Abaice Abalebalika Nge Fyengelo
1. Bushe Baibolo ilanga shani ukuti Abena Kristu baleshibikwa bwino bwino, kabili cinshi cilanga ukuti e fyo ciba ku bacaice Abena Kristu muno nshiku?
1 Yesu aebele abasambi bakwe ati: “Muli lubuuto lwa pano calo.” (Mat. 5:14, 16) Nga filya umusumba wakuulilwa pa lupili, uubengeshima mu kasuba umoneka bwino bwino, na bo bafwile ukumoneka. Muno nshiku abaice abengi Abena Kristu ‘balebalika nge fyengelo’ pa mulandu wa mibele yabo iisuma na pa mulandu wa kukosa mu kubila imbila nsuma.—Fil. 2:15; Mal. 3:18.
2. Ni nshila nshi shimo shimo wingabomfya pa kushimikila bakafundisha na bana be sukulu banobe?
2 Pa Sukulu: Bushe kuti washimikila shani bambi pa sukulu? Abaice bamo balashimikila ilyo kuba ukulanshanya mu kalasi pa fintu fimo pamo nga imiti ikola, isambilisho lya kuti ifintu fyasangwike fye tafyabumbilwe, e lyo na pa nkondo. Nkashi umo uwaebelwe ukulemba ilyashi pa kusansa kwa tupondo amwene ukuti cawama pantu alalanda na pa kutila Ubufumu bwa kwa Lesa e bukapwisha amafya ya bantunse. Bakafundisha bakwe balitemenwe sana ifyo alembele bwino lipoti, ne ci calengele abashimikile na fimbi pa Bufumu.
3. Bushe imyendele yobe kuti yalenga shani ulubuuto lobe ukubalika pa sukulu?
3 Cimbi icingalenga walabalika nge cengelo, mibele yobe, ukufwala ifya mucinshi e lyo ne mimonekele isuma. (1 Kor. 4:9; 1 Tim. 2:9) Abana be sukulu na bakafundisha nga bamona imibele yobe yapusana ne ya bambi, bamo kuti bafwaya ukwishiba icine pa mulandu wa myendele yobe iisuma, ne co kuti cakupeela ishuko lya kubebako icine ca mu Baibolo. (1 Pet. 2:12; 3:1, 2) Tacayanguka ukuba ne mibele isuma, lelo Yehova akakupaala sana. (1 Pet. 3:16, 17; 4:14) Pa kuti abantu bafwaye ukumfwa imbila nsuma, kuti ulebelenga impapulo shilanda pali Baibolo ilyo uletuusha nangu kuti washa ishi mpapulo apo bonse bengashimona.
4. Busuma nshi bwaba mu kushimikila pa sukulu?
4 Ukulenga ulubuuto lobe ukubalika pa sukulu kuti kwakosha icitetekelo cobe no kulenga ukuti uleitakishisha mu kubombela Yehova. (Yer. 9:24) Ici na co cilalenga wacingililwa. Nkashi umo atile, “Ubusuma bumo nasanga mu kulanda pa fyo nasumina bwa kutila, abana be sukulu tabesha kumpatikisha ukucita ifintu ifishilingene ne fyo Baibolo isosa.”
5. (a) Bushe abaice bamo balelundulula shani umulimo wabo? (b) Finshi mufwaya ukucita ku ntanshi mu mulimo wa kwa Lesa?
5 Ukulundulula Umulimo: Inshila na imbi iyo abaice abengi babalikilamo nge fyengelo, kulundulula umulimo wabo. Ilyo munyina umo apwishishe isukulu, aile uko bakabila ba mbila nsuma ya Bufumu balekabilwa sana. Aileba mu cilonganino icinono icakwete fye eluda umo. Alembeele cibusa wakwe ati: “Ala kuno ndeipakisha icine cine. Umulimo wa kushimikila ulewama sana! Pa ng’anda yonse apo twafika, tulalanshanya na bo twasangapo pa maminiti nangu 20, pantu balafwaya ukumfwa fyonse ifyo tulelanda.” Asosele no kutila: “Kuti natemwa abaice bonse bacita ifi nacita no kumfwa ifyo ndeumfwa pali uyu mulimo. Takwaba icawama ukucila ukubombela Yehova na fyonse ifyo twakwata.”
6. Finshi abaice mu cilonganino cenu bacita ifimuletela insansa?
6 Mwe baice ababalika nge fyengelo mu calo, mulatuletela insansa! (1 Tes. 2:20) Ilyo mulebombela Yehova no mutima onse, umweo onse, ukutontonkanya konse, na maka yonse, mukalobolola “ifya miku umwanda umo (100) nomba mu nshita ino, . . . na mu bwikashi buleisa ubumi bwa muyayaya.”—Marko 10:29, 30; 12:30.