Ilyashi lya Bakabilisha ba Bufumu

Amaka ya Kusangulula aya Cebo ca kwa Lesa

CISHIMIKWO kuti abengi abakunkuma ku miti ikola balabwelelako kuli fyo fibelesho fyabo pa numa ya kufuma mu fipatala. Lelo Icebo ca kwa Lesa kuti capwishishisha cintu ifipatala ilingi fishingacita. (AbaHebere 4:12) Abengi balyafwilishiwa ne Cebo ca kwa Lesa no mupashi ukucimfyo kukunkuma ku miti ikola, kabili balibomfyo kufundo kutila: “Tuisangulule ku kukantana konse kwa mubili no mutima, tube abafishisho mushilo mu kutiina Lesa.”—2 Abena Korinti 7:1.

Ica kumwenako pa lwa ici ca kukumanya ukufuma ku Myanmar. Umwaume umo uwashombweke no kukunkuma ku miti ikola pa myaka iingi ashimiko kuti: “Nakunkwime ku miti ikola ilyo naali mu myaka ya bupungwe. Pa tushito twingi naeseshe ukuleka, lelo nalifililwe. Pa kuti ningatwalilila ne cibelesho candi ica kubomfye miti ikola, naalukile ku bupuupu. Pali uyu mulandu, mu 1988, nalikakilwe pa mwaka umo.

“Pa numa ya kukakulwa, nalikonkenyepo ukwangala ne fibusa fya kale. Tapakokwele nabwekele na ku cibelesho ca kubomfye miti ikola. Iyi myendele ya mayobwele yalengele no kuti balupwa lwandi baleke ukubishanya ukuli konse na ine. Ukulundako, bucipondoka bwandi bwalengele no kuti abengi mu bwina mupalamano balentiina, kabili na bo bene batendeke ukunsengauka.

“Lyene bushiku bumo icishingasengaukwa e cacitiike—nalikolelwe nga nshi. Nalikakilwe na kabili, nomba pa myaka itatu. Nangu ubwikalo bwa mu cifungo bwali ubwayafya nga nshi, kwena nalipuswike.

“Pa numa ya kubwekela ku mwesu ilyo nafumine mu cifungo, nalombele kuli balupwa lwandi ubwelelo pa filubo fya kale. Awe balimpokelele mu cikuuku, lelo na kabili, ifibusa fyalinsembeleke ukubwelela ku misango ya kale.

“Pa kulekelesha, Bamama balilanshenye na pasita wa cikaya pa kuti ningalasangwako kwi sukulu limo ifi ilya Baibolo. Na o pasita alisumine. Nangu cibe fyo, ilyo nshilati nsangweko, Bamayosenge abali ni bamo aba Nte sha kwa Yehova, batile nga mu cine cine nalefwayo kusambilila Baibolo, mfwile ukusambilila na baNte.

“Awe naile na ku Ng’anda ya Bufumu e ko banangilile umwaume umo uwasumine ukunsambilisha Baibolo. Abengi abasangilweko balimposeshe mu cikabilila kabili nayumfwile ukubo wapokelelwa.

“Pa numa ya kutendeka ukusambilila Baibolo no kusangwa ku kulongana kwa Bwina Kristu, ukufuluke miti ikola kwalipyanikwepo no kufwaisha ukupalamina kuli Lesa. Pa numa ya mwaka umo nalilundulwike ukufika na ku kuipeela kuli Yehova Lesa, kabili nalangishe uko kuipeela ukupitila mu lubatisho lwa mu menshi.

“Mu nshita ya nomba, ilyo naleya ku ng’anda ne ng’anda, nakumenye umo uwa abo nalebishanya na bo kale mu kubomfye miti ikola. Awe alifililwe ukusumina pa lwa kupilibuka kwandi ukwa kusungusha. Ici caletele ishuko lya kucitilo bunte, ica kuti nalilanshenye nankwe pa lwe subilo lya Bufumu.

“Mu kupelako ninsanga imifwaile ya cine no bupilibulo mu bumi bwandi. Pa mulandu wa kwaafwa kwa kwa Lesa no kufunda kwa Cebo cakwe, nomba kuti naafwako bambi ukutalukako ku cibelesho cibotelesha ica kubomfye miti ikola.”