“Ukunjafwa Kufuma Kuli Yehova”

Abacaice Abalumbanya Yehova Balanonkelamo

“NDEFWAYA ukuipakisha ubumi!” Ifyo e fyalandile umulumendo wa myaka 15 pa fyo enekela mu bumi. Lelo kwena, uwacaice kuti aipakisha shani ubumi? Baibolo ilasuka mu kulungatika ilyo isosa ukuti: “Ibukisha Kalenga obe ilyo ucili umwaice!”—Lukala Milandu 12:1, Contemporary English Version.

Ukulumbanya Yehova no kumubombela te kwa bakalamba beka iyo. Samwele, umwana mwaume wa kwa Elkana na Hana, ali umunono sana ilyo atendeke ukubombela Yehova pe hema. (1 Samwele 1:19, 20, 24; 2:11) Umukashana munono umuHebere alangile icitetekelo cine cine muli Yehova ilyo aebele Naamani mushika wa mulalo wa bena Suria ukuya kuli Elisha shimapepo pa kuti aposhiwe ifibashi fyakwe. (2 Ishamfumu 5:2, 3) Pa Amalumbo 148:7, 12, bonse abalumendo na bakashana baebwa ukutasha Yehova.a Ilyo Yesu ali fye ne myaka 12, alitemenwe sana umulimo wa kwa Wishi. (Luka 2:41-49) Pa mulandu wa kusambilishiwa Amalembo, bakalume bamo abamwene Yesu pe tempele babilikishe abati: “Shi pususheni, Mwana Davidi!”—Mateo 21:15, 16.

Ukutasha Yehova Pali Lelo

Pali lelo, abacaice abengi mu Nte sha kwa Yehova balacankilwa mu fyo basuminamo kabili mu kushipa balalanda pali fyene kuli bambi ku sukulu na ku ncende shimbi. Natulande pa fya kumwenako fibili.

Mu Britain, aba mwi kalasi umo Stephanie uwa myaka 18 asambilila, balelanshanya pa kuponya mafumo na pa fintu fimbi. Kafundisha alandile ukuti ukuponya mafumo nomba nakupokelelwa na bantu abengi, kanshi umukashana tafwile ukukaana ukucite fyo. Ilyo bonse aba mu kalasi basuminishe ifyo kafundisha alandile, Stephanie afililwe ukushipikisha. Alefwaisha ukupokololako ifya mu Baibolo ifyo asambilile. Ishuko lya kulanda ifyo asuminamo lyaishile ilyo kafundisha aipushe Stephanie ifyo aletontonkanya pali uyu mulandu. Nelyo ca kutila pa kubala alyumfwile umwenso, Stephanie abomfeshe aka kashita ukulondolola ifyo Amalembo yalanda pali ili lyashi. Alandile pa mashiwi yaba pa Ukufuma 21:22-24 no kulondolololo kuti nga cali icalubana ukucena umwana ushilafyalwa, lyena ukufumya ifumo ukwabula no kutwishika kwalipusene no kufwaya kwa kwa Lesa.

Kafundisha uwali shimapepo, tatalile abelengapo ilyo ilembo. Ukushimikila ukwabulo mwenso ukwa kwa Stephanie kwalengele ukuti alanshanye na ba mwi kalasi lyakwe pa malyashi ayengi. Umukashana umo nomba alapokelela lyonse bamagazini ba Ulupungu lwa kwa Kalinda na Loleni!, kabili babili basangilwe na ku kulongana kwa citungu ukwa Nte sha kwa Yehova pa kuti bamoneko uko Stephanie alebatishiwa pa kulanga ukuipeela kwakwe kuli Lesa.

Vareta uwa myaka 6, ekala ku Suriname, ku South America. Ilyo kafundisha wakwe alekabila ukusansamushiwa kwa mu Malembo, Vareta abomfeshe aka kashita ku kulumbanya Lesa. Ilyo kafundisha abwelele ku sukulu pa numa ya nshiku shitatu, aipwishe abana be sukulu nga balishibe icalengele ukuti afumepo. Bayaswike ati: “Limbi kulwala mwalwele.” Kafundisha ayaswike ukuti: “Awe nshalwele. Nkashi nandi alifwa, kabili ndi no bulanda sana. E ico mwikafya icongo lelo.”

Cilya cungulo kasuba ilyo banyina balesepulako utulo, Vareta ali fye uwapamfiwa ukupenaula bamagazini ba kale no kubelenga imitwe ya malyashi. Asangile Ulupungu lwa kwa Kalinda ulwa July 15, 2001, ulwali no mutwe wa kuti “Bushe Umuntu nga Afwa Alaba uwa Mweo Kumbi?” Alitemenwe nga nshi no kushibusha banyina, ati “Mayo, Mayo, moneni! Nasanga magazini ilelanda pa mfwa iya kupeela bakafundisha bandi!” Magazini yalituminwe kuli kafundisha kabili mwali na kalata ukufuma kuli Vareta. Alembele ati: “Ni mwe natumina uyu magazini. Mu Paradaise mukamona bankashi nenu na kabili pantu Yehova tabepa. Alilaya ukuti akaleta paradaise, pano pene pa calo, te ku muulu iyo.” Kafundisha atashishe nga nshi pa cisansamushi ca mu Malembo icali muli magazini.

Ipekanishisheni Ifya ku Ntanshi

Yehova ni “Lesa wa nsansa,” kabili afwaya abacaice ukuba aba nsansa. (1 Timote 1:11) Icebo cakwe citila: ‘Imwe mwe bacaice, ala muleliilapo fye mu buteku bwenu. Mulesansamuka pa nshita ino mucili abateku.’ (Lukala Milandu 11:9, The Bible in Bemba) Yehova tamona fye ifya pali ino nshita, aleshiba ne fikacitika ku ntanshi sana kuli bonse abalecita ifisuma na balecita ifyabipa. E mulandu wine Icebo cakwe cikonkomesesha abacaice aciti: “Lelo ibukisha Kalenga obe mu nshiku sha bulumendo bobe, ilyo inshiku sha bubi tashilaisa, ne myaka tailafika ilyo ukatila, Tapaba kuli ine ukucankilwamo.”—Lukala Milandu 12:1.

Ca cine, Yehova afwaya abacaice ukuipakisha sana ubumi, ubwaba bupe ubwaumo mutengo. Pa kwibukisha Lesa no kumulumbanya, abacaice kuti baikala bwino nga nshi. Na lintu baponenwa no bwafya, kuti balanda no mutima wabo onse ukuti: “Ukunjafwa kufuma kuli Yehova.”—Amalumbo 121:2.

[Futunoti]

[Amashiwi pe bula 9]

“Tasheni Yehova ukufuma pano isonde, . . . mwe balumendo na bakashana kumo.”—AMALUMBO 148:7, 12

[Akabokoshi pe bula 8]

YEHOVA ALATUNGILILA ABACAICE

“Ica kulolelako candi ni mwe, mwe Shikulu Yehova, ni mwe ca kutetekelako candi ukufuma ku bwaice bwandi.”—Amalumbo 71:5.

“[Lesa] e wikusha akanwa kobe ifisuma, ukuti ubwaice bobe bulengwe cipya cipya nga kapumpe.”—Amalumbo 103:5.