Abapampamina pa Kwikala Imikalile ya Bukapepa

Amabungano ya “Imikalile ya Bukapepa” yali ne fingi ifya kusambilisha abafwaya ukubombela Lesa! Umo uwasangilweko alondolwele ibungano nge “nshita iishaiwamina iya kukanshiwa, ukukoseleshiwa, no kumfwikisha ifya ku mupashi.”

NA UMBI atile “kwali ifingi ifya kuipakisha, ukutontonkanyapo, ne fya kusambilila.” Nomba natumone fintu programu aali.

Yesu Kristu e Nshila, Icine no Mweo

Uyu wali e mutwe wa bushiku bwa kubalilapo ubwe bungano. (Yohane 14:6) Ilyashi lya kubalilapo lyalondolwele imifwaile ya kulongana pe bungano, ku kusambilishiwa na fimbi pa mikalile yawamisha, iili mikalile ya bukapepa. Yehova asambilisha abantu bakwe ifya kwenda mu nshila shakwe ukupitila muli Baibolo, “umusha wa cishinka kabili uwashilimuka,” no mupashi wa mushilo. (Mateo 24:45-47; Luka 4:1; 2 Timote 3:16) Fintu caba lishuko ukusambilishiwa kuli Mulopwe wa kubumbwa konse!

Pa kwikatana no mutwe wa ubu bushiku, ilyashi likalamba lyaleti “Icilubula ca kwa Kristu—Inshila Lesa Apayanya ku Kupusukilamo.” Ukwishiba umulimo wa kwa Yesu Kristu mu mifwaile ya kwa Yehova kulakabilwa pa kwikala umwabela imikalile ya bukapepa. Kalanda atile: “Ukwabula ilambo lya cilubula ilya kwa Yesu Kristu, takuli umuntu, te mulandu na fintu asuminamo nelyo ifyo acita, uwingapokelela umweo wa muyayaya ukufuma kuli Lesa.” Lyene ayambwile Yohane 3:16 iyitila: “Lesa atemenwe aba pano isonde ukutemwa kwa kuti apeele Umwana wakwe uwafyalwa eka, ukuti onse uumutetekela eonaika, lelo abe no mweo wa muyayaya.” Tufwile ukunonka ukwishiba kwalungikwa ukwa cine pa kutetekela ilambo lya kwa Kristu. Cisanshamo ukuipeela kuli Yehova, no kulangilila ukuipeela mu lubatisho lwa mu menshi, no kupashanya ica kumwenako Yesu Kristu aimike.—1 Petro 2:21.

Ilyashi lya kubalilapo icungulo lyaleti “Ukutemwa Takupwa.” Lyalandile pa cikomo cimo na cimo ica 1 Abena Korinti 13:4-8 apalembwa ifyo Paulo mu kucincimusha alondolwele ukutemwa. Abasangilweko balicinkwilweko ukuti ukutemwa kwa kuipusula cishibilo ca buKristu e lyo ukutemwa Lesa na banensu ni mbali shacindama isha kupepa uko Yehova asuminisha.

Lyene kwali ukukonkana kwa lyashi lya mbali shitatu ilyaleti “Mwe Bafyashi—Sambilisheni Abana Benu Inshila ya kwa Lesa.” Abafyashi kuti baafwa abana babo ukubombela Lesa pa kuba ica kumwenako mu kubelenga no kusambilila Icebo cakwe. Kuti basambilisha abana babo icine ukupitila mwi sambililo lya lupwa ilya lyonse, no kuliteulula ukulingana ne filekabila ulupwa. Ukwaafwa abana ukubombako imilimo ya cilonganino na mu butumikishi bwa mwi bala na ko kwine kwalicindama. Nangu cingati ukukusha abana abatiina Lesa muli cino calo kwalyafya, ukucite co kuti mwafuma amapaalo ayakalamba.

Ilyashi lyakonkelepo lyaleti “Lekeni Yehova Amumumunge ku Mulimo wa Mucinshi.” Lesa alamumunga abafwaya ukumubombela, nge fyo umubumfi amumunga icipe ce bumba. (Abena Roma 9:20, 21) Abamumunga ukupitila mu Cebo cakwe no kuteyanya. Yehova akatwaafwa ukubomfya ukulamuka kwesu mu kufikapo nga twaisuminisha, twabomfya amashuko, kabili nga twaitemenwa ukuti atutungulule.

Lyene pakonkele ilyashi lya kucincimusha ilyaleti “Imibombele ya Bumishonari.” Abatumikishi ba Bwina Kristu 2,390 e balebomba bumishonari pali nomba mu fyalo 148 mwi sonde. Balemika ica kumwenako cishaiwamina ica bucishinka no kupimpa kabili balatasha nga nshi pa kubombela mu fyalo fimbi. Muli ili lyashi, pa mabungano ya pa kati ka fyalo, bamishonari balandile pa mafya ne nsansa basanga muli bumishonari.

