Ubunake bwa Buntunse Bwasansabika Amaka Ya Kwa Yehova

“Uuli onse aaletontonkanyo kuti nali umutumikishi wa nshita yonse uwa nsansa nga nshi kabili uwa bumi bwateketa. Ni ne lyonse fye naleafwilishako bambi abaali na mafya. Pa nshita imo ine, nangu ni fyo, na ine lwa nkati naleyumfwa kwati nalafwa. Amatontonkanyo ya kusakamika no kulunguluka kwa muntontonkanya fyalenasha. Natendeke ukulafwayo kuitalusha ku bantu. Nalefwaya fye ukuba pa ng’anda ninsendama. Pa myeshi iingi, nalelomba Yehova ukuti aleke fye mfwe.”—Vanessa.

UKUPALA ico cintu caloshiwako apa pa muulu, caba fye ukuti inshita shimo shimo ababomfi ba kwa Yehova kuti bayumfwa ukwambukilwako pa mulandu wa kwikala muli shino “nshita ishayafya.” (2 Timote 3:1) Bamo kuti bafika fye na ku kukungumana. (Abena Filipi 2:25-27) Ukubombomana nga kwatwalilila, kuti kwatupoka amaka, pantu Baibolo itila: “Nga watompoka mu bushiku bwa kumanama, [amaka yobe yakacepa, NW].” (Amapinda 24:10) Ee, lintu twatompoka, tulakabila amaka—nakalimo yantu umutumwa Paulo atile “ukucishamo kwa maka.”—2 Abena Korinti 4:7.

Kuli Yehova Lesa e kufuma amaka ayashipeleela. Ici kuti cashininkishiwa nga twabebeta ububumbo bwakwe. (Abena Roma 1:20) Ku ca kumwenako, taleni langulukeni pa lwa kasuba. Isonde licilinganya amaka yakonkoloka ukufuma ku kasuba aya cibombelo cakwata amawatt 746 ukufushiwa imiku amatrilioni 240. Lelo, ici cipendo cili fye ni hafu wa muli kamo aka muli bilioni umo uwa twakaniko utwa lupikwe lonse ulo akasuba kafumfumuna. Kabili akasuba kaliba akanono nga kukalinganya ne fyaishibikwa nga supergiants (intanda ishishaikulila). Pa kati ka ishi ntanda shishaikulila paba na Rigel, ulutanda ulwaba mu cikako ca Orione ulwaba ulukalamba imiku 50 ukucila pa kasuba kesu kabili lutuma ulupikwe ngo lwa ku kasuba imiku 150,000!

Kabumba wa fintu fya musango yo ifya mu muulu ifyakwato lupikwe afwile umwine wine aba ‘uwafulisho kukosa.’ (Esaya 40:26; Ilumbo 8:3, 4) Mu kushininkisha, kasesema Esaya alondolwele ukuti Yehova “tapomponteka, kabili tafunshika.” Kabili Lesa aliba uwaitemenwa ukupako amaka yakwe bonse abo bengayumfwe fyo baletompoka, pa mulandu wa bunake bwa buntunse. (Esaya 40:28, 29) Fintu acite ci calangililwa mu mulandu wa mutumwa wa Bwina Kristu Paulo.

Ukubomba ne fya Kwesha

Paulo aebele abena Korinti pa lwa cipindami ico aleshipikishako. Aacinike ati “umuunga mu mubili.” (2 Abena Korinti 12:7) Uyu “muunga” kuti pambi cali kulwalilila, nakalimo akafiifi. (Abena Galatia 4:15; 6:11) Napamo Paulo aalelosha ku batumwa ba bufi na bambi bakapumfyanya abalesonsomba ubutumwa bwakwe no mulimo uo aalebomba. (2 Abena Korinti 11:5, 6, 12-15; Abena Galatia 1:6-9; 5:12) Te mulandu na fintu cali, uyu “muunga mu mubili” walelenga Paulo ukupeleelwa nga nshi, kabili alepepa mu kubwekeshabwekeshapo ukuti wingafumapo.—2 Abena Korinti 12:8.

