Inte sha kwa Yehova Bali no Kukwata Amabungano ya pa Kati ka Nko

Ibumba Litungulula ilya Nte sha kwa Yehova lilepekanya ukutantikako amabungano ya pa kati ka nko mu 1998. Kuno kubilisha kwalipokelelwe mu kucincimuka nga nshi pa kukumana kwa pa mwaka ukwa Watch Tower Bible and Tract Society of Pennsylvania, ukwabelele mu Jersey City Assembly Hall pa Cibelushi, October 5, 1996.

Ukulunda ku mabungano ya citungu aya lyonse, amabungano ya citungu aya pa kati ka nko ayafulilako yali no kubako ku North Amerika lwa pa kati ka 1998. Cileenekelwa ukuti uku kubungana kuli no kuleta capamo amakana imyanda ne myanda iya Nte ukufuma ku ncende ishingi isha pano isonde. Pa kuti ifyalo ifingi nga nshi fikasangweko, icalo cimo cimo umwaba amaofesi yanono aya Watch Tower Society ayacilile pali 100 cikapiminwa amakombe abali no kusangwa kwi bungano lya pa kati ka nko ilitantikilwe mu musumba wa mu North Amerika.

Kwena, te bonse abengatemwa ukuya ku North Amerika bakaba na maka ya kucite fyo. Nangu cibe fyo, kuti pambi cacitikako ku makana ayengi ukusangwa kwi bungano lya pa kati ka nko ilipalamine ku mwabo. Kuliko amapekanyo ya kuti amabungano ya pa kati ka nko yakabeko mu fyalo fibili nelyo fitatu ku Bulaya e lyo yambi yakabela mu Afrika, Asia, Latin Amerika, South Pacific, na ku Caribbean.

Pa nshita yalinga, amaofesi yanono aya Sosaite yali no kwishibisha ifilonganino mu fifulo fyabo ifyalekanalekana pa lwa musumba nelyo imisumba ye bungano uko balelaalikwa ukuyasangwa. Ifyebo fili no kupeelwa ukukuma ku nshiku she bungano ne mitantikile ku kusala amakombe. Abo abengatemwa ukwisushisha amaformu ya kulomba ukusalwa ukuba pa kati ka makombe kuti cawama batampa ukusunga indalama ilyo balepembelela ifi ifya kucitika fyaibela.

Inte sha kwa Yehova shonse ukushinguluke calo baleenekela mu buseko ifikaba pali uku kubungana kwa pa kati ka nko ukwa mu 1998. Amabungano ya citungu mu fyalo fye fyonse yakakwata programu wapalako.