Ukupeela Ifyo Ushingakumanisha

“NANGU mwanjita ati kalombalomba; nshafulwe. Ndelombela Yesu.” Ayo mashiwi ya kwa shimapepo wa ku Protestanti yalelangilila ukukansana kwabapo pa fyo imipepele isanga indalama. Imipepele yateyanishiwa imoneka kwati ibomba bwino nga ca kuti naikwata indalama ishingi. Ilingile ukufolesha abantu indalama, ukukuula amatempele no kulayawamya, ilakabila ne ndalama sha kubomfya pa kushimikila. Bushe indalama shikabilwa bashisanga shani?

Amacalici ayengi yasanga ishi ndalama mu kutuula ica pe kumi.a Shimapepo Norman Robertson atile: “Ukupeela ica pe kumi ni nshila Lesa asangilamo indalama sha kwafwilamo ubufumu Bwakwe pano isonde. Ni nshila Yakwe iya kusangilamo indalama ishibomfiwa pa kubila Ilandwe.” Ukwabula no kuumfwa insoni, acinkwileko abakonshi bakwe ulwa mulimo wabo uwa kupeela, pa kubakonkomesha ati: ‘Ukupeela ica pe kumi te cintu wingacita fye ilyo ukwete ifya kupeela. Caba cumfwila. Ukukanapeela ica pe kumi kutobe funde lya kwa Lesa. Cimo no kufinsha.’—Tithing—God’s Financial Plan.

Ukwabula no kutwishika mulesumina ukuti ukupeela lubali lwa kupepa ukwa Bena Kristu. Na lyo line, bushe ukulombelesha indalama kulamuteke mfine, napamo no kumukalifya fye? Inácio Strieder, umwina Brazil uwasoma ifya mipepele apeele amacalici umulandu wa “kubomfya ica pe kumi ukupwisha amafya ye calici lyabo,” kabili atila ico bacita “te ca mwi funde, kwibila abantu, kabili te bukapepa.” Atila, icafumamo ca kuti, “abashibomba, bamukamfwilwa, abekala mu ma komboni, na bafilwa ukwishiba bwino umo fyalola, batila Lesa alibalekelesha no kuti babapeela umulimo wa kutuula indalama ishingi kuli shimapepo ica kuti indupwa shabo shishala ukwabula ne fya kulya.”

Napamo kuti mwapapa amuti: “Bushe amacalici ayapatikisha abantu ukupeela ica pe kumi yalakonka Amalembo bwino bwino? Nelyo bushe napamo imipepele imo ilatiinya impaanga sha iko ukuti shikakandwa kuli Lesa pa kuti shiletuula indalama ishingi? Lelo, bushe Lesa enekela ifwe ukumupeela ifyo tushingakumanisha, nge fyo bamo bengasosa?’

[Futunoti]