Inte sha kwa Yehova—Baleya pa Ntanshi Abashininwa!

Lipoti Wa Kukumana Kwa Pa Mwaka

MULI ishi nshiku shifulilemo ukutwishika, Inte sha kwa Yehova balipulamo nga Bena Kristu bashininwa. Ici calondolwelwe bwino pa kukumana kwa pa mwaka ukwa kabungwe ka Watch Tower Bible and Tract Society of Pennsylvania, ukwabelele mu ciyanda ca kulonganinamo ico batila Jersey City, New Jersey, Assembly Hall ica Nte sha kwa Yehova pa Cibelushi ca pa October 7, 2000.a

Mu fyebo fyakwe ifya kwiswila, ceyamani, John E. Barr, uwa mwi Bumba Litungulula ilya Nte sha kwa Yehova, atile: “Pa bantu bonse ababa pe sonde, ni fwe twaishiba no kusumina ukuti Umwana watemwikwa uwa kwa Yehova, Kristu Yesu, nomba ni mfumu mu myulu, kabili aleteka mu kati ka balwani bakwe.” Ukushininwa kwine kwine ukwa musango yu kwalangililwe mu malipoti 6 aya kucincimusha ukufuma mwi sonde lyonse.

Ukucimfisha Ukupupe Mipashi ku Cine ca mu Baibolo ku Haiti

Ukupupe mipashi kwaliseeka nga nshi ku Haiti. Uwampanya imibombele ya Komiti wa Musambo John Norman ashimike ati, “Ilingi line, abantu bengila mu mipepele ya kupupe fikolwe iya voodoo ku kufwaya ukuti baicingilile.” Ing’anga imo yatendeke ukutwishika ubu bucingo ilyo yaputwike ukuulu mu busanso. Yasungwike aiti, ‘Kuti naponenwa shani ne ca musango yu nga ca kutila imipashi ilancingilila?’ Filya cali kuli bambi abengi, uyu mwaume asambilishiwe ne Nte sha kwa Yehova kabili alyafwiwe ukuleka ukupupe mipashi. Icilangililo ca kuti ku Haiti kuti kwaba ukulunduluka kukalamba camoneke pa April 19, 2000, pa Cibukisho ca Mfwa ya kwa Kristu ilyo abantu basangilweko bacilile impendwa ya bakasankanya imiku ine.

Ukupimpa mu Cifulo ca Kubombelamo Icishaikulila ica ku Korea

Ku Korea, Inte sha kwa Yehova ababa mu mulimo wa nshita yonse bafika amapesenti 40. Uwampanya imibombele ya Komiti wa Musambo Milton Hamilton, atile, “apo natukwata uyu mulalo ukalamba uwa bakabilisha, icifulo cesu ica kubombelamo icakwata abantu ukucila pa mamilioni 47 cilabombelwamo conse pa muku fye umo pa mweshi.” Icamwenwe na cimbi kufula kwa filonganino fya bacibulu. Mu muputule umo uwa filonganino fya bacibulu, amasambililo ya Baibolo aya mu ng’anda ayaletungululwa yali 800. Cimo fye no kuti kasabankanya umo aletungululapo isambililo limo. Icibipileko fye ca kuti, bamunyina abalumendo bacili balepooswa mu fifungo pa mulandu wa kukanaibimba mu milandu ya calo. Nalyo line aba Bena Kristu ba bucishinka balasungwa bwino ku bakalamba ba fifungo, kabili balapeelwa ne milimo iikabila abacetekelwa ukuibomba.

Ukukumanisha Ifilekabilwa mu Mexico

Impendwa ya bakasabankanya ba Bufumu 533,665 e batumine amalipoti yabo aya mulimo wa mwi bala ku Mexico mu mweshi wa August 2000. Impendwa ya basangilwe ku Cibukisho yacilile impendwa ya ba kasabankanya ukucila na pa miku itatu. Robert Tracy kampanya wa mibombele ya Komiti wa Musambo atile: “Ubuyo bwesu uno mwaka bwa kukuula Amayanda ya Bufumu na yambi 240.” Alundilepo no kuti, “Nalyo line, tucili tulekabila na yambi ayengi.”

Imisepela ya Nte sha kwa Yehova isha ku Mexico yaba ca kumwenako. Shimapepo wa ku Katolika alandile pa lwa mulumendo umo ati: “Kuti natemwa ukukwata umo pa bakonshi bandi uwaba nga wene. Ndakumbwa umupampamina wa aba bantu ne fyo balondolola bwino Baibolo. Balibombela Lesa, ukufika fye na mu kubikilapo imyeo yabo mu kapoosa mweo.”

