Ubumi Bwabo

Ukutungililwa na Yehova Inshiku Shandi Shonse

NGA FINTU CASHIMIKWA NA BA FORREST LEE

Bakapokola e lyo fye batupokele ifilimba fya maseleti ne mpapulo sha Baibolo. Inkondo ya Calo iya Cibili yalengele abaletukaanya ukukwata umwa kubepekesesha pa kunashanasha kateka mukalamba uwa Canada ukuti abilishe ukuti umulimo wa Nte sha kwa Yehova tawasuminishiwe ku buteko. Ifi fyacitike pa July 4 mu 1940.

UKWABULA ukufuupulwa ku fyacitike, twabulile impapulo na shimbi uko twalesungila no kutwalilila ukushimikila. Nshakalabe amashiwi batata balandile pali ilya nshita aya kuti: “Tatuleka fye ifyo fine. Yehova alitupeela umulimo wa kushimikila.” Nali kalume uwakwete amaka uwa myaka 10 pali ilya nshita. Lelo umupampamina no kupimpa kwa batata mu butumikishi lyonse filancinkulako ifyo Lesa wesu, Yehova, atungilila ababomfi bakwe aba cishinka.

Umuku wakonkelepo ilyo bakapokola batwikete, balitupokele impapulo shesu no kutwala batata ku cifungo, ukusha bamayo beka na bana bane. Ici cacitike mu September 1940 mu citungu ca Saskatchewan. Pa numa balintamfishe ku sukulu pantu nacitile nge fyo kampingu wandi uwakanshiwa na Baibolo anjebele no kukaana ukupika sulupu ku mendela nelyo ukwimba ulwimbo lwa cishipa. Natwalilile amasomo yandi pa ng’anda kabili ici calingafwile ukutantika bwino inshita, kabili nalebombesha mu mulimo wa kushimikila.

Mu 1948 kwali ubwite bwa kuti abatumikishi ba nshita yonse aba Nte sha kwa Yehova abetwa bapainiya, bengakuukila ku cifulo cabelele ku lulamba lwa ku kabanga ku Canada. E co naliile no kubomba bupainiya ku Halifax, mu Nova Scotia, na mu Cape Wolfe, ku cishi ca Prince Edward. Umwaka wakonkelepo, nalisumine ilyo bandalike ukubombako imilungu ibili pa maofeshi yanono aya Nte sha kwa Yehova mu Toronto. Ilyo ilya milungu ibili yapwile, natwalilile ukubomba pa maofeshi yanono ukucila pa myaka 6. Pa numa, naishibene na Myrna, uwatemenwe Yehova nge fyo na ine namutemenwe, kabili twaupene mu December 1955. Twaileikala mu Milton, mu citungu ca Ontario, kabili mu kwangufyanya icilonganino calipangilwe kulya. Umuputule wa pa nshi uwa ng’anda yesu e watendeke ukubomfiwa nge Ng’anda ya Bufumu.

Ukufwaya Ukubombesha mu Butumikishi

Mu myake yakonkelepo, twakwete abana 6 mu kwangufyanya. Umwana wesu ibeli ali mukashana Miriam. E lyo pakonkele Charmaine, Mark, Annette, Grant, na Glen kasuli. Ilingi nga nabwela ku ng’anda ukufuma ku ncito nalesanga abana nabekala ukushinguluka ishiko, ninshi Myrna alebabelengela Baibolo, ukubalondolwela ifyacitike muli Baibolo, no kubasambilisha ukutemwa Yehova mu mitima yabo. Pa mulandu wa kutungilila kwakwe, abana besu bonse basambilile Baibolo ilyo bali abaice.

Ukupimpa kwa batata mu butumikishi kwashile ica kumwenako cisuma mu mutima na mu muntontonkanya wandi. (Amapinda 22:6) E ico, mu 1968, ilyo indupwa sha Nte sha kwa Yehova shaipushiwe ukukukila ku Central na ku South America ku kwafwilisha mu mulimo wa kushimikila, ulupwa lwesu lwalefwaya ukuya. Pali ilya nshita abana besu bali pa kati ka myaka 5 na 13, kabili tapali nangu umo pali ifwe uwaishibe iciSpanish. Ukulingana ne fyo balandile, naile ku fyalo fyalekanalekana ku kuyamona ifyo imikalile yali kulya. Ilyo nabwelele, twalipepele pa kusala uko twali no kuyabombela ngo lupwa kabili twapingwilepo ukukuukila ku Nicaragua.