Nangu cibe fyo, Yehova tapeele Paulo cintu alelomba. Mu cifulo ca ico, aebele Paulo ati: “Ukusenamina kwandi kwakumana kuli iwe.” (2 Abena Korinti 12:9) Bushe Yehova pa kulande fyo aloseshe mwi? Kwena, lintu twalanguluka inshila ya kwa Paulo iya ku numa iya kupakasa Abena Kristu, cali fye ni pa mulandu wa cikuuku ca pa fye e po engabela cibusa wa kwa Lesa ukuli konse—pali bufi nga kubomba ngo mutumwa!a (Linganyeniko Sekaria 2:8; Ukusokolola 16:5, 6.) Yehova afwile kanshi aaleeba Paulo ukuti ishuko lya kuba umusambi ‘lyalikumanine.’ Talyali na kukonkwapo no kufumyapo mu cipesha mano amafya yantu akwete mu bumi bwakwe. Mu cine cine, amafya yamo kuti pambi yaisa pa mulandu wa mashuko yalundwako. (2 Abena Korinti 11:24-27; 2 Timote 3:12) Te mulandu na fintu caali, Paulo aalekabila fye ukushipikisha “umuunga mu mubili” untu akwete.

Nangu ni fyo, Yehova napacepa taalefutatila Paulo mu kubulwo luse. Mu cifulo ca ico, asosele kuli wene ati: “Mu kunaka e mo amaka yandi yalengwo kufikapo.” (2 Abena Korinti 12:9) Ee, Yehova mu kubamo kutemwa kuti apeela Paulo ubukose ubwa kubomba pa mibele iyo aalimo. Muli fyo, “umuunga mu mubili” uwa kwa Paulo wabele cintu cimo ica kusambililako. Camusambilishe ukushintilila pa bukose ubufuma kuli Yehova ukucila pa bukose bwakwe umwine. Cilemoneka kwati Paulo alisambilile ili sambililo bwino, pantu imyaka imo pa numa alembeele abena Filipi ati: “Ninsambililo kubo wateko mutima mu miikalile iyo ndimo. Ndi na maka aya kucite fintu fyonse mu ulenkoselesha.”—Abena Filipi 4:11, 13.

Inga imwe ni shani? Bushe muleshipikishapo umusango umo uwa “muunga mu mubili,” nakalimo ubulwele nelyo imibele mu bumi iyo imusakamika apakalamba? Nga e fyo, sansamukeni. Ilintu Yehova te kuti mu cipesha amano afumyepo ico cipindami, kuti amupeela amano no kushangila ku kucicimfya ilyo muletwalilila ukutangishako amabuseko ya Bufumu mu bumi.—Mateo 6:33.

Nga ubulwele nelyo ubukote bulemucilikila ku kupwishishisha ifyafula ifyo mwingatemwa ukupwishishisha mu mibombele ya Bwina Kristu, mwiyumfwo kupelelwa. Mu cifulo ca kumona ica kwesha cenu nge cilecincintila umulimo wenu uwa kuli Yehova, cimoneni nge shuko lya mu nshita ilya kwingilishako ukushintilila kwenu pali wene. Ibukisheni, na kabili, ukuti ukucindama kwa Mwina Kristu takupiminwa ku bwingi bwa fyo aacita, lelo ni ku citetekelo na fintu ukutemwa kwakwe kwashika. (Linganyeniko Marko 12:41-44.) Ukutemwa Yehova no mweo wenu onse cipilibula ukuti mulemubombela ukufika apapela amaka yenu imwe bene—te maka ya muntu umbi.—Mateo 22:37; Abena Galatia 6:4, 5.

