Bushe Muleibukisha?
Bushe mwalinonkelamo mu kubelenga bamagazani ba nomba line aba Ulupungu lwa kwa Kalinda? Esheni ukwasuka amepusho yakonkapo:
•Mulandu nshi ulubembu lwa kubalilapo—ulo Adamu acitile muli bucintomfwa—lwingapashanishiwa ku bulwele bwa pa lupwa?
Caba ngo bulwele pantu Adamu apishishe ulubembu ku bana bakwe. Kanshi twalipyana ubulema bwa lubembu, nge fyo abana bamo bapyana ubulwele ukufuma ku bafyashi babo.—8/15, ibula 5.
• Fintu nshi ifyalenga ulukaakala ukufulilako pali lelo?
Satana alesha na maka ukufumya abantu kuli Yehova lintu alenga imitima yabo ukutemwa ulukaakala. Acite fyo ukupitila mu fintu pamo ngo kutamba amafilimu, inyimbo, na mangalo ya pa kompyuta ayalenga abaleangala ukutemwa ulukaakala no kwipaya. Pa mulandu wa lukaakala batambisha pa maTV calilenga ukuti kube ulukaakala ulwingi.—9/1, ibula 29.
• Bushe Ponti Pilato Ali Nani?
Ali mwina Roma umulashi, afwile ali mushilika. Kateka wa Buteko bwa Roma Tiberi asontele Pilato ukuba umulashi wa citungu ca Yudea mu 26 C.E. Ilyo Yesu balemulubulwisha, Pilato e wali shicilye ilyo intungulushi sha baYuda shalebepesha Yesu. Pa kuti asekeshe abantu, asuminishe ukuti Yesu epaiwe.—9/15, amabula 10-12.
• “Icishibilo” calandwapo pali Mateo 24:3 cinshi?
Muli ici cishibilo mwaba ifintu ifingi. Cishibilo icisanshamo inkondo, ifipowe, ifikuko, ne finkukuma, na kabili ici cishibilo kuti calenga abakonshi ba kwa Yesu ukwishiba ‘ukubapo’ kwakwe pamo pene ‘ne mpela ya bwikashi.”—10/1, amabula 4-5.
• Ukusalangana kwali cinshi, kabili ni ku ncende nshi basalanganine?
Ukusalangana kulosha ku baYuda abashaleikala mu Palestine. Mu mwanda wa mwaka uwa kubalilapo, abaYuda abengi baleikala mu Suria, mu Asia Minor, mu Babiloni, na mu Egupti. Kabili kwali na baYuda abanono abaleikala mu ncende sha ku Bulaya ishaletekwa na bena Roma.—10/15, ibula 12.
• Bushe Umwina Kristu kuti aba na kampingu musuma nga asumina ukubomba incito ya kuti afwile ukuba ne mfuti?
Umuntu umwine e ufwile ukupingulapo nga kuti abombe ncito iikabila ukuba ne mfuti nelyo icanso. Lelo iyi incito yakuba ne mfuti kuti yalenga umo ukukwata umulandu wa mulopa nga ca kuti abomfya icanso ukucena nelyo ukwipaya ilyo asanswa ku fipondo nelyo lintu ifipondo fyaishiba ukuti na o ali ne canso. Umwina Kristu usenda ifyanso fya musango uyo te kuti afikepo ukubomba imilimo yaibela mu cilonganino. (1 Timote 3:3, 10)—11/1, ibula 31.
• Apo ishiwi “Armagedone” lyafuma kwi shiwi “Ulupili lwa Megido” bushe ubu bulwi bwa Armagedone bukalwilwa pa lupili ku Middle East?
Awe nakalya. Takwaba Ulupili lwa Megido, lelo kwaba fye akapili akalunduka mupepi ne lungu ilyaba mu Israel. Pali iyo ncende te kuti ‘ishamfumu sha pe sonde ne milalo ya shiko’ bakumane ukulwilapo. Inkondo ya kwa Lesa iikalamba ikalwikwa pe sonde lyonse, kabili ikapwisha inkondo shonse. (Ukusokolola 16:14, 16; 19:19; Amalumbo 46:8, 9)—12/1, amabula 4-7.