Ukutemwa “Abatakatifu” Ukwa Muno Nshiku

Inyunshipepala imo yatile: “Ibukisheni ilyo twatendelwe ukuumfwa ishiwi lya kuti mpalume? Tacamoneke fyo ku bena Amerika amamilioni 4.2 abaletamba icililo ca kwa Mama Teresa pa [September 13]. Ukutula apo afwilile pa [September 5], abantu balapaapaata aba ku Vatican ukuti bamusonte ukuba umutakatifu. Banono batwishika nga cikacitika.”—Sun-sentinel, United States, October 3, 1997.

ABENGI bamona umulimo wa kwafwa bantu uwa kwa Mama Teresa, mishonari wa baKatolika nge cilangilila ubutakatifu bwa cine. Impalume e mo shaba na mu mipepele imbi. Napamo takwaba nangu umo uwaishibikwa nga balya abasontwa ne calici lya Roma Katolika.

Papa John Paul II aalisonta mupepi na bantu 300 mu kuteka kwakwe ukwa bupapa. Aba balifula ukucila bonse abasontwa na ba Papa bonse aba mu myaka ya ba 1900.a Cinshi cilenga abantu ukutwalilila ukuipelesha ku betwa abatakatifu, abengi abashaishibikwa na sana kuli baKatolika bonse?

Lawrence Cunningham, uusambilisha ifya mipepele pa University ya mu Notre Dame alondolola ati: “Abantu balafwaya sana ifyashila muno calo. Ukusumino kuti kwaliba batakatifu cilangililo ca kuti na pali lelo kwaliba impalume.” Na kabili, batila balya beta ati abatakatifu balapalama kuli Lesa mu kuibela, icilenga bene ukuba abafikapo ukulombelako aba mweo. Nga basanga babenye nelyo amafupa ya muntu beta umutakatifu, balafishinshimuna apo basumina ukuti filakwata amaka.

Ukusuminishanya basuminishenye pa cilye ca Council of Trent, uko basabankenye mu mwanda wa mwaka uwalenga 16 ku kukosha icisumino ca baKatolika, kwaleti: “Natukwata umulandu usuma uwa kupingwilapo ukuti, ukucindika abatakatifu ‘abafwila muli Shikulu,’ ukubalomba ukuti batupaapaatileko, no kupepa babenye babo abashila ne mito ya mibili yabo, takucefya bukata bwa kwa Lesa, lelo kulalundulula ubukata ukulingana ne fyo isubilo lya Mwina Kristu lilekula no kukoshiwa, kabili uulelomba ku batakatifu alakoseleshiwa ukupashanya imibele yabo.” (The Catechism of the Council of Trent, 1905) Kwena Abena Kristu ba cine bafwaya ukwikala ubumi busuma, ukupalama kuli Lesa mu nshila isuma, no kwafwiwa na Lesa. (Yakobo 4:7, 8) E co, ukulingana ne Cebo ca kwa Lesa, ni bani bafikapo ukuba abatakatifu bene bene? Kabili mulimo nshi babomba?

[Futunoti]