Nga ca kuti “umuunga mu mubili” wenu usanshamo imibele ya mu bumi iya kulengo kupeleelwa, pamo nga imfwa ya untu mwatemwa, konkeni ukukonkomesha kwa mu Baibolo ukwa kuti: “Poosa pali Yehova icisendo cobe icafina, wene alekulama; pe fye takasuminishe uwalungama ukutelententa.” (Ilumbo 55:22) Umwanakashi wa Bwina Kristu uwe shina lya Sylvia e fyo acitile. Mu nshita fye iya myaka inono, afwililwe umulume wakwe pa numa ya kuba mu cupo pa myaka 50 e lyo na kabili na bambi 9 aba mu lupwa—ukusanshako abeshikulu babili abanono na bo balifwile. “Nga tacali ni Yehova,” e fyasosa Sylvia, “nga naliba no bulanda ubwacishamo. Lelo ndasanga icisansamushi mwi pepo. Ndalanshanya na Yehova ukulanshanya kwa kankululwila. Nalishiba ukuti alampeela ubukose pa kuti ningashipikisha.”

Fintu caba ica kusansamusha ukwishibo kuti “Lesa wa cisansamushi conse” kuti apeela abali no bulanda amaka pa kuti bengashipikisha! (2 Abena Korinti 1:3; 1 Abena Tesalonika 4:13) Nga twatesekeshe ci, kuti twaumfwikisha cintu Paulo asondwelele pali uyu mulandu. Alembele ati “Mbekelwa mu fya kunaka, mu miponto, mu fya bucushi, mu fya kupakasa, mu fya lumanimani, pa mulandu wa kwa Kristu; pantu ilyo nanaka, e lyo naba na maka.”—2 Abena Korinti 12:10.

Ukulwishanya no Kukanapwililika

Ifwe bonse twalipyana ukukanapwililika ukufuma ku bafyashi besu abantunse ba kubalilapo. (Abena Roma 5:12) Pali uyo mulandu, e co twabela pa bulwi bwa kulwishanya no mubili uwawa. Fintu cingatubongolola ilyo twasango kuti utumisango twa mu “buntu bwa kale” twalilambatila kuli ifwe ukucila pa fintu twaletontonkanya! (Abena Efese 4:22-24) Pa nshita sha musango yo kuti pambi twayumfwa nga fintu umutumwa Paulo ayumfwile, uwalembele ati: “Pantu ndesaminwe mbela ya kwa Lesa ku buntu bwa mu kati, lelo namone mbela imbi mu filundwa fyandi iilelwa ne mbela ya mutima wandi no kuntwala bunkole ku mbela ya lubembu iili mu filundwa fyandi.”—Abena Roma 7:22, 23.

Apa na po, e po twingafwayo kubomfya amaka ukufuma kuli Yehova. Lintu muleshomboka no bunake bwa pa lwenu, te kwesha ukuleka ukuya kuli wene mwi pepo, mu kucincila ukufwaya ukulekelela kwakwe te mulandu ne miku mwingamutununuka pa bwafya bumo bwine. Pa mulandu wa cikuuku cakwe ica pa fye, Yehova “uulingululo mutima” kabili uwingamona ukufumaluka kwenu ukwa lwa nkati, akamupeela kampingu wasanguluka. (Amapinda 21:2) Ukupitila mu mupashi wakwe uwa mushilo, Yehova kuti amupeela ubukose ubwa kuti mwingakonkeshapo ukulwisha ubunake bwa mu mubili.—Luka 11:13.

Na kabili tulakabila ubukose ukufuma kuli Yehova lintu tulebomba no kukanapwililika kwa bantu bambi. Ku ca kumwenako, Umwina Kristu munensu kuti pambi atusosha “akapuuka ka kusosa ngo kulasaula kwa lupanga.” (Amapinda 12:18) Ici kuti catucena apakalamba, maka maka nga ukusosa kwafuma kuli umo untu tuleyumfwe fyo alingile alishibe fingi. Kuti pambi twafulwa nga nshi. Bamo balibomfya fye no kukalifiwa kwa musango yo pamo nge ca kubalungamika ukuti bashe Yehova—iciba cilubo icishaikulila!

