Bushe Inte sha kwa Yehova balapeela ica pe kumi?

Fwe Nte sha kwa Yehova tatupeela ica pe kumi. Indalama tubomfya mu mulimo wesu, ni fwe tusangula fwe bene mu kuitemenwa fye. Bushe ica pe kumi ni cinshi, kabili mulandu nshi Inte sha kwa Yehova bashipeelela ica pe kumi?

Ifunde lya kupeela ica pe kumi pa fyo umuntu akwete, lyali pa Mafunde ayo Yehova apeele abena Israele. Lelo Baibolo yalilanda mu kulungatika ukuti aya Amafunde, apaba ne funde lya “kupoka ku bantu ifya pe kumi” talibomba ku Bena Kristu.—AbaHebere 7:5, 18; Abena Kolose 2:13, 14.

Mu nshita ya kupeela ica pe kumi ne mituulo, Inte sha kwa Yehova bapashanya Abena Kristu bakubalilapo kabili bacita ifintu fibili pa kwafwilisha umulimo wa kushimikila. Ica kubalilapo ca kuti balashimikila imbila nsuma ukwabula ukubalipila e lyo cimbi ca kuti abene e basangula imisangulo mu kuitemenwa fye.

Kanshi tulakonka ifyo Baibolo yaeba Abena Kristu ukuti: “Onse acite umo apangile mu mutima wakwe, te kupeela na mutimako nangu mu kupatikishiwa, pantu Lesa atemwa uupeela ne nsansa.”—2 Abena Korinti 9:7.