Baacitile Ukufwaya kwa kwa Yehova

Wishi Uwaiteyanya Ukubelelo Luse

LITWA ilyashi ilyalumbukisha ilyatalile alilembwapo—pa mulandu uusuma. Umulumbe wa kwa Yesu pa lwa kutemwa ukwa kwa wishi pali mwane uwalubile waba nge nsolokoto umo tumwena mu kulengama inkumbu sha kwa Lesa pa babembu abalapila.

Uwalubile Kabili Alondoka

Umuntu umo aali na bana baume babili. Uwa mwaice atile kuli wene: ‘Nimpeni icuma ca bupyani nomba line, ukucilo kulolela lintu mukafwa.’ Wishi alisumine, kabili cimoneke fyo amupeele icakaniko cimo pali fitatu ica fyonse ifyo akwete—icakaniko ca mwi funde ku mwaice pa bana baume babili. (Amalango 21:17) Uyu musepela bwangu bwangu alonganike ifikwatwa fyakwe kabili aimine ulwendo lwa ku calo ca kutali e ko ailepoosaika indalama shakwe shonse ku miikalile ya kusungaula.—Luka 15:11-13.

E lyo kwaponene icipowe cikalamba. Mu kupelelwa, umulumendo alisumine umulimo wa bukacema bwa nkumba—umulimo uwali uwasuulwa ku muYuda. (Ubwina Lebi 11:7, 8) Ifya kulya fyalibulile ica kuti atendeke ukukumbwa amapapa ayo inkumba shalelya! Pa kulekelesha, umulumendo aishileiluka. ‘Ababomfi ba kwa tata balalya bwino ukucila ine!’ e fyo atontonkenye. ‘Ndi no kubwelela ku mwesu, nkayeyebelela imembu shandi, no kulombo kuti nkabe umo uwa babomfi ba cilambu aba kwa tata.’a—Luka 15:14-19.

Uyu umulumendo aile aleikula fye pa kubwekela ku mwabo. Ukwabula ukutwishika imimonekele yakwe yalyalwike apakalamba. Nalyo line, wishi amwishibile fye “ilyo acili ukutali.” Pa kwikatwe nkumbu, abutukile kuli mwane, amukumbatila, no “kumufyompa.”—Luka 15:20.

Uku kusengelwa ukwa cileela kwalengele ukuti umulumendo angukilwe. “Tata,” e fyo asosele, “nabembukilo muulu na ku cinso cenu; nshawamina ukwitwo mwana wenu kabili iyo, muncite nga umo uwa mu ba cilambu benu.” Lelo wishi aitile abasha bakwe. Aakambishe ati: “Kaleteni bwangu ilaya ilyawamisha, no kumufwika; mufwikeni ne nindamunwe ya ku minwe, ne ndyato sha ku makasa; buuleni no mwana wa ŋombe uwainiwa, ipayeni, no kuleka tulye no kusangalala; ico umwana wandi uyu alifwile, nomba ali no mweo; alilubile, kabili alondoka.”—Luka 15:21-24.

Awe ukusefya kukalamba kwalitendeke, ukubiikako fye no kwimba no kucinda. Umwana wakwe umukalamba aumfwile icongo ilyo alefuma kwi bala. Ilyo aishibe ukuti munyina nabwela pa ng’anda kabili e mulandu wine kwabelele uko kusefya, alifulilwe cibi. ‘Namubombela pa myaka iingi, kabili nshatala mpula mwi funde lyenu nakalya, lelo ine tamwatala amumpeela nangu mwana wa mbushi ukuti nsangalale na banandi,’ e fyo ailishenye kuli wishi. ‘Lelo ilyo aisa uyu mwana wenu uwamuliile ifyuma fyenu, mwamupekanishisho mutebeto.’ ‘We mwana,’ e fyo wishi ayasuka mu kunakilila, ‘tuli nobe pe, kabili na fyonse ifyandi fyobe. Lelo tufwile ukusangalala pantu munonko alifwile nomba ali no mweo. Alilubile kabili alondoka.’—Luka 15:25-32.

Ifyo Twingasambililamo

Mu mulumbe wa kwa Yesu wishi e mininako Lesa wesu uwa nkumbu, Yehova. Ukupalo mwana uwalubile, bamo abantu pa nshita shimo balasho mutelelwe waba mu ng’anda ya kwa Lesa, lelo pa numa balabwela. Bushe Yehova amona shani abantu ba musango yo? Abo babwelela kuli Yehova no kulapila mu kufumaluka bafwile ukwishibo kuti “te kuti ebaule pe, nangu kusaamo mutima umuyayaya.” (Ilumbo 103:9) Mu mulumbe, wishi alibutwike mu kupokelela mwane. Mu kupalako, Yehova taba fye uwaiteyanya lelo alafwaisho kubelelo luse ababembu abalapila. Abo “waiteyanyo kubelelo luse, NW” kabili acite fyo “apakalamba.”—Ilumbo 86:5; Esaya 55:7; Sekaria 1:3.

Mu mulumbe wa kwa Yesu, ukutemwa kwa kwa wishi ukwa cine cine kwalengele ukuti mwane akwate amaka ya kubwela. Lelo langulukeni: Bushe nga cinshi cacitiike wishi akaana umulumendo atemwa mu kupaatauka kwa mu cipyu ukumweba ukukanabwela? imibele ya musango yo cilemoneke fyo nga yalengele umulumendo ukuyumfwa uwakankambwa pa nshita yalepa.—Linganyeniko 2 Abena Korinti 2:6, 7.

Mu nshila imo, lilya line fye mwane afuminepo, wishi alicilengele ukwanguka ukuti akabwele. Inshita shimo, baeluda ba Bwina Kristu ilelo bafwile ukutamfya ababembu abashifwaya kulapila ukubafumya mu cilonganino. (1 Abena Korinti 5:11, 13) Mu kucite fyo, kuti bapekanishisho mubembu ifya kubwela nga ca kuti mu kutemwa alangililwa ifya kucita pa kuti ku ntanshi akabweshiwe. Ukwibukisha ukupaapaata ukwa kufuma ku mutima ukwa musango yo, mu kupita kwa nshita kwalilenga abengi abalubile lwa ku mupashi ukulapila kabili kwalibakunta ukubwelela ku ng’anda ya kwa Lesa.—2 Timote 4:2.

Wishi na kabili alangishe inkumbu lintu mwane abwelele. Tacamuposeele nshita pa kuti amone ukulapila kwafumaluka ukwa mulumendo. Lyene, ukucilo kupampamina pa kukonkobola fyonse ifya mampuulu ya kwa mwane, wene atwalilile no mulimo uwa kupokelela mwane, kabili alangishe ukusekelela kukalamba pa kucite fyo. Abena Kristu kuti bapashanya ici ca kumwenako. Balingile ukwanga pa kuti uwalubile nalondoka.—Luka 15:10.

Ukwabula ukutwishika, wishi pa nshita yaleepa aleenekela ukubwela kwa kwa mwane uwapondweke. Lelo, ico, cinshingwa fye ca fintu Yehova afuluka bonse abaasha ing’anda yakwe. Wene “[tafwayo,] muntu ukonaika, lelo onse ukulola ku kulapila.” (2 Petro 3:9) E ico, abo abalapila ku membu shabo kuti bashininkisho kuti bakakwate “nshita sha kupuupuutula ukufuma ku cinso ca kwa Shikulu.”—Imilimo ya Batumwa 3:19.

[Futunoti]