Ilyashi lya kulekelesha pa bushiku bwa kubalilapo lyaleti “Bushe Kulaba Ubumi pa Numa ya Mfwa?” Ici cipusho califulunganya abantunse pa myaka iingi. Abantu mu mekashi yonse balishomboka ne ci cipusho. Kabili ifyasuko fya kutunganya fyena fingi. Ifyasuko fyalipusanapusana nge ntambi ne mipepele ya bafyasuka. Nalyo line, abantu balekabila ukusambilila icine.

Kwi pele pele, kalanda afumishe broshuwa mupya uwa mabula 32 uwakwate fikope ifisuma uwa Cinshi Cicitika nga Twafwa? Uyu broshuwa alondolola ukwafumine icisambilisho ca mweo uushifwa no kulangilila fintu cisangwike icisambilisho cikalamba mupepi na mu mipepele yonse mwi sonde ilelo. Mu nshila iyaumfwika kabili iisuma, broshuwa abeebeeta fintu Baibolo ilanda pa mweo, umulandu tufwila, ne cicitika nga twafwa. Kabili uyu broshuwa alondolola isubilo lya bafwa na ba mweo. Fintu ulu lupapulo lukabe paalo ku bafwaya icine!

Cenjeleni ku Fyo Mwenda

Fintu uyu umutwe wali uwalinga ku bushiku bwa cibili! (Abena Efese 5:15) Programu wa lucelo alelanda pa mulimo wa kushimikila no kupanga abasambi. Pa numa ya kulanshanya ilembo lya bushiku, programu atwalilile ne lyashi ilyaleti “Ukwafwilisha Abantu Ukwisa mu Nshila ya ku Mweo.” Pa kubomba uyu mulimo calicindama ukuba abashininkisha, no kwishiba ukuti ukusambilishako bambi icine lishuko kabili cishingamo. Abengi balikeene Icebo ca kwa Lesa mu mwanda wa myaka uwa kubalilapo. Nangu cibe fyo, te mulandu no kukaanya, kwali ‘abalefwaya umweo wa muyayaya abatetekele.’ (Imilimo 13:48, 50, NW; 14:1-5) E fyo cili ne lelo. Nangu cingati abengi balakaana icine ca Baibolo, tulatwalilila ukufwaya abengafwaya ukusambilile cine.—Mateo 10:11-13.

Ilyashi lyakonkelepo lyalelanda pa bwafya bwa kushimikila abantu ubukombe bwa bumi. Apantu nomba nacafya ukusanga abantu pa mayanda, tulekabila ukusakamanishisha no kubomfya inshila ishili shonse pa kushimikila ubukombe bwa Bufumu ku bantu abengi. Mu fyalo ifingi, bakasabankanya ba mbila nsuma balaba ne fisuma ififumamo ukupitila mu kushimikila pa foni no kushimikila mu ncende sha makwebo, muli fyo ukushimikila na ku bantu abo pambi cingafya ukusanga.

Ilyashi ilyaleti “Ukusambilisha Abasambi Fyonse Ifyo Kristu Atwebele” lyalelanda pa bucindami bwa kuba abalamuka mu butumikishi bwesu. Imisambilishishe yesu ilawaminako nga twasambilila kuli bambi no kubomfya ukukansha kushaiwamina kuntu tupokelela pa kulongana. Lintu twaba abalamuka mu misambilishishe yesu, tulaba aba nsansa sana kabili abaikushiwa mu mulimo wesu uwa kwaafwa bambi ukusambilile cine ca Baibolo.

Ilyashi lya kulekelesha ulucelo lyali pa fyo ukuipeela no lubatisho fipilibula. Kalanda alandilepo icishinka cimo ukuti nga ca kuti twacetekela Lesa umutima onse kabili twatukuta ukucita ukufwaya kwakwe, akatupaala no kututungilila. Uwa mano alembele ati: “Uko konse wenda umwishibe [Lesa], na o akatambalike nshila shobe.” (Amapinda 3:6) Inshita ya nsansa iya kubatishiwa yali cintu icikalamba pe bungano icalangilile ukuti abengi balitendeke ukwikala imikalile ya bukapepa.

Pa numa ya kutusha, ilyashi lya kubalilapo mu cungulo lyaleti “Ukubomba mu Kuba ne Subilo lya Mweo wa Muyayaya.” Imifwaile ya kwa Lesa iya kuti abantunse bakalemubombela ku ciyayaya pe sonde ikafikilishiwa. Fintu kanshi cili icalinga ukuti tubike ukutontonkanya kwesu, amapange, na masubilo pa kubombela Yehova mu kuba ne subilo lya ciyayaya! Ilintu tulefulukisha “Ubushiku bwa kwa Lesa,” tukabila ukwibukisha ukuti ubuyo bwesu bwa kumubombela ku ciyayaya. (2 Petro 3:12) Ukukanaishiba inshita lintu Yesu akaleta icilandushi ca kwa Lesa kutulenga ukuba abalola kabili kutupeela amashuko ya cila bushiku aya kuishininkisha ukuti tubombela Yehova ukwabula bukaitemwe.

