Ukushimikila ku Myendele Isuma
1 Muli buno bwikashi bwa lelo ubwa mulekelesha, abacaice abengi bonaula ubumi bwabo ku miti ikola, bucisenene, bucipondoka, no lukaakala. Mu kupusanako, imyendele isuma iya bacaice mu cilonganino ca Bwina Kristu ilapembesula ukumona kabili cine cine cintu cisuma kuli Yehova. Yaba kushimikila kwa maka ukwingaleta bambi ku cine.—1 Pet. 2:12.
2 Ifya kukumanya ifingi filangilila ukuti imyendele isuma iya Bena Kristu bacaice yalilenga abamonako ukufwaya ukwishiba icine. Ukulanda pa Nte yacaice iyo alesambilisha, kafundisha aebele ikalasi lyonse ukuti Lesa wa uyu mukashana, Yehova, e Lesa wa cine. Asosele ifi pa mulandu wa kuti lyonse imyendele ya mukashana yalibamo umucinshi. Kafundisha na umbi alembeele Sosaite ukuti: “Ndemutasha pa bacaice basuma mwakwata ku calici ku mwenu. . . . Abacaice benu cine cine baba ca kumwenako. Balacindika abakalamba, ukulangulukilako bambi, no kufwala ifya mucinshi. Kabili balishiba Baibolo bwino nga nshi! E fyo imipepele ilingile ukuba!”
3 Kafundisha na umbi alisansamushiwe ku myendele isuma iya Nte yali ne myaka 7 mu kalasi yakwe. Alicebushiwe ku mibele ya kwa kalume iyawama, iyamulengele ukupusana sana kuli bakalume bambi. Alisansamushiwe ku fyo apoosele amano ku fisumino fyakwe ifya mipepele—taleumfwe nsoni ukupusanako pa mulandu wa fyo asuminemo. Amwene ukuti kampingu wakwe alikanshiwe kabili ali na maka ya ‘kupaatululo busuma ukubulekanya no bubi.’ (Heb. 5:14) Nyina wa kwa kalume asukile atandalila kafundisha, kabili isambililo lya Baibolo lyalitendeke. Pa numa, kafundisha alibatishiwe kabili ku ntanshi asangwike painiya wa nshita yonse!
4 Umulumendo umo asongelwe ku myendele isuma iya kwa Nte pa sukulu aali. Ali uwapusanininako fye—uwa mucinshi nga nshi, uwapoosa amano ku kubelenga, kabili lyonse alefwala ifya mucinshi; na kabili, alipusene na bakashana bambi, talesenga abalumendo. Alimwene ukuti alekonka ifishinte fya Baibolo. Uyu mulumendo amwipwishe ifipusho pa lwa fisumino fyakwe ifya mipepele kabili alisansamushiwe ku fyo asambilile. Atendeke ukusambilila, mu kwangufyanya alibatishiwe, kabili asukile abombako bupainiya no mulimo wa pa Bethel.
5 Nga ca kuti uli Mwina Kristu wacaice uufwaya ukushimikila bwino kuli bambi, ulesakamana imyendele yobe mu nshila shonse. Winenuka ukupitila mu kukonkelela imibele ya calo iya mulekelesha, imimwene, ne mikalile. Wimike ica kumwenako cisuma mu milandile, imifwalile, no kupempenkana, te lintu fye uli mu butumikishi bwa mwi bala na ku kulongana lelo na lintu uli pa sukulu na lintu ulekokoloka. (1 Tim. 4:12) Ukaba no buseko lintu umo afwaya ukwishibe cine pa mulandu wa kuti walilenga ‘ulubuuto lobe ukubalika’ ukupitila mu myendele yobe isuma.—Mat. 5:16.