Ilyashi lya Bakabilisha ba Bufumu

Inte Shaishibisha Icinabwingi mu France

UKUFUMA pali Cisano ulucelo, pa January 29, 1999, ukufika na pa mpela ya mulungu, Inte sha kwa Yehova mu France mu kucincimuka shaanenye mu misebo kabili pa numa ku ng’anda ne ng’anda amakope amamilioni 12 aya trakiti waleti People of France, You Are Being Deceived! (Mwe Bantu ba mu France, Balemubepa) Mulandu nshi kwabelele lulu wa musango yu?

Pa kukumana kwali mu Paris pali Cisano pene ulucelo, umulandu wa uyu lulu walilondolwelwe. Uwalelandilako baNte alondolwele ukuti: “Ico tulefwaya ukucita lelo kulenga abantu ukwishiba ifyo twaba no kutalalika ifyebo fya musaalula ifyo baananya pali ifwe. Kuti batulengulula, lelo tatwakalekutika ku bufi na ku fyebo fya kutuseebanya.”

Nangu cingati Inte sha kwa Yehova e mipepele ya Bwina Kristu iya citatu ku bukulu mu France, abana ba baNte abengi balisaalulwa no kucushiwa mu sukulu. Abakalamba incito shalipwa kabili balabatiinya pa mulandu wa mipepele yabo. Ica kupapusha ca kuti pa misangulo ya mipepele iyo bapokelela batile bafwile balelipilapo amapesenti 60 aya musonko. Ni shani fintu uyu lulu abombele no musoobolola uyu?

Trakiti atile: “Inte sha kwa Yehova 250,000 pamo na babishanya na bo abekala mu France BALEILISHANYA pa nshila yabula ubufumacumi umo imipepele yabo iya Bwina Kristu, iyaba mu France ukutula 1900, batila yaba imo iya fyakaniko fyabipisha ukutula mu 1995. . . . BALEILISHANYA pa kucushiwa lyonse.” Ifyebo fya museebanya pali baNte mu France ne nshila sha bucenjeshi isho bakaseebanya babomfya pa kubaseebanya fyaishile pa bwelu. Trakiti asondwelela ukuti: “Ilelo, Inte sha kwa Yehova ukucila pa mamilioni yabili pamo na babishanya na bo bekala mu Bulaya. Balakonka amafunde ya Buteko bubateka ukupitila mu kwikatilila ku mibele isuma iisangwa mu Amalandwe. Mwe bantu ba mu France, ifi fishinka. Mulimo wesu ukulangilila ifi fishinka!”

Ukwankulako Bwino, mu Kwangufyanya

Iminshipendwa ya matrakiti yalipeelwe pa bushiku bwa kubalilapo. Mu Paris mweka mweka, ilyo akasuba kalefika pa kati baNte ukucila pali 7,000 bashalike amatrakiti ukucila pali 1.3 milioni. Wali e muku wa kubalilapo ku bantu ukumona baNte abengi balepeela amatrakiti mu misebo. Utwampani twa kusabankanishishamo amalyashi, ukusanshako no twa manyunshipepala ya cikaya na ya calo no twa televishoni twalyankwileko bwino kuli uyu lulu. Inyunshipepala ya Le Progrès de Lyon yatile: “Uku kuitendekelako . . . kuleta pa bwelu ukukanaumfwikisha ishiwi. Mu myaka 10 iyapitapo, ishiwi lya ‘icakaniko’ . . . lyakwata ubupilibulo bwabipa. . . . Inte sha kwa Yehova te bantu babipa abengaleta icimfulumfulu pa bwikashi.”

Abaishiba Inte sha kwa Yehova balatasha pa lwa mutende wabo ne fyo bacindika sana umuyano mu bwikashi. E co, abengi mu misebo balitashishe no kutungilila iminshipendwa ya baNte abaibimbile muli uyu lulu. Ilyo line fye abantu baletasha pali trakiti kabili batumine balamya, fax, na bakalata. Na kucilisha, abafumaluka bapeelwe ishuko lya kumfwa ifishinka pali baNte ukupusana ku fyebo fya kwelenganya ifya buwelewele, kabili abaseebanishiwe pa mulandu wa fisumino fyabo balangilile ifyo baleyumfwa pa fyo bakatamika.