Ukulumbanya Yehova pa Sukulu
MU CALO conse, abana aba Nte sha kwa Yehova balelumbanya Yehova pa sukulu ukupitila mu milandile isuma e lyo ne mibele isuma. Moneni ifyo bacitile ifilangilila ukuti balicincila nangu ca kuti baice.
Nte umwaice uwa ku Greece bamwebele ukulemba ilyashi lyalelanda pa kukowesha umwela ukucitwa mwi sonde. Pa numa ya kubomfya Watch Tower Publications Index, asangile ilyashi lisuma muli magazini wa Loleni!, kabili pa mpela ye lyashi lyakwe alangilile ukuti afumishe ifyebo muli Loleni! Kafundisha amwebele ukuti ilyashi lyobe naliwama kwati malyashi yambi ayasuma ayo nabelengapo. Pa numa kafundisha abomfeshe filya fyebo ilyo bakumene na bakafundisha banankwe, kabili mwafumine ifisuma. Nkashi wacaice asalilepo ukupeela kafundisha wakwe bamagazini ba Loleni! abengi ukusanshako na Loleni! walelanda pali bakafundisha. Pa numa kafundisha alandile ifyebo ifisuma pali Loleni! ku bana be sukulu, kabili na bo balombele aba bamagazini. Nkashi asendele bamagazini ku sukulu pa kuti abanankwe na bo bengabelengamo.
Muno Afrika, ku Benin, Umwina Kristu umupungwe alolenkene no bwafya bwaibela. Nge fyo ciba lyonse, abafyashi abengi abakwata abana basambilila pe sukulu uyu mwaice asambililapo, balilongene pa kuti bengafwaya bakafundisha abengalasambilisha abana babo mu fisambilisho fyakosa pa kuti bakapase amashindano. Nomba, bakafundisha basalilepo ukulasambilisha abana be sukulu pa Cibelushi ulucelo. Nte wacaice alikeene, atile: “Pa Cibelushi ulucelo e lyo aba mu cilonganino bonse bashimikila pamo. E bushiku mba ne nsansa sana mu mulungu, e co teti ndeke ukulashimikila pamo ne cilonganino pa kuti fye ndecite cintu cimbi!” Bawishi, abafyashi abashimbe kabili baNte, balisumine kabili baeseshe ukweba abafyashi bamo na bakafundisha ukuti baalule inshita. Lelo, bonse balikeene. Umukashana asalilepo ukukanalaaya ku kusambilila pa Cibelushi. Ukucila aaleya mu kushimikila pamo na ba mu cilonganino. Abanankwe balemupumya, no kumweba ukuti akaleke ukushimikila no kuleka fye ukupepa Lesa wakwe. Bena baleti ali no kupona amashindano. Nomba icaishilecitika ca kuti bonse abaleya ku kusambilila pa Cibelushi baliponene, nkashi yesu uwacaice ena alipashile. E fyo no kupumya kwapwile. Nomba abanankwe bamweba ukuti: “Utwalilile ukubombela Lesa obe.”
Ku Czech Republic, umukashana wa myaka 12 aebelwe ukulanda ilyashi pa citabo icili conse. Banyina bamwebele ukulanda pa citabo ca Umuntu Wakulisha Uwabalile Abako Uwa Mweo. Abomfeshe amepusho nge ntendekelo ya lyashi lyakwe, aipwishe ukuti: “Muletipo shani? Nani mwingatila e muntu wakulisha uwabalile abako uwa mweo?” Lyena, alandile pali Yesu, ifyo acitile ilyo ali pe sonde, ne fyo alesambilisha. E lyo alandile pa cipandwa citila “Isambililo mu Kulekelela.” Kafundisha wakwe atile, “Ili e lyashi lyawamisha ilyo naumfwapo kuli iwe!” kabili apokeleko ne citabo. Na bamo pa bo asambilila na bo balombele ukuti akabapeeleko ici citabo. Ubwakonkelepo, umukashana alisansamwike pantu ashalike ifitabo 18.
Abaice ba musango yu balasekelela apakalamba ilyo balumbanya Yehova pa sukulu. Kuti cawama nga ca kuti ifwe bonse twapashanya ukucincila kwa aba baice.