Bushe Tufwaya fye Bambi Ukuba ne Cishinka?
UMUKASHANA umo uuli ne myaka 16 asosele ukuti: “Nalipata ubufi, kabili nalipata no kumbepa!” E fyo na fwe bengi twapata ubufi. Tufwaya ukutweba ifyebo fya cine, nampo nga fya kutweba pa kanwa atemwa fya kutulembela. Nomba bushe tulalanda icishinka ilyo tulelanda kuli bambi?
Mu kufwailisha kumo uko bacitile mu Germany, abengi abo baipwishe balemona kwati “ukubepa mu tuntu utunono pa kuti umuntu aicingilile nelyo ukucingilila bambi kwaliba fye bwino, kabili kwalicindama pa kuti abantu baleumfwana.” Kabili kalemba umo uwe lyashi alembele ukuti: “Ukulanda icishinka lyonse kusuma, nomba kulatendusha.”
Bushe napamo tufwaya ukuti abantu bambi e bo balelanda icishinka kuli ifwe, nomba ifwe tumona kwati limo kuti caba fye bwino ukubepa? Bushe paliba ubwafya ubuli bonse nga twalanda icishinka atemwa iyo? Finshi fifuma mu kubepa?
Ico Ubufi Bwabipila
Tontonkanyeni pa bubi bufuma mu kubepa. Ubufi bulenga abalume na bakashi ukukanacetekelana kabili na bonse mu lupwa tabacetekelana. Ulwambo lulalenga ishina lya muntu ukubipa. Pa ncito, ababomfi nga balefinsha, cilalenga akampani ukupoosa indalama ishingi sana, ne ci cilenga ifintu ukunina sana umutengo. Ukulemba ifya bufi pa fipepala fya musonko kulenga ubuteko ukukanakwata indalama sha kubomfya ku kubombela icintubwingi. Ubufi ubo abasambilila pali fimo babepa bulenga bayonawila incito ishisuma e lyo no konaula ishina lye sukulu nelyo akabungwe ako babombako nelyo akabatuma mu kusambilila. Ipange lya kufwaya ukunonka bwangu ukubomfya ubucenjeshi lilenga bashimakwebo ababepwa ukwibilwa indalama isho baabombela pa myaka iingi, kabili na fimbi ifyabipa filacitika ukucila na pali ifi. E mulandu wine Baibolo itwebela ukuti pa fintu ifya muselu kuli Yehova Lesa paba “ululimi lwa bufi” ne “nte ya bufi iilande fya bufi”!—Amapinda 6:16-19.
Ukubepa ukwaba fye mpanga yonse, kulonaula abantu e lyo ne calo fye conse. Abengi balasumina ukuti ici cishinka. Nomba, mulandu nshi abantu babepela ku mufulo fye? Bushe ukulanda ifyebo ifishilungeme cimo no kubepa? Tukasuka aya mepusho na mepusho yambi mu cipande cikonkelepo.
[Icikope pe bula 3]
Ubufi bulenga abaupana ukukanacetekelana