Bushe Mwalikwata “Umuunga mu Mubili”?
1 Tulafwaisha ukufikilisha umulimo wesu uwa kushimikila imbila nsuma ukufika apo twingapesha. Nangu cibe fyo, bamunyinefwe na bankashi abengi cilabafya ukubombesha pa mulandu wa kuti amalwele yabipisha nelyo ubulema filabapumfyanya, ukucilenga ukuba icakosa ukucita apo bengatemwa ukupesha. Kuli bena, kuti caba icayafya ukucimfya ukufuupulwa, na kucilisha nga balemona bambi bali abapimpa mu butumikishi.—1 Kor. 9:16.
2 Ica Kumwenako ca Kupashanya: Umutumwa Paulo alelwishanya no “muunga mu mubili.” Imiku itatu apaapeete Yehova ukufumyapo icipindami ca kumanama, ico alondolwele nga “malaika wa kwa Satana” uwalemututamo ififunshi. Lelo, te mulandu ne co, Paulo alishipikishe no kutwalilila mu butumikishi bwakwe. Taleililila ubulanda nelyo ukutwalilila ukuilishanya. Alecita apo engapesha. Icamulengele ukutunguluka cali bulayo bwafumine kuli Lesa ubwa kuti: “Ukusenamina kwandi kwakumana kuli iwe; pantu mu kunaka e mo amaka yandi yalengwo kufikapo.” Ubunake bwa kwa Paulo bwasangwike amaka lintu atesekeshe imibele yakwe no kushintilila pali Yehova no mupashi wa mushilo pa kuti ashipikishe.—2 Kor. 12:7-10.
3 Ifyo Mwingashipikisha: Bushe ubunake bwa buntunse bulamulenga ukukanafika apo mwingapesha mu mulimo wenu kuli Lesa? Nge fyo cili, pashanyeni imimwene ya kwa Paulo. Nangu cingati ubulwele bwenu nelyo ubulema te kuti bundapwe muli ino micitile ya fintu, kuti mwacetekela Yehova umupwilapo, uumfwikisha ifyo mukabila kabili akapayanya “ukucishamo kwa maka.” (2 Kor. 4:7) Shukileni ubwafwilisho musanga mu cilonganino, te kununukako. (Amapi. 18:1) Nga ca kuti cilamukosela ukushimikila ku ng’anda ne ng’anda, fwayeni inshila shibomba ku kucita ubunte bwa mu lyashi nelyo ubwa pali lamya.
4 Nangu cingati umuunga mu mubili kuti wamulenga ukukanafika apo mwingapesha mu butumikishi, tamulekabila ukuyumfwa ukuti tapali ifyo mwacitile. Ukupala Paulo, na imwe kuti ‘mwashimikishe mbila nsuma ya kusenamina kwa kwa Lesa,’ ukucite fyo amaka yenu ne mibele filesuminisha. (Imil. 20:24) Ilyo mulebombesha ku kupwishishisha ubutumikishi bwenu, ishibeni ukuti Yehova alatemunwa.—Heb. 6:10.