Amalyashi yabili ayakonkelepo yabebetele icipandwa calenga bune muli kalata intu Paulo alembele abena Efese. Pa fintu alandilepo pali ipaalo lintu twakwata mu “fya bupe ku bantu,” abaume bafikapo abasontwa no mupashi wa mushilo. Aba baeluda balatufunda no kututungulula pa kuti tumwenemo lwa ku mupashi. Kalata wapuutwamo uwa kwa Paulo na kabili atucincisha ukufwalo “buntu bupya.” (Abena Efese 4:8, 24) Ubuntu bwa bukapepa bwaba imibele pamo nga umutima wa nkumbu, icongwe, ubupete, ukunakilila, ukutekanya, no kutemwa.—Abena Kolose 3:12-14.

Ukumona fintu twenda kusanshamo ukuibaka ababula akabi ku fya pano isonde, kabili ilyo e lyashi lyakonkelepo. Tukabila ukusala bwino bwino ifya kusekesha, ukwangalila capamo, ne fikwatwa tulefwaya. Tulakwata ukwiminina kusuma pa ntanshi ya kwa Lesa na kampingu musuma pa kubomfya ukufunda pali Yakobo 1:27 ukwa kuibaka ababula akabi ku fya pano isonde. Kuti na kabili twaikala imikalile yabamo imifwaile no kukwata umutende e lyo ne fibusa fisuma no kutunguluka lwa ku mupashi.

Lyene paishile ilyashi lya kukonkana ilya mbali shitatu ilyaleti “Mwe Bacaice—Konkeni Inshila ya kwa Lesa.” Apo abacaice balishiba ukuti Lesa alibatemwa kabili alatasha pa fyo babombesha ku kutungilila ukupepa kwasanguluka, bafwile kanshi ukukansha ukulingulula kwabo. Inshila imo iya kulundulwilamo ukulingulula yaba kubelenga Baibolo cila bushiku no kwetetulapo. Kuti twaishiba inshila sha kwa Yehova nga tulecite fyo lyonse. (Ilumbo 119:9-11) Na kabili ukulingulula kulalundululwa nga twasumina ukufunda ukufuma ku bafyashi, baeluda, ne mpapulo sha Sosaite. Ukupitila mu kubomfya ukulingulula mu nshila yalungama, abacaice kuti bacincintila ukukonkelela ifyuma, imilandile yabipa, no kutemwisha ukwangala ifya muli ici calo canunuka kuli Lesa. Abacaice na bakalamba kuti batunguluka icine cine pa kwikala imikalile ya bukapepa.

Ilyashi lya kulekelesha lyaleti “Kalenga—Imibele Yakwe ne Nshila Shakwe.” Pa numa ya kulanda ukuti abengi tabaishiba Kalenga, kalanda atile: “Ubupilibulo bwine bwine mu bumi bwayampana ku kwishiba Kalenga, Lesa wesu uwa cine cine; ukwishibe mibele yakwe; no kubomba mu kumfwana ne nshila shakwe. . . . Kwaliba ifishinka pa lwa calo twaikalamo ne nshila twapangilwamo ifyo mwingabomfya ukwaafwa abantu ukusumina muli Kalenga no kuti bengasanga ubupilibulo ukukuma kuli wene.” Lyene kalanda alondolwele ubushininkisho bwa kuti Kalenga wa mano no kutemwa e ko aba. Ilyashi lyafikile pa kalume pa kufumya icitabo icipya ica Is There a Creator Who Cares About You?

“Iyi e Nshila, e mo Mwende”

Uyu wali e mutwe wa bushiku bwa butatu ubwe bungano. (Esaya 30:21) Programu atendeke ne lyashi lya kukonkana ilya mbali shitatu, ilyalelanda pa cimonwa ca kwa Esekiele ice tempele. Ici cimonwa calikwata ubupilibulo bukalamba ku bantu ba kwa Lesa ilelo, apo cayampana no kupepa kwasanguluka mu nshiku shesu. Icingaafwa ukumfwikisha icimonwa ni ci: Itempele lya ku mupashi ilikalamba limininako ukutantika kwa kwa Yehova ukwa kupepa kwasanguluka. Lintu imbali sha cimonwa shalelondololwa, abalekutika baletontonkanya pa mulimo babomba ku kwaafwilisha umulimo wa bakangalila ba kutemwa aba mu basubwa bashalapo na bakaba mwi bumba lya mukankaala.

