Ifipusho Ukufuma ku Babelenga

Bushe kuti caba fye bwino umutumikishi wa Bwina Kristu ukulanda ilyashi lya cililo ca muntu uuipeye?

Umwina Kristu umo na umo ali no kumona nga ca kutila kuti aba na kampingu musuma nga alanda ilyashi lya cililo ca muntu uo cilemoneka ukuti aipeye fye. Ilyo alepingulapo ifya kucita, afwile ukubebeta ifi fipusho: Bushe Yehova amona shani ukuipaya? Bushe cine cine aipeye fye? Bushe kufulungana kwalengele ukuti aipaye? Bushe ukuipaya kumonwa shani mu bwikashi nabamo?

Fwe Bena Kristu tulafwaisha ukwishiba ifyo Yehova amona ukuipaya. Kuli Yehova ubumi bwa muntu bwalicindama kabili bwalishila. (Ukutendeka 9:5; Amalumbo 36:9) Ukuipaya ku mufulo kubi mu menso ya kwa Lesa. (Ukufuma 20:13; 1 Yohane 3:15) Bushe ico calangilila ukuti umo te kuti alande ilyashi lya cililo ca uipeye?

Moneni icacitikile Imfumu Shauli iya mu Israele. Ilyo aishibe ukuti tapusuke mu bulwi bwakwe ubwa kupelekesha na baPelishiti, ukucila ukuleka umulwani ukumwipaya bubi bubi, “Shauli abuulile ulupanga lwakwe, no kuwapo.” Ilyo abaPelishiti basangile icitumbi cakwe, bacipampamine ku cibumba ca musumba wa Bete-shani. Ilyo baishibe ico abaPelishiti bacitile, abekashi ba mu Yabeshe-gileadi bafumishe icitumbi kulya no koca. Lyene basendele amafupa yakwe no kuyashika. Balekele no kulya pa nshiku 7, umwata wa pa kuloosha uwa bena Israele. (1 Samwele 31:4, 8-13; Ukutendeka 50:10) Ilyo Davidi, uwasubwa uwa kwa Yehova, aishileishiba icacitile abekashi ba mu Yabeshe-gileadi, atile: “Mube abapaalwa imwe kuli Yehova, pantu mwacitile uluse kuli shikulwinwe, kuli Shauli, ulwa kumushiika. Nomba Yehova acite kuli imwe uluse ne cishinka!” (2 Samwele 2:5, 6) Baibolo taitila abekashi ba mu Yabeshe-Gileadi balibakalipile pa co bacitile, icingamonwa ngo kukonka umwata pa cililo ca Mfumu Shauli. Linganyeni ici ku calecitwa ku bashaleshiikwa pa mulandu wa buncitatubi. (Yeremia 25:32, 33) Umutumikishi wa Bwina Kristu kuti atontonkanya pa lyashi lyakwa Shauli ilyo alepingulapo nampo nga kuti alanda ilyashi lya cililo ca uipeye.

Umutumikishi kuti afwaya ukutontonkanya na pa co alelandila ilyashi lya cililo. Ukupusana na basumina ukuti umweo taufwa, Inte sha kwa Yehova tabalanda amalyashi ya cililo pa kuti bashindike uufwile ku calo cimbi, ici cisumino calubana. Ukucila ukulanda ukuti uufwile amwenemo, ico balandila ilyashi lya cililo kusansamusha abafwililwe no kushimikila abasangilweko pa fyo cili ku ufwile. (Lukala Milandu 9:5, 10; 2 Abena Korinti 1:3-5) Umulandu umbi uwacindama uwa kulandila ilyashi lya cililo kulenga bonse abasangilweko ukutontonkanya pa fyo ubumi bwaipipa. (Lukala Milandu 7:2) Bushe ifi fili no kucitwa nga ca kuti umo alanda ilyashi lya cililo ca muntu uuipeye?

Ca cine, bamo kuti batontonkanya ati aipeye fye ku mufulo, no kwishiba alishibe ukuti alebembukila Yehova. Lelo, bushe lyonse cilanguka ukusanga ifishinka pali ico? Bushe napamo kuti akuntukilwe fye ukucite co? Bamo abesha ukuipaya balaleka ukutontonkanya pa kucite co, kabili balataluka ku kuipaya. Pa numa ya mfwa umuntu te kuti alapile pa fyo acitile.

Cimbi na co icacindama ukubebeta, malwele ya mu nkuntu na ku muntontonanya ayo abengi abaipaya balwalako. Aba cine cine kuti bamonwa ukuti baipeye fye. Ukulingana ne fipendo fimo, impendwa iikalamba sana pa baipaya balaba no bwafya bwa mu muntontonkanya, mu nkuntu nelyo baba abakunkuma ku miti ikola. Bushe Yehova kuti alekelela uwaipaya uuli fyo lwa ku muntontonkanya? Te kuti twishibe nga ca kuti uufwile acitile ulubembu ulushingelelwa mu menso ya kwa Yehova. Ilyo alemona nga kuti alanda ilyashi lya cililo, umutumikishi wa Bwina Kristu afwile ukubebeta ifyalengele pamo na malwele uuipeye alwelepo.

Kuli na cimbi ica kutontonkanyapo: Bushe abantu mu bwikashi bwenu bamona shani ukuipaya e lyo ne mfwa ya muntu? Baeluda maka maka kuti bayangwa kuli ici, apo balyangwa ku fyo icilonganino ca Nte sha kwa Yehova ico babamo cimonwa. Ukukonka ifyo abengi kuntu mwikala bamona ukuipaya maka maka ukukuma uko kwine kucitike, baeluda kuti basalapo ukukanatungilila ico cililo pa cintubwingi nelyo ukulanda ilyashi lya cililo mu Ng’anda ya Bufumu.

Na lyo line, nga ca kuti umutumikishi wa Bwina Kristu bamulomba ukwangalila icililo, kuti asalapo ukucite co pa lwakwe. Nga ca kuti apingulapo ukucite co, afwile ukushilimuka ukukanalanda nampo nga uufwile kuti abuushiwa nelyo iyo. Icilolelo ca uufwile ica ku ntanshi ciba mu maboko ya kwa Yehova, kabili takuli uwingalanda nampo nga uufwile akabuushiwa nelyo iyo. Umutumikishi kuti ayangwa ukulanda ifishinka pa mfwa ifyaba mu Baibolo no kusansamusha abaleloosha.