Ukubombela mu Nicaragua

Ilyo October 1970 yafikile twali kale mu cifulo cesu icipya, kabili ne milungu itatu tayapwile bampeele ne lyashi pa kulongana kwa cilonganino. Calingafishe sana ukulanda lilya lyashi pantu nshaishibe sana iciSpanish kabili pa kupwa naebele icilonganino conse ukwisa ku mwesu ku kuipakisha cerveza pa Cibelushi ne nshita ya 9:30 hrs. Nalefwaya ukulanda ati servicio, e kutila ubutumikishi bwa mwi bala, lelo icacitike ca kuti naebele bonse ukwisa mu kunwa ubwalwa. Mwandi calyafishe ukusambilila ulu lulimi!

Pa kubalilapo, nalelemba ifyo nalefwaya pa minwe no kupitulukamo ilyo ndeya ku kushimikila pa ng’anda. Naletila: “Nga mwapokako icitabo kuti twamusambilisha Baibolo mu mwenu apa fye.” Umuntu umo uwapokeleko icitabo pa numa atile asangilwe ku kulongana kwesu pa kuti engashininkisha ifyo nalefwaya ukumweba. Uyu mwaume aishileba umo uwa Nte sha kwa Yehova. Ifyo cabe ca cine ukuti Lesa e umesha imbuto sha cine mu mitima yaicefya, nge fyo na Paulo asumine!—1 Abena Korinti 3:7.

Ilyo twabombele nalimo imyaka ibili mu musumba ukalamba uwa Managua, batwebele ukukuukila ku kapinda ka ku kuso aka Nicaragua. Kulya twabombele ne cilonganino icali mu Rivas e lyo na mabumba yambi aya bantu abalefwaya ukusambilila Baibolo ayali ukutali. Ilyo twaletandalila aya mabumba, twalebomba na Nte wa busumino, uwa cikalamba uwe shina lya Pedro Peña. Ibumba limo lyabelele ku cishi ca mpili shipuka mu mumana wa Nicaragua, ukwali fye ulupwa lumo ulwali ni Nte sha kwa Yehova.

Nangu ca kuti ulu lupwa talwakwete sana indalama, lwalibombeshe ku kulanga ukuti lwalitashishe pa fyo twalebatandalila. Ilyo twafikile icungulo, twasangile nabatupekanishisha kale ifya kulya. Twaikele kulya umulungu umo, kabili abantu ba cikuuku abatemenwe icine ca mu Baibolo balitupeeleko ifya kulya. Twalitemenwe nga nshi ilyo abantu 101 basangilwe ku lyashi lya Baibolo ilya ku cintubwingi pa Mulungu.

Nasumina ukuti Yehova alentungilila ilyo twalefwaya ukutandalile ibumba limbi ilya balefwaya ukusambilila mu mpili shabela mupepi no mupaka wa Costa Rica. Ubushiku twali no kuya, Pedro aishile mu kunsenda, lelo nalilele pantu nalilwele impepo. Namwebele ukuti: “Te kuti nje, Pedro.” Anjikete pa mpumi no kutila: “Umubili naukaba sana, lelo tufwile ukuya! Bamunyina balelolela.” Lyena apepele ipepo lya kufuma pa nshi ya mutima ilyo nshatalaumfwapo.

Pa numa natile: “Bulako fresco unwe (ica kunwa icipangwa ne fisabo). Nalaipekanya mu maminiti 10.” Ku cifulo uko twaile kwali indupwa shibili ishali ni Nte sha kwa Yehova, kabili balitusakamene bwino nga nshi. Ubushiku bwakonkelepo twaile mu kushimikila na bene, nangu nshakwete amaka pa mulandu wa mubili ukukaba. Fintu cali ica kukoselesha ukumona abantu ukucila pali 100 basangwa ku kulongana kwesu pa Mulungu!

Ukukuuka na Kabili

Umwana wesu uwalenga 7, Vaughn, afyelwe mu 1975. Umwaka wakonkelepo, twabwelele ku Canada pa mulandu wa mafya ya ndalama. Tacali icayanguka ukufuma ku Nicaragua pantu ilyo twaleikala kulya twalimwene ifyo Yehova atungilila. Ilyo twakuukile, abantu ukucila 500 mu cifulo icilonganino cesu caleshimikilamo balesangwa ku kulongana kwesu.

Ilyo twali tucili ku Nicaragua, ine no mwana wandi umukashana Miriam twasontelwe ukuba bapainiya baibela, kabili Miriam anjipwishe ukuti: “Tata, bushe nga mwabwelele ku Canada, kuti mwansuminisha ukwikala kuno?” Nshaletontonkanya pa kufuma ku Nicaragua, e ico natile: “Cili fye bwino!” E co ilyo twakuukile, Miriam alishele no kutwalilila ubutumikishi bwa nshita yonse. Pa numa, aupilwe kuli Andrew Reed. Mu 1984 basangilwe kwi kalasi lyalenga 77 ilya Gileadi, isukulu lya bamishonari ilya Nte sha kwa Yehova, ilyo pali ilya nshita lyabelele ku Brooklyn, mu New York. Miriam no mulume wakwe nomba babombela ku Dominican Republic, ukufishapo ukufwaisha kwakwe kuntu alundulwile pa mulandu wa bamishonari abalebombela ku Nicaragua.

