta amasanso.
11 Kwena icilenga sana umulilo pa kulongana kukalamba te kwipika ifya kulya mupepi no mwa kusendama, lelo bana abo balekelesha baleangala no mulilo nelyo abo basha ukuti balemona ifili pa mulilo. Kanshi pa kuti amasanso yemuponena no kuponena bamunyinenwe, mwileka abana baleendauka beka fye; te kwesha ukushiila abana ukuti balemona amenshi ayali pa mulilo, nelyo ukubashiila ukuti balesakamana umulilo. Nakalimo ku ng’anda balabomba bwino bwino iyi milimo, lelo ku kulongana kwapusana na ku ng’anda, kanshi tufwile ukupoosa sana amano ku fyo tulecita pa kuti tatuletele amasanso. Abengi bekala mupepi sana na bambi, kabili abana balatemwa ukwangala nga bali na bana banabo. Ilingi line abana balabika sana amano ku kwangala ica kuti bafilwa no kumona ubwafya. Kanshi tatufwile ukubapeela bakandulo, macisa, nelyo tukoloboi na malampi. Ubwafya bumbi bubapo nga ca kutila abafyashi baya ku kulongana inshita ya kasuba no kusha abana beka uko basendama. Abana bafwile ukwikala pamo na bafyashi babo ilyo amalyashi yalelandwa. Nga ca kutila bakapyunga bamona abana baleendauka beka pa kulongana, kuti baeba abana ukubwelela ku bafyashi babo. Mwe bafyashi, shi umfwileni abaleangalila ukulongana. Nga mwacite fi, mukalanga ukuti ‘mwalitemwa aba bwananyina bonse.’—1 Pet. 2:17.
12 Ifilonganino fimo filafwaya bamotoka ba kutwala abantu ku kulongana. Motoka yonse fye iyo mwafwaya ukuya na yo ifwile ukuba iituntulu sana. Bamotoka tabafwile ukusenda abantu abengi ukucila pa bo basenda. Tulemukoselesha ukusala munyina wakosoka ukulolekesha pa mapekanyo. Akeba ibumba ifyo ukupekanya kuli, uko abantu bakabasendela na kuntu bakabekishisha. Nga kwaima ubwafya ubuli bonse pe bumba, bafwile ukweba uuleangalila ibumba pantu e ukeshiba ifya kucita. Nga ca kutila bamo balekabila ukwafwilishiwa, ukufundwa, nelyo cakabilwa ukubombela pa bwafya bumo, bamunyinefwe abeshibe ifilecitika bakacite co.
13. Cinshi cimbi twingacita pa kuti twafwe bambi ukuba ne nsansa pa kulongana kuleisa?
13 Ababomfi ba Kuitemenwa: Te kuti tutwishike no kutwishika ukuti bonse abasangwa ku kulongana balaba ne nsansa kabili balamwenamo mu ca kulya ca ku mupashi e lyo no kubishanya kusuma ukuba kulya. Insansa shesu shikafulila nako nga twaitemenwa ukubombako umulimo ulenga ukuti ukulongana kwende bwino. (Imil. 20:35) Komiti ya Kulongana kwa Citungu nomba line ikafwaya abengatemwa ukubombako uyu mulimo. Bushe mukabombako?—Amalu. 110:3.
14. Finshi mutemwako sana ku kulongana kwa citungu ukubako pa mwaka, kabili cinshi mufwile ukubombesha ukucita?
14 Ilyo umwaice wa myaka isano asangilwe ku kulongana kwa citungu atile: “Ukulongana kwa citungu e nshila imo iya kupepelamo Yehova iyo natemwa sana.” Aya mashiwi yalandilwe ukufuma pa nshi ya mutima yalelenga ifwe bonse ukutontonkanya pa fyo tusangalala sana nga twasangwa ku kulongana kwa citungu ukubako cila mwaka. Caba fye nga filya kemba wa malumbo umo aimbile ukuti: “Ubushiku bumo mu mansa shenu bwawama ukucile nshiku ikana limo pa nse.” (Amalu. 84:10) Davidi aimbile mu lwimbo ukuti alefwaisha ‘ukwikala mu ng’anda ya kwa Yehova inshiku shonse isha mweo wakwe [no kulolesha kucankwa kucankwa, NW] pe tempele lya kwa Yehova.’ (Amalu. 27:4) Ukuba pamo na bakapepa ba kwa Yehova e calesekesha sana umutima wa kwa Davidi. Na ifwe nga twasangwako inshiku shonse shitatu ku Kulongana kwa Citungu ukuleti “Ukulubuka Nakupalama,” ninshi tulepashanya Davidi mu fyo acindamike ukupepa kwa cine.
[Akabokoshi pe bula 31]
Inshita sha Kulongana
Ubushiku bwa kubalilapo no bwa Cibili
8:45 hrs. - 16:05 hrs.
Ubwa Citatu
8:45 hrs. - 15:10 hrs.