Amepusho Ukufuma ku Babelenga
Bushe Umwina Kristu kuti aba na kampingu musuma nga asumina ukubomba incito ya kuti afwile ukuba ne mfuti?
Inte sha kwa Yehova mwi sonde lyonse balicindamika sana umulimo bapeelwa na Lesa uwa kupekanishisha aba mu ng’anda yabo ifyo bakabila. (1 Timote 5:8) Lelo, incito shimo shalipusana ne fishinte fya mafunde ya mu Baibolo kabili tatufwile ukwingila incito sha musango yo. Shimo shimo, ni shilya shisanshamo ifyangalo fya kushitikapo indalama, incito ishilanga ukuti umuntu tacindika umulopa, nelyo incito shapala ukulima nelyo ukushitisha fwaka. (Esaya 65:11; Imilimo 15:29; 2 Abena Korinti 7:1; Abena Kolose 3:5) Incito shimbi na sho, nangu ca kutila tashabindwa mu kulungatika muli Baibolo, kuti shacusha kampingu wa muntu nelyo uwa bambi.
Umuntu umwine e ufwile ukupingulapo nga kuti abomba incito iikabila ukuba ne mfuti nelyo icanso cimbi. Na lyo line, incito ya kuti umuntu afwile ukubomba ne mfuti ilalenga cayanguka ukuba no mulandu wa mulopa nga kwacitika cimo icingapinda ukuti abomfye icanso. Kanshi, Umwina Kristu alingile ukutontonkanyapo no kupepelapo sana pa kuti amone nga kuti aba na maka ya kwishiba bwangu bwangu ukuti cili fye bwino ukubomfya imfuti nelyo iyo ilyo kwaima ubwafya ubwingakuma ubumi bwa muntu. Na kabili, ukusenda icanso kulalenga umuntu aba mu bwafya bwa kucenwa nelyo ukwipaiwa ilyo asanswa ku fipondo nelyo lintu ifipondo fyaishiba ukuti na o ali ne canso.
Ifyo umo engacita pali uyu mulandu, kuti fyakuma na bambi. Ku ca kumwenako, umulimo wa kushimikila imbila nsuma iya Bufumu bwa kwa Lesa, e mulimo ukalamba Umwina Kristu afwile ukubomba. (Mateo 24:14) Bushe umuntu kuti alesambilisha bambi ukuba “aba mutende ku bantu bonse” nga ca kuti incito abomba ya kusende canso? (Abena Roma 12:18) Ni shani ulwa bana na bambi aba pa ng’anda? Bushe ukukwata imfuti mu ng’anda kuti kwalenga ubumi bwabo bwaba mu bwafya? Kabinge, bushe bambi kuti bapunwishiwa pa mulandu wa kuti umo alebomba incito ya musango yo?—Abena Filipi 1:10.
Muli shino “nshiku sha kulekelesha,” abantu abengi baba “abakali, abashatemwa busuma.” (2 Timote 3:1, 3) Nomba, bushe umuntu kuti atwalilila ukuba ‘uushitungwa kabi’ nga ca kuti abomba incito iingalenga ukuti limo alekansana na bantu baba ne yi mibele? (1 Timote 3:10) Nakalya. Pali uyu mulandu, icilonganino te kuti cimone uyo muntu ukuti aba “uushitungwa kabi” nga atwalilila ukubomba ne mfuti pa numa ya kupeelwa ukufunda kwa mu Baibolo mu cikuuku. (1 Timote 3:2; Tito 1:5, 6) E co, umuntu wa musango yo, abe mwaume atemwa mwanakashi, te kuti afikepo ukubomba imilimo yaibela mu cilonganino.
Yesu alaile abasambi bakwe ukuti nga batangisha Ubufumu mu mikalile yabo, tabalekabila ukusakamikwa sana ukuti ni kwi kukafuma ifyo bakabila. (Mateo 6:25, 33) Ca cine, nga twacetekela Yehova umupwilapo, “wene [akatulama]; pe fye takasuminishe uwalungama ukutelententa.”—Amalumbo 55:22.