Ku kupwa kwa lucelo, kwali icilangililo mu Baibolo icalemoneka bwino umwali abafwele imifwalile ya ba kale. Icilangililo caleti “Mwe Ndupwa—Lekeni Imikalile Yenu Ibe ya Kubelenga Baibolo Cila Bushiku!” Calelangilila icitetekelo no kushipa kwa baHebere batatu abakeene ukukontamina ku cimpashanya ca golde icaimikwe na Nebukadnesari Imfumu ya ku Babele. Imifwaile ya cilangililo yali ya kulangilila ukuti Baibolo te buuku fye lye lyashi lya kale lelo ukufunda kwa iko kulanonsha icine cine abacaice na bakalamba ilelo.

Icungulo yali ni nshita ye lyashi lya cintubwingi ilyaleti “Inshila fye Yeka Iya ku Mweo wa Muyayaya.” Pa numa ya kulanda fintu abantunse babembwike no kutendeka ukufwa, kalanda asondwelele na aya mashiwi ya kucincimusha aya kuti: “Ilembo lya mu Baibolo ilya buno bushiku bwe bungano ni Esaya icipandwa 30, icikomo 21, apatila: ‘Ilyo mwapaatukila ku kwa kulyo nangu ku kwa kuso, amatwi yenu yakomfwe cebo cafuma ku numa yenu, icileti, Iyi e nshila, e mo mwende.’ Tumfwa shani ilyo ishiwi? Kupitila mu kukutika ku Cebo ca kwa Lesa, Baibolo wa Mushilo, na mu kukonka ubutungulushi buntu Kafundisha Wakulisha, Yehova Lesa apayanya ukupitila muli yene na mu kuteyanya kwakwe ukwa Bwina Kristu ukwa muno nshiku. Cine cine, ukucite fyo e nshila fye yeka iya ku mweo wa muyayaya.”

Pa numa ya kusupawila icipande ce sambililo lya Ulupungu lwa kwa Kalinda, pakonkele ilyashi lya kusondwelela ilyaleti “Akwendeni mu Nshila ya kwa Yehova.” Lyalondolwele ifishinka fikalamba fimo fimo ifya kulongana. E lyo kalanda abelengele ukusuminishanya ukwa kupampamina pa kutwalilila ukwikala imikalile ya bukapepa.

Ukusuminishanya kwasondwelele na ya mashiwi ya kucincimusha aya kuti: “Twalishininwa ukuti ukumfwila ifishinte, ukufunda no kukonkomesha kwa mu Malembo, e nshila yawamisha iya kwikalilamo ilelo kabili e kubike ntendekelo yawamisha iya ku ntanshi, pa kuti twingekata ku mweo uwabo mweo wine wine. Ne cacilapo pali ifi fyonse, twasuminishanya muli ino nshila pantu twalitemwa Yehova Lesa no mutima wesu onse, umweo wesu onse, umuntontonkanya wesu onse, na maka yesu yonse!” Bonse abasangilweko balisuminishe pa kwasuko kuti ee!

[Akabokoshi ne Cikope pe bula 8]

Is There a Creator Who Cares About You?

Ici citabo cakwata uyu mutwe cilangilila ubushininkisho bwa kuti Kalenga, Yehova e ko aba, kabili cilondolola imibele yakwe. Calembelwa maka maka abasambilila amano ya ku masukulu ya ku calo lelo abashasumina muli Lesa. Ici citabo cikakosha ne citetekelo ca basumina kale muli Lesa, no kubalenga ukutasha pa mibele ne nshila shakwe.

Icitabo ca Is There a Creator Who Cares About You? tacitungo kuti kabelenga alisumina muli Lesa. Lelo cilondolola ifyo nomba line ukusanga kwa sayansi ne fishinka fya sayansi filangilila ukuti kwaliba Kalenga. Pa fipandwa filimo pali ifitila “What Can Add Meaning to Your Life?,” “How Did Our Universe Get Here?—The Controversy,” na “How Unique You Are!” Fimbi ifipandwa filondolola umulandu twingashininkishisha ukuti Baibolo yalipuutwamo kuli Lesa. Ici citabo cipya cilasupula ifyaba mu Baibolo, ifilangilila imibele ya kwa Kalenga ne nshila shakwe. Cilalondolola umulandu Lesa asuminisha ukucula na fintu akakupwisha.

[Ifikope pe bula 7]

Abengi balibatishiwe

[Ifikope pe bula 7]

A. D. Schroeder, uwa mwi Bumba Litungulula ilya Nte sha kwa Yehova, afumishe broshuwa mupya

[Ifikope pe bula 8, 9]

Icilangililo ca kucincimusha cakoseleshe ukubelenga Baibolo cila bushiku