Nali ncili ndeibukisha amashiwi ya batata aya kuti “tatuleka fye ifyo fine,” yali yacili mu mutima wandi. E co ilyo umwaka wa 1981 wafikile twalikuukile na kabili pantu twakwete indalama ishalinga ica kutila kuti twabwelelamo ku Central America, uno muku twakuukiile ku Costa Rica. Ilyo twalebomba kulya, twalaalikwe ukuyaafwilisha ukukuula amaofeshi yanono kulya. Lelo, mu 1985 twabwelelemo ku Canada pantu umwana wesu umwaume Grant alekabila ukundapwa. Glen ashele alebomba umulimo wa kukuula amaofeshi yanono ku Costa Rica, e lyo Annette na Charmaine bena balebomba bupainiya bwaibela. Fwe bafumine ku Costa Rica twalikwete isubilo lya kubwelelako na kabili.

Ukushipikisha Amafya

Pa September 17, 1993, bwacele ubwacelebuka kabili akasuba kalibalike. Ine no mwana wesu mwaume Mark, uwali umukalamba pa balumendo, twalebika bwino amalata pa mutenge. Twabombele pamo no kulanshanya pa fya ku mupashi, nge fyo twalecita lyonse. Lelo nalitelemwike no kuponena pa nshi. Ilyo napuuputwike, ico nalemona fye malaiti na bantu abafwele ifyabuuta. Nali mu muputule wa mu cipatala umo bateka abalwalishe.

Pa mulandu wa co Baibolo isosa pa mulopa, apo pene fye natile: “Nshilefwaya umulopa, nshilefwaya umulopa!” (Imilimo 15:28, 29) Ifyo cali ica kukoselesha ukumfwa Charmaine ukusoso ati: “Tata, fyonse fili fye bwino. Bonse tuli kuno.” Pa numa banjebele ukuti badokota balimwene kardi yandi iya mulopa kabili tabalandilepo pa kumbikamo umulopa. Naliifunine umukoshi kabili ifilundwa fyandi fyonse fyalilekele ukubomba, nshakwete na maka ya kupeema.

Nalekabila ukutungililwa na Yehova pali nomba ukucila ne fyo cali kale pantu nomba naali cite. Ukundepula umupita umwela, no kufyantikamo ica kungafwa ukupeema, kwalengele ukuti umwela wilafika ku kalikoliko kalenga iciunda ce shiwi ukumfwika. Nshalelanda. Abantu balelolesha fye pa milomo yandi pa kumfwa ifyo nalefwaya ukusosa.

Indalama ishalefwaikwa ku kusakamana ifipooswa shalifulile. Apo umukashi wandi na bana bandi abengi bali mu butumikishi bwa nshita yonse, nalangulwike nga bali no kuleka uyu mulimo pa kuti bengasakamana ifipooswa. Lelo, Mark aingile ncito iyo yaafwilishe ukucefyanyako amafya ya ndalama mu myeshi fye itatu. Pa mulandu wa ici, bonse batwalilile mu butumikishi bwa nshita yonse ukufumyako fye ine no umukashi wandi.

Amakardi ya kukoselesha na bakalata abengi ukufuma ku fyalo fyalekanalekana 6 bakambatikwe ku fibumba fya mu muputule nali uwa mu cipatala. Cine cine Yehova alentungilila. Icilonganino na co cayafwilishe ulupwa lwandi pa kubapeelako ifya kulya ukucila pa myeshi 5 iyo nali mu cipatala. Cila bushiku, eluda wa Bwina Kristu aleba na ine akasuba, ukumbelengelako Baibolo ne mpapulo sha Baibolo, no kunshimikilako ifyacitike fimo ifya kukoselesha. Babili aba mu lupwa lwandi balepekanishisha ukulongana kumo na kumo pamo na ine, e ico nshalepuswa ku fya kulya fya ku mupashi ifyacindama.

Ilyo nali mu cipatala, kwali ukupekanya kwa kuti nkasangwe ku kulongana kwaibela. Abakalamba ba cipatala bapekenye ukuti nasi umo na dokota uwasoma pa fya mipeemene babe na ine akasuba konse. Mwandi nali ne nsansa ukuba pamo na bamunyina na bankashi na kabili! Nshakalabe ifyo namwene abantu abengi nga nshi nabatantama, balelolela ukumposha.