Bumpomfu mu Fimfulunganya fya mu Sierra Leone

Ukufuma mu April 1991, lintu inkondo ya bana calo yabukile mu Sierra Leone, amakana na makana balipaiwa, ukucenwa, nelyo ukulemanikwa. Kampanya wa mibombele ya Komiti wa Musambo Bill Cowan, ashimike ati: “Inkondo na macushi fyalilenga abantu ukwaluka sana. Abengi abashatemenwe ubukombe bwesu nomba balakutikisha. Nomba abantu baleileta fye abene ku Mayanda yesu aya Bufumu ukusangwa ku kulongana umuku wa kubalilapo ukwabula ukulaalikwa. Ilingi line bamunyina balemikwa mu misebo ku bantu abalefwaya ukusambilila Baibolo no kubeba ukuti batendeke isambililo.” Nangu mu calo mutwalilila fye ukuba ifimfulunganya, umulimo wa kushimikila Ubufumu wena uletwala ifisabo mu Sierra Leone.

Programu Ushaikulila uwa Makuule mu South Africa

Pali ino nshita, Amayanda ya Bufumu ayengi nga nshi yalekabilwa mu cifulo cilolekeshiwapo ne ofeshi lya Watch Tower ilya mu South Africa. Amayanda ya Bufumu ayengi kale kale yalikuulwa. John Kikot uwa mu Komiti wa Musambo atile, “pali nomba takuba ukulonganina mu tumisakuta nelyo mwi samba lya cimuti, nga fintu cali kale, bamunyina nomba balelonganina mu mayanda yasuma umwaba ne fipuna fisuma. Nangu ca kuti aya Mayanda ya Bufumu tayakuulwa mu musango wa kuti ni sotambe, ilingi e fikuulwa fimoneka bwino sana mu ncende yabelako. Mu ncende shimo, casangwa ukuti ilyo bapwisha ukukuula Ing’anda ya Bufumu, icilonganino cilakula ukufika ku miku ibili mu mwaka uukonkapo.”

Inkulo Ipya iya Nte mu Ukraine

Mu mwaka wa mulimo uwa 2000, kwali ukwingilishiwako kwa bakasabankanya muli ci calo ica kuti bafikile na kuli 112,720. Pali aba bakasabankanya ukucila pali 50,000 basambilile icine ca mu Baibolo mu myaka 5 iyapita. Kampanya wa mibombele ya Komiti wa Musambo, John Didur, atile, “cine cine, Yehova naimya inkulo ipya iya Nte imisepela ku kubilisha ishina lyakwe!” Alundilepo ukuti, “Pa myaka ibili iyi iyapita, twalishalika bamagazini ukucila pa mamilioni 50, ukulingana fye ne mpendwa ya bekala calo bonse. Nga kupendela pali avareji, cila mweshi tupokelela amakalata 1000 ukufuma ku balefwaya ukusambilila icine abepusha ukupeelwa ifyebo fyalundwapo.”

Imbali sha Programu Shimbi Isha Kucincimusha

Daniel Sydlik, uwa mwi Bumba Litungulula, alandile ilyashi lya kufika pa mutima. Icipande cileti “Ifyo Ibumba Litungulula Lyapusana na Kabungwe ka mwi Funde,” icili muli uno wine magazini, cishimpilwe pali lilya line lyashi ilyakwete ifyebo fya kufunda.

Theodore Jaracz uwa mwi Bumba Litungulula alandile ilyashi lya kulenga ukutontonkanyapo ilyaleti “Bakangalila na Babomfi Batumikila Basontwa mu Nshila ya Teokrasi.” Pa fipande fili muli uno magazini cimo cishimpilwe pali lilya line lyashi.

Ukukumana kwa pa mwaka kwasanshishemo ne lyashi lya kucincimusha ilyalandilwe na David Splane uwa mwi Bumba Litungulula ilyashimpilwe pe lembo lya mwaka ilya mu 2001. Ili lifumine pa mashiwi ya kwa Paulo ayatila: “Mwiminine abapwililila kabili abaishibisha muli conse ico Lesa afwaya.” (Abena Kolose 4:12) Inte sha kwa Yehova mu calo conse bapampamine pa kucita ico cine ilyo baleshimikila mu busumino imbila nsuma iya Bufumu bwa kwa Lesa mwi sonde lyonse.—Mateo 24:14.

[Futunoti]