“Mulebalika nge Fyengelo”

¹ Mu mikalile ya nomba umuli imfifi ya ku mupashi ne mibele yabipa, bakapepa ba kwa Lesa wa cine, Yehova, abacilile pa mamilioni 6, ‘babalika nge fyengelo’ mu fyalo 234. (Fil. 2:15) Ici calenga abantu ukutwishiba. Ni shani fintu tubeesha ulubuuto lwacindama ulwa cine cifuma kuli Yehova?—2 Kor. 3:18.

² Ifyo Tucita: Abantu balamona bwangu imyendele yesu. (1 Pet. 2:12) Umwanakashi umo amwene ukuti Nte alebomba nankwe ali ne cikuku kabili aleyafwa bambi no kukanasosa amashiwi ya musalula nelyo ukuseka nga ca kutila bambi balanda ifyabipa. Ilyo bambi balandile amashiwi yabi mu menso ya kwa Nte, uyu Nte akutumene fye no kupampamina pa calungama. Bushe ici cakumine shani umwanakashi? Umwanakashi atila: “Nalitemenwe sana imyendele yakwe ica kuti natendeke ukumwipusha ifya mu Baibolo. Natendeke ukusambilila Icebo ca kwa Lesa kabili kuli pele pele nalibatishiwe.” Kabili atila: “Imyendele yakwe e yanengele ukuti ntendeke ukuceeceeta ifisumino fya Nte sha kwa Yehova.”

³ Ifyo tumona abalashi, imicitile ya ku calo, ne milandile yesu iisuma filenga fwe Nte sha kwa Yehova ukwishibikwa nga bantu bomfwila ifipimo fya pa muulu ifya mu Baibolo. Imilimo ya musango uyu iisuma ilaleta ubukata kuli Yehova no kulenga bambi ukupepa wene.

⁴ Ifyo Tulanda: Kwena, balya bamona imyendele yesu te kuti beshibe icalenga ukuti tuibele kano nga twabeba ifyo twasuminamo. Bushe abo mubomba na bo nelyo ukusambilila, balishiba ukuti muli Nte ya kwa Yehova? Bushe mulashukila akashita mulelanshanya amalyashi yambi ukucitilo bunte? Bushe mwapingulapo ‘ukuleka ulubuuto lwenu ukubalika ku cinso ca bantu’ ponse apalingile?—Mat. 5:14-16.

⁵ Ukufishapo umulimo wesu uwa kubalika nge fyengelo kufwaya ukuipelesha. Umutima wa kuipelesha ukatulenga ukutaluka ku fintu fishacindama pa kuti twingabombesha umulimo wa kupususha ubumi uwa kushimikila no kupanga abasambi.—2 Kor. 12:15.

⁶ Mu fyo tucita ne fyo tulanda, shi natutwalilile ukubalika nge fyengelo. Nga twacite fyo, bambi kuti baisansha kuli ifwe pa kupeela Yehova ubukata.