Ukutwalilila Ukwangwa Ifya ku Mupashi

Umwaka umo pa numa ya ubu busanso, nabwelele ku ng’anda ku kuba pamo no lupwa lwandi, nangu ca kuti ncili ndakabila ukuntensha akasuba no bushiku. Motoka iyakwata ifibombelo ifyaibela ilangafwa ukusangwa ku kulongana uko nshipuswa ilingi line. Lelo, ca cine umupampamina ulafwaikwa pa kusangwa ku kulongana. Ukufuma apo nabwelela ku ng’anda, nalisangwa ku kulongana kwa citungu konse.

Ilyo papitile inshita, natendeke ukulandako panono mu February 1997. Ba nasi bamo abantensha balakutikisha ilyo ndebashimikila pa lwa isubilo lyandi ilisangwa muli Baibolo. Nasi umo alimbelengelako icitabo ca Jehovah’s Witnesses—Proclaimers of God’s Kingdom conse ne mpapulo shimbi isha Watch Tower. Ndalanshanya na bantu muli bakalata pa kubomfya akamuti ukutaipilako ifyebo pa kompyuta. Nangu ca kuti tacayanguka ukucite fi, ndanonkelamo mu kutwalilila ukubombako ubutumikishi mu musango uyu.

Ubukali mu mishipa bulancusha sana. Lelo, ng’umfwako fye bwino ilyo ndeebako bambi icine ca mu Baibolo nelyo ilyo bambi balembelengelako. Inshita shimo, ndashimikilako mu musebo no mukashi wandi uuntungilila, uungafwa nga cang’ansha ukulondolola. Nalibombako na bupainiya bwakwafwilisha imiku iingi. Ukuba eluda wa Bwina Kristu kulanenga ukusekelela, kabili ndasekelela sana ilyo bamunyina balanda na ine pa kulongana nelyo ilyo bantandalila ku ng’anda kabili nabafwa nelyo ukubakoselesha.

Ca cine ukuti calyanguka ukuba inkumbabulili. E co lyonse ilyo naumfwa ukufuupulwa ndapepa apo pene fye ukuti ningaba no kusekelela. Ndapepa akasuba no bushiku ukuti Yehova akatwalilile ukuntungilila. Lyonse ndaba ne nsansa ilyo umo anembelako kalata nelyo ukuntandalila. Ukubelenga Ulupungu lwa kwa Kalinda na Loleni! kunenga lyonse ukutontonkanya pa fya kukoselesha. Ba nasi bapusanapusana balambelengelako aba bamagazini inshita shimo. Ukutula lilya naponene pa mutenge, nalikutika imiku 7 ku kubelenga kwa Baibolo yonse ukwa pa makaseti yakopwa pa tepu. Ishi e nshila shimo ishalekanalekana isho Yehova antungililamo.—Amalumbo 41:3.

Ukwaluka kwa mibele yandi kwalimpele inshita ya kutontonkanya sana pa fyo Yehova, Kasambilisha wesu Uwakulisha atusambilisha ifyo twingaipakisha ubumi. Alatusambilisha icine pa lwa kufwaya kwakwe, alitupeela ubutumikishi busuma, ukufunda pa fya kukwata ulupwa lwa nsansa, no kushilimuka ku kutwafwa ukwishiba ifya kucita ilyo tuli na mafya. Yehova alimpeela umukashi wa cishinka kabili umusuma. Abana bandi bonse nabo balantungilila ne cishinka, kabili ndasekelela ukuti bonse balibombako mu butumikishi bwa nshita yonse. Na kuba, pa March 11, 2000, umwana wesu umwaume Mark no mukashi wakwe, Allyson, bapwishishe ikalasi lyalenga 108 ilya Isukulu lya Gilead kabili batuminwe ukuyabombela ku Nicaragua. Ine no mukashi wandi twalisangilweko ilyo balepwisha isukulu. Kuti natila icine cine amafya yalyalula ubumi bwandi lelo tayayalula umutima wandi.—Amalumbo 127:3, 4.

Ndatasha Yehova pa mano ampeela ku kungafwa ukupeela ulupwa lwandi ubupyani bwa ku mupashi ubo napokelele. Ndakoshiwa no kukoseleshiwa ukumona abana bandi balebombela Kabumba wabo no kukwata imibele yakwete batata, abatile, “Tatuleka fye ifyo fine. Yehova alitupeela umulimo wa kushimikila.” Cine cine, Yehova alintungilila pamo no lupwa lwandi inshiku shesu shonse.

[Icikope pe bula 24]

Ine na batata, bamunyinane, na nkashi yandi, mupepi na motoka iyakwete ng’anda, iyalebomfiwa ilyo twalebomba bupainiya. Ndi ku kulyo

[Icikope pe bula 26]

Ine no mukashi wandi, Myrna

[Icikope pe bula 26]

Icikope twakopelwe nomba line ica lupwa lwesu

[Icikope pe bula 27]

Ncili ndashimikila ukubomfya bakalata