Nangu cibe fyo, imibele ya mutima iyashikatala ikatwaafwa ukumwena amabunake ya bambi mu nshila yalinga. Tatwingenekela ukusanga ukupwililika mu bantu bashapwililika. “Tapali muntu uushibembuka,” e fitucinkulako umuntu wa mano Solomone. (1 Ishamfumu 8:46) Arthur, Umwina Kristu wasubwa uwabombeele Yehova mupepi ne myaka amakumi cinelubali, alandilepo ati: “Amabunake ayaba mu babomfi banensu yatupeela apa kulangishisha bumpomfu bwesu, yeesha ukumona fintu UbuKristu bwesu bwaba. Nga ca kuti twasuminisha cintu abantu basosa nelyo cintu bacita ukuti cipumfyanye ukubombela kwesu Yehova, ninshi tubombela abantu. Na kuba, bamunyina na bo bene bafwile balitemwa Yehova. Nga twafwayamo ubusuma muli bene, mu kwangufyanya tukamono kuti na kuba no kubipa tababipa.”

Amaka ya Kushimikila

Ilyo ashilanina ukuya ku muulu, Yesu aebele abasambi bakwe ati: “Mukapokelela amaka ilyo ukeso Mupashi wa mushilo pali imwe; kabili mukabe nte shandi mu Yerusalemu, na monse mu Yudea na Samaria, no kufika ku mpela ya pano nse.”—Imilimo 1:8.

Mu kumfwana na mashiwi ya kwa Yesu, uyu mulimo ulebombwa ne Nte sha kwa Yehova mu fyalo 233 mwi sonde lyonse. Bonse capamo nge bumba, bapoosa amaawala ukucila pali bilioni umo cila mwaka ukwaafwako bambi ukuti bese beshibe Yehova. Ukubomba uyu mulimo takwaba lyonse ukwayanguka. Mu fyalo fimo umulimo wa kushimikilo Bufumu walibindwa nelyo ukushinshibikwa. Langulukeni na kabili, ababomba uyu mulimo—abantu banakuka, abashapwililika, umo umo uwa bene uwaba na mafya ya pa lwakwe na masakamika. Lelo umulimo ulatwalilila, kabili, icafumamo ca kuti, mu myaka itatu iyapita, abantu ukucila pali milioni umo balipeela imyeo yabo kuli Yehova no kulangilila ukuipeela kwabo ukupitila mu lubatisho lwa mu menshi. (Mateo 28:18-20) Cine cine, uyu mulimo ulebombwa fye mu bukose ubufuma kuli Lesa. Yehova alandiile muli kasesema Sekaria ati: “Te ku bulamba, kabili te ku maka, kano ku Mupashi wandi.”—Sekaria 4:6.

Nga muli bakasabankanya wa mbila nsuma, na imwe bene mulebombako—ku fikalamba ifilepwilikishiwa—te mulandu ne fyo imibombele yenu ingamoneko kucepa. Ukukanasakamana ‘imyunga’ iyo mufwile ukulashipikishako, kuti mwaba abaebekeshiwa ukuti Yehova takalabe “umulimo wenu, no kutemwa uko mwalangile kwi shina lyakwe.” (AbaHebere 6:10) E co pa kuti mwingatungililwa twalilileni ukushintilila pa Ntulo ya bulamba bonse. Ibukisheni, ni mu bukose ubufuma fye kuli Yehova e mo twingashipikishisha; amaka yakwe yalabomba bwino mu kunaka kwesu.

[Futunoti]

[Icikope pe bula 26]

Umulimo wa kushimikila upwilikishiwa fye ukupitila mu maka ya kwa Yehova