Baacitile Ukufwaya kwa kwa Yehova

Ukulekelela Kwalete Pusukilo

ABANA ba kwa Yakobo 10 abaiminine pa ntanshi ya kwa cilolo mukalamba uwa Egupti balishibe mu mitima icabipisha baacitile. Mu myaka ya ku numa balishitishe Yosefe munyinabo wa mwi fumo limbi mu busha, bapangene no kuyaeba shibo ukuti Yosefe naipaiwa ku ciswango.—Ukutendeka 37:18-35.

Nomba ilyo papitile imyaka nalimo 20, kwaponene icipowe icikalamba icalengele aba baume 10 ukwisa ku Egupti ku kushite ngano. Lelo ifintu tafyabawamine. Cilolo mukalamba, uwaleangalila ne fya kulya, abapeele umulandu wa kuba inengu. Aabikile umo pali bene mu cifungo no kweba abashala ukubwelelamo ku mwabo ku kuyaleta munyinabo kasuli, Benyamini. Ilyo bamuletele, uyu cilolo mukalamba apangile ipange no kwisapoosa Benyamini mu cifungo.—Ukutendeka 42:1–44:12.

Lelo Yuda, umo pa bana ba kwa Yakobo, aliilishenye. Atile, ‘nga twabwelelamo ku mwesu ukwabula Benyamini, tata kuti ayafwa.’ Lelo kwalicitike icintu cimo ico Yuda nangu bantu ali na bo pa lwendo bashaenekele. Ilyo cilolo mukalamba apwa ukukambisha bonse ukufuma mu muputule ukushako fye abana ba kwa Yakobo, alilile umusowa uukalamba. Lyene, ilyo atalele, atile: “Nine Yosefe.”—Ukutendeka 44:18–45:3.

Ukubekatilwe Nkumbu no Kubapususha

Yosefe aipwishe bamunyina ba mwi fumo limbi ati, “Bushe tata acili no mweo?” Balifililwe ukwasuka. Cishinka, bamunyina Yosefe tabakwete ca kusosa. Bushe pa ca musango uyu, bapeshiwe amano nelyo bekatwe umwenso? Na kuba, imyaka 20 iyapitapo, e bashitishe uyu mwaume mu busha. Yosefe alikwete amaka ya kubabika mu cifungo, ukubatamfisha ku mwabo ukwabule filyo, nelyo fye ukubakanda icabipisha, uko e kuti, ukubepaya! Bamunyina kwa Yosefe aba mwi fumo limbi balishibe bwino umulandu “bafililwe ukumwasuka; ico basakamikwe ku cinso cakwe.”—Ukutendeka 45:3.

Bwangu bwangu Yosefe abalengele ukukanasakamikwa. Lintu atile kuli bene, “Shi palamineni kuli ine,” balipalamine. Lyene atile: “Ni ne Yosefe munyinenwe, uo mwashishishe ukuya ku Egupti. E ico nomba mwilunguluka kabili mwilaikalipila ico mwampoosele njise kuno; pantu Lesa antumine ku kumutangilila ku kubake myeo.”—Ukutendeka 45:4, 5.

Yosefe tabalangile inkumbu icilangelange fye. Aali namona kale ubushininkisho bwa kulapila kwabo. Ku ca kumwenako, lintu Yosefe atungile bamunyina ba mwi fumo limbi ukuti ni nengu, alibomfwile uko baleitootosha ukuti: “Cine cine tuli no mulandu pali munyinefwe . . . ni pali ici ukumanama uku nakutwishila.” (Ukutendeka 42:21) Ukulundapo, Yuda aliipeeleshe ukuti e o bacite umusha mwi punda lya kwa Benyamini pa kuti uyu mulumendo bengamuleka aye kuli wishi.—Ukutendeka 44:33, 34.

E co, Yosefe alilungike ukubalange nkumbu. Cine cine, aalilwike ukuti ukucite fyo e kwali no kupususha ulupwa lwakwe lonse. E ico, Yosefe aebele bamunyina ba mwi fumo limbi ukubwelela kuli shibo, Yakobo, no kuyamweba ukuti: “E fyo umwana wenu Yosefe atila: Lesa ancita cibinda wa calo conse ca Egupti; tentemukeni, mwise kuli ine, mwikokola; mukekala mu calo ca Goshene, no kuba mupepi na ine, imwe na bana benu na bana ba bana benu, ne mikuni yenu na maombe yenu, na conse ico mwakwata: e ko nkalamulela.”—Ukutendeka 45:9-11.

Yosefe Mukalamba

Yesu Kristu kuti aitwa nga Yosefe Mukalamba, pantu ifyaponeene aba baume babili fyalipalana nga nshi. Filya Yosefe aacushiwe kuli bamunyina, e fyo na Yesu aacushiwe kuli bamunyina, intuntuko shinankwe isha muli Abrahamu. (Linganyeniko Imilimo 2:14, 29, 37.) Lelo, ifintu fyaishilebawamina mumfwafye. Mu kupita kwa nshita, Yosefe uwali umusha aishilesanguka cilolo mukalamba, inkonkani ya kwa Farao. E fyo na Yehova aabuushishe Yesu ku bafwa no kumusansabika “ku kwa kulyo kwa kwa Lesa.”—Imilimo 2:33; Abena Filipi 2:9-11.

Apo Yosefe e wali cilolo mukalamba, e walepayanya ifya kulya ku baleisa mu kushita ku Egupti. Ilelo, Yosefe Mukalamba alikwata ibumba lya musha wa cishinka kabili uwashilimuka umo alepayanishisha ifya kulya fya ku mupashi “pa nshita iiyene.” (Mateo 24:45-47; Luka 12:42-44) Cine cine, abesa kuli Yesu “tabakomfwe nsala kabili, tabakomfwe cilaka . . . ico Umwana wa mpaanga uuli pa kati ka cipuna ca bufumu, akabacema, no kubatungulula baye pa tumfukumfuku twa menshi ya mweo.”—Ukusokolola 7:16, 17.

Ifyo Twingasambililako

Inkumbu sha kwa Yosefe ca kumwenako cishaiwamina. Akonka fye ifyo ubulungi bwali no kuba, nga alikandile abamushitishe mu busha. Lubali lumbi, ukukuntukilwa nga kwamulengele ukulabako fye ku kulufyanya kwabo. Ifi te fyo Yosefe acitile, lelo alyeseshe ukumona ukulapila kwa bamunyina ba mwi fumo limbi. Lyene, ilyo amwene ukuti ubulanda bwabo bwa cine cine, alibalekelele.

Kuti twapashanya Yosefe. Ilyo uutubifishe ayalula umutima wakwe icine cine, tulingile ukumulekelela. Kwena, tatufwile kukuntukilwa fye ica kuti twatekelesha ne membu shabipisha. Kabili, twifilwa kumona ukulapila kwa cine cine pa mulandu wa kuti natukalifiwa. E co shi ‘natube abashipikishanya, no kubelelano luse.’ (Abena Kolose 3:13) Nga twalacite fyo, ninshi tulepashanya Lesa wesu, Yehova, ‘uulekelela.’—Amalumbo 86:5; Mika 7:18, 19.